4

¹ موسی جواب بدَه:«بنی اسرائیل مرَه باور نوکوند و می گبَأنَ نیشتَأود بلکی گویده؛ یهوَه ترَه ظاهرَ نوبوسته.» ² خداوند موسیَ بفرماست:«اون چیسه کی بدسِ دَأری؟» جواب بدَه:«عَصا» ³ بفرماست:«اونَ زمینِ رو بِئگَأن» وختی موسی اونَ بِئگَأد زمینِ رو، ایمرتبه عَصا ایتَه پیلدانه لانتی بوبُست و موسی اونِ جَه فرار بوکود. ⁴ پس خداوند موسیَ بفرماست:«تی دَسَ درازَ کون و اونِ دُمَ بیگیر» موسی هم خو دسَ درازَ کود و اونِ دُمَ بیگیفت و لانتی اونِ دسِ دورون دوباره عَصا بوبُست. ⁵ اونموقع خداوند بفرماست:«اَ کارَ بوکون تا باور بوکوند کی یَهوَه، اوشَأنِ پئرَأن، یعنی اِبراهیم و اِسحاق و یعقوبِ خدا ترَه آشکارَه بوستِه» ⁶ و بازم خداوند موسیَ بفرماست:«تی دسَ تی یقه دورون تَأوَأد» وختی موسی اَ کارَ بوکود و خو دسَ خو یقه دورون تَأوَأدَه و بیرون بأورد، اونِ دس جوذام بیگیفت و برف مَأنستَأن سفیدَ بوست. ⁷ خداوند بفرماست:«هَسَه دوباره تی دسَ تی یقه دورون تَأوَأد» وختی موسی دوباره خو دسَ خو یقه دورون تَأوَأدَه و بیرون بأورد بیدِه کی اونِ دس، اونِ دیگر اَعضاء مَأنستَأن خوبَه بوسته. ⁸ اونموقع خداوند موسیَ بفرماست:«اگر مردم اولی معجزه یَ باور نوکودد، دومی یَ باور کوند، ⁹ ولی اگر اَ دو تَه معجزه یَ بوکودی و بازم تی گبَأنَ قبول نوکودد، اونموقع نیلِ رودخانه جَه آب اوسَأن و خوشکی رو فوکون، اون آب، خونَ تبدیل بِهِه» ¹⁰ موسی بوگوفت:«خداوندا، من نِتَأنم خُب گب بزنم، نه پیشترانِ رِه نه هَسَه کی می مرَه گب بزَه دَأری، بلکی خَأیم گب بزنم می زبان گیره، و من جودم» ¹¹ خداوند بفرماست:«کیسه کی انسانَ زبان فَأدَه دَأره؟ و لال و کر و کورَ کی خلق بوکوده؟ آیا من کی یَهوَه یم اَ کارَ نوکودم؟ ¹² پس هَسَه بوشو، من تی زبانَ قدرت دهم و هر چی کی وَأستی بوگویی یَ ترَه یاد دِهِم.» ¹³ موسی بوگوفت:«خداوندا، تمنا دَأرم اینفر دیگرَ می جا اوسِه کون» ¹⁴ اونموقع خداوند موسی دسِ جَه عصبانی بوبُست و بوگوفت:«آیا من نَأنم کی تی برَأر هارونِ لاوی خُب گب زنِه؟ اون اَیِه تی پیشواز تا ترَه بیدینه، وختی ترَه بیده خو دیلِ دورون شادمانَ بِه. ¹⁵ اونچی کی وَأستی بوگویی یَ هارونَ بوگو تا تی جا گب بزنه. من شومَأن هر دو نفرِ زبانَ قدرت دهم و اونچی کی وَأستی بوکونیدَ شمرَه یاد دهم. ¹⁶ هارون قؤمِ ورجَه، تی جا مردمِ مرَه گب زنه و تو اونِ رِه خدا مَأنستَأن بی و اونچی کی وَأستی بوگویه یَ اونَ گویی. ¹⁷ تی عَصایم تی مرَه بوبور کی اونِ اَمرَه مُعجزه یان کونی.»

