4
یگانگی مسیحِ بدنِ دورون
1
پس منی کی خداوندِ خدمت کودَأنِ وَسی اَیَ زندانِ دورون ایسَأم، شیمی جَه تمنا دَأرم جوری رفتار و زندگی بوکونید کی شایسته اون مقامی بیبه کی اونِ رِه دخَأده بوبُسته دَأرید.
2
فروتن و مهربان بیبید، همدیگرِ رِه صبر بدَأرید و مُحبتِ اَمرَه همدیگرَ تحمل بوکونید.
3
سعی بوکونید همیشه مُتفقاً روح القدسِ جَه هدایت بیبید، تا بتَأنید همیشه صلح و صفا میَأن بئسید.
4
چون ایتَه بدن و ایتَه روح وجود دَأره، هوطویی کی وختی دعوت بوبُستید هم، ایتَه اُمیدَ دعوت بوبُستید.
5
و ایتَه خداوند وجود دَأره و ایتَه ایمان و ایتَه تعمید
6
و ایتَه خدا کی همه تَه پئرْ و بوجُرتر جی همه یه، و همه تَه دورون کار کونه و همه تَه میَأنم ساکن بِه.
7
ولی هر کودامِ اَمَأنَ بر طبقِ مسیحِ بخششِ اندازه، فیضی عَطا بوبُسته.
8
هَنه وَسیه کی خدا کلام فرمایه:«وختی اون وَأگردست به آسمان، اِسارتَ به اَسیری بوبورد و مردمَ عَطایا ببخشه.»
9
وختی خدا کلامِ دورون بینیویشته بوبُسته «وَأگردست به آسمان»، منظور چیسه؟ جز اَنکی اول وَأستی جی آسمان نزول بوکوده به و بوشو اعماقِ زمینِ دورون؟
10
پس اون کسی کی بیجیر بأمو، هون کسی ایسه کی بوجُر بوشو، اون بوجُرتر جی همۀ آسمانان بوشو دَأره تا همه چیَه خو حضورِ جَه پورَه کونه.
11
و اونه کی ببخشه بعضیانَ به عنوانِ رسول، بعضیانَ به عنوانِ نَبی، بعضیانَ به عنوانِ مُبشر، بعضیانَ به عنوانِ شَبان، و بعضیانَم به عنوانِ مُعلمْ،
12
تا مقدسینَ کارِ خدمتِ رِه آمادَه کوند، تا کلیسا پیشرفتَ باعث بوبود کی مسیحِ بدنه،
13
تا زمانی کی همه تَه ایتَه ایمانَ، و خدا پسرِ شناختَ دس پیدا کونیم و بالغ بیبیم، و مسیحِ کاملی و اونِ قامتِ بلندایَ فَأرسیم.
14
اونموقع دِ زَأکأنِ مَأنستَأن نیئیم تا هر موجی، اَمرَه هر طرفی کی بخَأیه بوبوره و تعالیمِ مُختلفِ بادْ، اَمرَه هر طرفی تَأوَأده، و آدمیانِ دَغَل بازی و نقشه هایی کی اَمی گمراهی رِه کشدِ مرَه حقیقتِ جَه دورَه بیم و هر لحظه اَمی ایمانِ میَأن تغییرِ عقیده بدیم.
15
بلکی راستی و حقیقتَ، مُحبتِ اَمرَه بوگوئیم و هر چیزِ دورون ترقی بوکونیم تا به اونِ حدْ کی سَر حیساب بِه فَأرسیم، یعنی تا مسیحِ اندازه رُشد بوکونیم.
16
اونْ همۀ بدنِ مَنشاءِ رُشده، بدنی که بواسطۀ مفاصل همدیگرِ اَمرَه پیوند بوبُسته و مُتصله، اَ بدنْ هر عضوِ عملِ وَسی رُشد کونه و خورَه مُحبتِ دورون بَنا کونه.
نورِ زَأکأنِ مَأنستَأن زندگی کودَأن
17
پس اَنَ گویم و خداوندِ طرفِ جَه تأکید کونم کی شیمی رفتار دِ نوَأستی اَقوامی مَأنستَأن بیبه کی خدا جَه دورد و خوشَأنِ ذهنِ خیالاتِ جَه پیروی کوند.
18
اوشَأنِ عقل و فکر تاریکْ و اوشانِ دیل سنگَ بوسته، و خوشأنِ نادانی وَسی، اون زندگانی ایی کی خدا بخشه جَه محرومَ بوسته دَأرد.
19
اوشَأن بی عقل بوبُستد، خوشَأنَ یکسره هرزگی دورون ولَ کوده دَأرد و هرجور کثافت کاری رِه حِرص زند.
20
ولی اَشأن چیزایی نییِه کی مسیح شمرَه یاد بده،
21
اگر واقعاً اونِ صدایَ بیشتَأوسته بید و مُطابِقِ هون حقیقتی کی عیسی دربارۀ خودش بوگوفته دَأره تعلیم بیگیفته بید.
22
شومَأن یاد بیگیفتید کی وَأستی اون رَوشی کی قبلاً اونِ اَمرَه زندگی کونیدِ جَه دس بکشید و عوضَ بید، و اون قدیمی آدمَ، اون آدمی کی شهواتِ فریبَ خورده و فاسدَه بوسته یَ خودتانِ جَه بیرونَ کونید.
23
تا شیمی طرزِ فکر کاملاً نو بیبه.
24
و اون آدمِ تازه ایی کی به خدا شباهت، و عدالت و قدوسیتِ دورون خَلق بوبُسته یَ دوکونید.
25
پس دِ به هیچ عنوان دوروغ نوگوئید، بلکی هر کس همیشه راست بوگویه، چون اَمَأن همدیگرِ اَعضائیم.
26
اگر عصبانی بوبُستید وَأنألید گوناهی شیمی جَه سر بزنه، و قبلِ غروبْ خشمَ خودتانِ جَه دورَ کونید.
27
ابلیسَ فرصت ندید.
28
دوزد دِ دوزدی نوکونه، و در عوض بیشه کارِ سر و خو دسانِ اَمرَه زحمت بکشه تا چیزی بدَأره کی مُحتاجانَ کمک بوکونه.
29
هیچموقع حرفایِ زشت شیمی دهنِ جَه بیرون نَأیه، بلکی شیمی گبان جوری بیبه کی دیگران بَنا بوبود و اوشَأنِ رِه بدرد بوخوره و اوشَأنَ خیر و برکت برسَأنه.
30
روح القدسَ ناراحتَ نوکونید، چون خدا اونِ اَمرَه شیمی رو مُهر بزَه دَأره و شمرَه آماده کوده روزِ رستگاری رِه کی کاملاً آزادَ بید.
31
هر جور بُغض، غِیظ، عصبانیت، داد و فریاد، فُحشْ و ناسزا و هرجور نفرتَ خودتانِ جَه دورَه کونید.
32
در عوضْ همدیگرِ اَمرَه مهربان بیبید و همدیگرِ رِه دیل بوسوجَأنید، همدیگرَ ببخشید، هوطویی کی خدا شمرَه مسیحِ وَسی ببخشه.