1
داودِ خاندان، درختی یَ مَأنه کی وَأوِه بوبُسته، ولی اونِ کُنده جوانه زنه، ایتَه روزی اونِ ریشه جَه ایتَه تازه شاخه جُر اَیه.
2
خداوندِ روحْ اونِ شاخه رو قرار گیره، یعنی روحِ حکمت و فهمْ، و روحِ مشورت و قوّتْ، و روحِ خداوندِ شناختْ، و ترس جی خداوند.
3
همۀ اونِ خوشی خداوندِ ایطاعت کودَأنه. اون جی روی ظاهر داوری نوکونه، اون بر اساس اونچی کی بیشتاوسته حُکم نوکونه،
4
بلکی انصاف و عدالتِ مرَه فقیران و مظلومانِ حقِ جَه دفاع کونه، اون خطاکارانَ جزا دِهِه و ظالمانِ جَه انتقام گیره.
5
اون عدالت و صداقتِ مرَه حکومت کونه.
6
اون زمان گرگ و برّه همدیگرِ اَمرَه زندگی کوند، پلنگانْ بزغاله یانِ ورجَه خوسد، گوساله و شیر همدیگرِ اَمرَه راه شُد و ایتَه کوچی زَأی اوشَأنَ هر جا بخَأیه بوره.
7
گاوْ خرسِ کنار چرا کونه و خرسِ توله گوساله اَمرَه ایتَه جا خوسد، و شیر گاوِ مَأنستَأن سرِچینا خوره.
8
شیرخواره طفل لانتی لانه ورجَه بازی کونه و طفلی کی تازه شیرِ جَه بیگیفته بوبُسته خو دسَ تَأوَأده اَفعی لانه دورون.
9
می مقدسِ کوهِ همه جا، هیچ بدی و شرارتی وجود نَئره، چره کی هوطویی کی دریا آبِ جَه پوره، هوطو هم جهان خدا شناختِ جَه پورَه بِه.
10
او روز اون جدید پادشاه جی داودِ خاندان، پرچمِ نجاتی بِهه همۀ ملتانِ رِه، همۀ اُمتان اونِ طرف اَید و اونِ سرزمینْ جی شکوه و جلال پورَه بِه.
11
وختی او روز برسه، خداوند خو دسَ درازَ کونه و خو قؤمِ بازمانده یانَ جی آشور و مصر و سودان و حبشه و عیلام و بابِل و حَمات و جی همۀ جزایر و بنادرْ وَأگردَأنه به اسرائیل.
12
بله، خداوند علامتی مرَه دیگر قؤمانَ نیشان دِهِه کی خَأیه کسانی کی اسرائیلِ جَه آوارَه بوسته دَأرد، و کسانی کی یهودا جَه پراکندَه بوسته دَأردْ جی همۀ دونیا کنار گوشه جمعَ کونه.
13
دِ اسرائیلِ شمالی پادشاهی یهودایَ حسادت نوکونه، و یهودا هم دِ اسرائیلِ مرَه دوشمنی نوکونه.
14
اوشَأن همدیگرِ اَمرَه متحد بود و فلسطینیانَ کی غربِ طرف ایسَد حمله کوند، و باهم اَقوامی کی شرقِ طرف ایسَدَه غارت کوند، اوشَأن اَدوم و موآبِ مردمَ شکست دهد و عَمّونیانِ سرزمینَ خوشَأنِ مطیع کوند.
15
خداوند مصرِ خلیجِ آبَ کلاً خوشکَ کونه و خو دسَ فراتِ رودِ طرف درازَ کونه و ایتَه توندِ بادِ اَمرَه اونَ به هفتَ کوچی رودخانه تبدیل کونه تا هر کس بتَأنه راحت اونِ میَأنِ جَه دوَأره.
16
و اونْ قؤمِ بازمانده یانِ رِه کی آشورِ میَأن ایسَد شاهراهی بِهِه تا هوطو کی اوشَأنِ اَجداد جی مصر بیرون بأمود اوشَأنم بتَأند وَأگردد خوشَأنِ سرزمین.