¹ پس سعی بوکونید خدا عزیزِ زأکأنِ مَأنستَأن بیبید و اونَ اِقتدا بوکونید. ² و محبتِ اَمرَه رفتار بوکونید هوطویی کی مسیح هم، اَمرَه مُحبت بوکود و اَمی وَسی خو جانَ ایتَه قربانی و هدیه خوشبو مَأنستَأن خدایَ تقدیم بوکود. ³ نوکونه شیمی میَأن جی زِناکاری و ناپاکی و طَمع حرفی به میَأن بأیه، چون اَجور حرفان مُقدسینِ رِه شایسته نییه. ⁴ حرفایِ زشت و بی معنی، چرت و پرتْ یا شوخیهایِ بی ادبی، اَشَأنم شمره شایسته نییه، بلکی در عوض وَأستی خدایَ شُکر بوکونید.5 ⁵ خاطرجمع بیبید کی هیچ زِناکار یا بی عفت یا طمع کارْ، کی خودش بُت پرستیه، خدا و مسیحِ ملکوتِ دورون هیچ سَهمی نَئره. ⁶ ممکنه بعضیان بخأید اَجور گوناهانِ اَنجام دَئَنِ رِه دلیل بأورد و بهانه ایی بتراشد، ولی اَجور آدمانِ گولَ نوخورید، چون هَجور کارانِ وَسیه کی خدا غضبْ گوناهکارانِ رو نازل بِه، ⁷ پس اَجور آدمانِ مرَه کاری ندَأرید و اوشَأنِ مرَه نشست و برخاست هم نوکونید. ⁸ شومَأن زمانی تاریکی بوئید! ولی هَسَه خداوندِ اتحادِ اَمرَه نورید. پس نورِ زأکأنِ مَأنستَأن رفتار بوکونید. ⁹ چون نورِ ثمره، هر جور خوبی کودَأنِ میَأن، عدالت و راستیه. ¹⁰ تحقیق بوکونید تا بفهمید کی چه چیزی خداوندَ خوش اَیه. ¹¹ تاریکی اَعمالِ بی ثمرِ دورون شریک نیبید، بلکی وَألید شیمی نورْ اوشَأنِ رو بتاوِه تا اوشَأنِ زشتی آشکارَ بِه. ¹² چون کارایی کی خدانَشناسان تاریکی دورون انجام دهد، زشته و آدمَ شرم گیره کی حتی دربارۀ اون کاران گب بزنه. ¹³ ولی وختی شیمی نور اوشَأنِ رو تاوِه، اوشَأنِ زشتی دیده بِه و متوجه بود کی چقدر اشتباه کودَأن درد، و امکان دَأره بعضی جی اوشَأن توبه بوکوند و نورِ زأکأن بوبود. ¹⁴ هَنه وَسیه کی خدا کلام فرمایه:«ای کی خوفته ایی، بیدارَ بون، مُرده یانِ جَه ویریز، کی مسیحِ نور تی رو تاوِه.» ¹⁵ خیلی مراقب بیبید کی چوطو رفتار کونید، پس نه جاهلانِ مَأنستَأن، بلکی عاقلانِ مَأنستَأن رفتار بوکونید. ¹⁶ فرصتَ غنیمت بدَأنید، چون بد روزگاری میَأن ایسَأئیم. ¹⁷ نادان نیبید، بلکی سعی بوکونید بفهمید خداوندِ اِراده چیسه. ¹⁸ شرابِ جَه مَستْ نیبید، چون مَستی شمرَه کارایِ زشتِ طرف فَأکشه، بلکی خدا روحِ جَه پورَه بید. ¹⁹ همدیگرِ اَمرَه دربارۀ خدا گب بزنید، و همدیگرِ رِه سرودهای پرستشی و مزامیرَ بخوانید. از تَه دیل خداوندِ رِه تازه سرود بگوئید و اونِ رِه آهنگ چَأکونید. ²⁰ همیشه و هر چیزِ وَسی، خدایِ پئرَ، به نام اَمی خداوند عیسی مسیح شُکر بوکونید. ²¹ به احترامِ مسیحْ، همدیگرِ جَه اطاعت بوکونید.