5
موسی و هارون فرعونِ ورجَه
1
موسی و هارون، بنی اسرائیلِ پیله کسانِ ملاقات کودَأن پس رِه، بوشود فرعون ورجَه و اونَ بوگوفتد:«اسرائیلِ خدا یَهوَه جَه ترِه پیغامی بأورده دَأریم، اون اَطو گویه؛ می قؤمَ آزادَ کون بدَه بوشود و مرَه صحرا دورون عبادت بوکوند»
2
فرعون جواب بدَه:«یَهوَه دِ کیسه کی من اونِ گبَ گوش بوکونم و بنی اسرائیلَ آزادَ کونم؟ من یَهوَه یَ نشناسم و بنی اسرائیلم آزادَ نوکونم»
3
موسی و هارون جواب بدَأد:«عِبرانیانِ خدا اَمرَه ملاقات بوکوده، پس تو ایجازه بدن صحرا دورون، سه روزِ قدر راه بیشیم و اویَ، یَهوَه اَمی خدا رِه قربانی بوکونیم، وگرنه اَمرَه جنگ و یا وبا مرَه کوشه.»
4
فرعون اوشَأنَ بوگوفت:«ای موسی و هارون، چره وَأنَألید قؤم خوشَأنِ کارَه بوکوند؟ بیشید شیمی کارِ دونبال»
5
و بازم فرعون بوگوفت:«هَسَه کی شیمی نفرات زیادَ بوسته خَأئید جی کار کودَأن دس بِکِشید؟»
6
7
و هو روزِ دورون فرعون سرکارگران و قؤمِ ناظرانَ دستور بدَه و بوگوفت: «جی اَن پس سابقِ مَأنستَأن خِشت چَأکونی رِه، اَ قؤمَ کولوش فَأندید. بدَه خودشَأن بوشود و خوشَأنِ رِه کولوش جمعَ کوند،
8
و خِشتایی کی چَأکودد دِ تعداد هم نوَأستی کمَه بِه. معلومِه کی کار نَئرِد، هَنِه وَسیه کی اَشَأنِ سرَه بزَه دَأره و فریاد کوند و گوید خَأئیم بیشیم تا اَمی خدا رِه قربانی بوکونیم.
9
جوری اَشَأنِ جَه کار فَأکشید کی دِ وخت نوکوند کی اَجور چِرت و پرتِ گبَأنَ گوش بوکوند.»
10
سر کارگران و ناظران فرعونِ ورجَه بیرون بأمود و قؤمَ بوگوفتد:«فرعون فرمایه کی جی اَن پس خِشت چَأکونی رِه شمرَه کولوش فَأندم.
11
خودتَأن بیشید و جی هر جایی کی تَأنید کولوش جمعَ کونید و اونِ مرَه خِشت چَأکونید. شمرَم بوگوئیم کی تعدادِ خشتایی کی چَأکونیدم نوَأستی کمَه بِه.»
12
پس بنی اسرائیلِ قؤم مصرِ سرتاسرَ پخشَ بوستد تا بگردد و خیس و خال جمعَ کوند تا کلوشِ عوض اوشَأنِ اَمرَه خِشت چَأکوند.
13
سرکارگرانم اوشَأنَ فیشار اَوردد و گوفتد:«خودتانِ کارَه تومامَ کونید، و هیچی نِنید فردایی رِه، هر روزِ حیساب هو روزِ دورون وَأستی تومامَ بِه، سابقِ مَأنستَأن کی کولوش نَهَه بو.»
14
و فرعونِ ناظران سرکارگرانِ اسرائیلی یَ پَأیی زدِه و گوفتد:«چره شیمی خِشت چَأکونیَ سابقِ مَأنستَأن اَنجام ندید؟»
15
اونموقع سرکارگرانِ اسرائیلی بوشود فرعونِ ورجَه و اعتراض بوکودد و بوگوفتد:«چره شیمی بنده یانِ مرَه اَطو رفتار کونید؟
16
کولوش شیمی بنده یانَ فَأندد و گویِده؛ اَمرِه خِشت چَأکونید و انتظار دَأرد سابقِ مَأنستَأن اوشَأنِ رِه خِشت چَأکونیم، هَطو هَچین اَمرَه پَأیی زنده، در حالی کی تقصیر اَمی شین نییِه و شیمی قؤم مُقصرد.»
17
فرعون جواب بدَه:«بیکارید بیکار، شومَأن زیاد کار نَئرید، وگرنه نوگوفتید؛ وَئَأل خَأئیم بیشیم اَمی خدا رِه قربانی بوکونیم.
18
هَسَه وَأگردید شیمی کارِ سر، و هوطویی کی دستور بدَه بؤم بازم شمره کولوش فَأندد، ولی سابقِ مَأنستَأن هو تعداد وَأستی خِشت چَأکونید و تحویل بدید.»
19
سرکارگرانِ اسرائیلی وختی فرعونِ گبَأنَ بیشتَأوستد بفهمستد کی بد وضعی دورون گرفتارَ بوستد.
20
وختی اوشَأن فرعونِ قصرِ جَه بیرون اَمون دوبود موسی و هارونَ کی قصرِ بیرونِ اوشَأنِ رأفَا ایسَه بودَه بر بوخوردد.
21
پس او دو نفرَ بوگوفتد:«خداوند دینِه کی چی بوکودید و شمرَه مُجازات کونه، چون شومَأن اَمرَه فرعون و اونِ درباریانِ چومِ جَه تَأوَأدَه اید و باعیث بوبُستید اَمی جَه نفرت بدَأرد و اوشَأنِ دس بهانه فَأدَه اید تا اَمرَه بوکوشد.»
22
اونموقع موسی وَأگردست خدا ورجَه و بوگوفت:«خداوندا، چره خودتِ قؤمَ بدی کنی؟ و چی وَسی مرَه اَیَه اوسِه کودی؟
23
چون جی وختی اَیَ بأموم و بوشوم فرعونِ ورجَه و تی پیغامَ اونَ برسَأنِه دَأرم، فرعون اَ قؤمَ ظُلم کودَأن دِرِه، و تو هم هیچ کاری اَ قؤمِ آزادی رِه نوکونی.»