¹⁸ پس موسی وَأگردست خو زنپئر یِترونِ ورجَه و اونَ بوگوفت:«خَأیم وَأگردم مصر و بیدینم می خویشَأن زنده ید یا بِمرده دَأرد» یِترون موسیَ بوگوفت:«بوشو به سلامت» ¹⁹ و خداوند سرزمینِ مدیانِ دورون موسیَ بوگوفت: «حرکت بوکون و وَأگرد مصر، چون کسانی کی خَأستِد ترَه بوکوشد بِمرده دَأرد» ²⁰ موسی هم خو عَصایَ خو دس بیگیفت، و خو زن و خو پسرَأنَ خرِ رو بینیشَأنِه و راه دکفت وَأگردست که بیشه مصر. ²¹ و خداوند موسیَ بوگوفت: «وختی فَأرسِه ایی مصر، بوشو فرعونِ ورجَه، و تی حواس بِمَأنه همۀ معجزه یانی کی ترَه قدرت بدَه دَأرم انجام بدی یَ اونِ ورجَه آشکارَه کون، من اونِ دیلَ سختَ کونم تا بنی اسرائیلِ قؤمَ آزادَ نوکونه. ²² و فرعونَ بوگو خداوند فرمایه؛ اسرائیل می پسر، و می پیله پسره، ²³ ترَه گوفتَأن دِرم می پسرَ آزادَ کون تا مرَه عبادت بوکونه، اگر اونَ آزادَ نوکونی، منم تی پسر، یعنی تی پیله زَأیَ کوشم.» ²⁴ وختی موسی خو خانواده مرَه شوئون دوبود مصر، راه میَأنی اُردو بزَد کی استراحت بوکوند، در اویَ خداوند موسیَ آشکارَه بوست و موسیَ تهدید بوکود کی اونَ کوشه. ²⁵ اونموقع موسی زن صِفورَه، ایتِه تیزِ سنگ اوسَأد و خو پسرَ ختنه بوکود و ایضافه پوستَ موسی پا جولو تَأوَأدَه و بوگوفت:«تو مرن خونِ مرد ایسی» ²⁶ پس خداوندم اونِ کوشتنِ جَه دس بِکِشِه. بازن صفورَه موسی یَ بوگوفت:«تی پسرِ ختنه نوکودَنِ وَسی نزدیک بو خودتَ به کوشتن بدی» ²⁷ و خداوند هارونَ بفرماست:«بوشو صحرا طرف موسی پیشواز.» هارون هم راه دکفت و بوشو کوهِ سینا طرف کی خدا کوهَ معروفه. وختی دو نفر همدیگرَ فَأرِسد همدیگرَ مَأچی بدَأد. ²⁸ و موسی هارونِ رِه تعریف بوکود کی خدا اونَ چی دستوراتی بدَه دَأره و چی مُعجزه یانی وَأستی فرعونِ ورجَه انجام بده. ²⁹ بازن موسی و هارون بوشد و همۀ بنی اسرائیلِ شیخَأنَ جمعَ کودد. ³⁰ و هارون همۀ گبَأنی کی خداوند موسیَ بوگوفته بویَ اوشَأنِ رِه بوگوفت و موسی مُعجزه یانَ اوشَأنَ نیشان بدَه. ³¹ اونموقع بنی اسرائیلِ قؤم ایمان بأوردد کی اوشَأن، خدا اوسه بوبُستِه یاند، و وختی بیشتَأوستد کی خدا قؤمَ توجه بوکوده و اوشَأنِ رنج و مُصیبتَ فَأندِرستِه و خَأیِه کی اوشَأنَ نجات بده، زمینِ رو بکفتد و سُجده بوکودد.