3
پولس، غیرِیهودیانِ واعظ
1
هَنه وَسی من پولسْ، مسیحِ عیسی اَسیرْ، شومَأن غیرِیهودیانِ وَسی... (پولس خو گبَ اِدامه نده)
2
حتماً خبر دَأرید دربارۀ اون فیضی کی خدا شیمی وَسی مرَه ببخشه دَأره.
3
می منظور اون رازی ایسه کی جی راهِ مکاشفه، خدا مرَه آشکارَ کود و پیشترانِ رِه می نامه یانِ دورون ایبچه شمرَه بینیویشته دَأرم.
4
و اوشَأنِ خواندنِ مرَه تَأنید می درکَ مسیحِ رازِ جَه بفهمید.
5
قدیمانِ رِه خدا اَ رازَ آدمیانِ رِه آشکار نوکوده بو، ولی هَسَه بواسطۀ روحْ، خو رسولان و اَنبیاءِ رِه آشکارَ کوده.
6
آن راز اَنه کی، غیرِیهودیانم بواسطۀ اِنجیل و اتحادِ مسیحِ اَمرَه، مسیح بدنِ میَأنْ، و میراثِ میَأن، و خدا وعده یانِ دریافت کودَأنِ میَأن، شریکد.
7
من اون فیضی وَسی کی مرَه عَطا بوبُست و اونِ قدرتِ عمل کودَأنِ وَسی، اَ اِنجیلِ خادم بوبُستم.
8
هر چند مسیحیانِ کوچی ترینِ جَه هم کوچی ترم، ولی اَ فیض مرَه عَطا بوبُست کی غیرِیهودیانَ اَ پیغامَ برسَأنم کی مسیح اتحادِ اَمرَه ایتَه ثروتِ عظیم جی اَلطافِ الهی اوشَأنِ نصیب بِهِه.
9
و همه تَه نِ رِه روشنَ کونم کی خدا نقشه چی بو، خدایی کی همه چیَه بواسطۀ عیسی مسیح خلق بوکود و اَن نقشه، رازی مَأنستَأن همۀ دورانِ قدیمِ دورون اونِ ورجَه محفوظ بو.
10
تا هَسَه وختی خدا زَأکأن کلیسا دورون مُتحد بهد، همۀ فرمانروایان و قدرتهایی کی آسمانِ میَأن حاکمد، اونِ حکمتَ بشناسد، و خدا نقشه بواسطۀ کلیسا اوشَأنِ رِه آشکارَه بِه.
11
اَن دوروست هون نقشه ایی ایسه کی خدا جی اَزل درنظر دَأشته تا بواسطۀ عیسی مسیح عملی بوکونه.
12
تا اونِ مُتحد بوستَأنِ اَمرَه، و اون ایمانی وَسی کی مسیحَ دَأریم، بتَأنیم بدونِ ترس و آزادانه بیشیم خدا حضور.
13
پس شیمی جَه تمنا دَأرم رَنج و زحمتی کی اَیَ شیمی وَسی کشمِ وَسی دیلسرد و مأیوس نیبید، چون اَشأن وَأستی شمره مایه افتخار بیبه.
دعا ایماندارنِ شهرِ اَفِسُسِ رِه
14
پس من اون پئری جولو زانو زنم کی
15
هر خانواده آسمانِ میَأن، یا زمینِ رو خو نامَ اونِ جَه بیگیفته.
16
من اونِ جَه خَأیم کی خو جلالِ گنجانِ جَه شمرَه ببخشه تا بواسطۀ اونِ روحْ، شیمی باطنْ قَوی و قدرتمند بیبه.
17
تا مسیحْ بواسطۀ اون ایمانی کی اونَ دَأرید، شیمی دیلانِ میَأن ساکن بیبه، و مُحبتِ میَأن ریشه بودووَأنید و اُستوار بیبید.
18
تا توان پیدا کونید کی باقی مُقدسینِ اَمرَه، مسیحِ مُحبتِ طول و عَرضَ، و اونِ عُمق و بُلندایَ درک بوکونید.
19
و بتَأنید اون مُحبتی کی ویشتر جی انسانِ درکه بشناسید، و بتَأنید خدا همۀ کمالاتِ جَه پورَه بید.
20
جلال بر خدا کی قادره بواسطۀ اون قدرتی کی اَمی دورون کار کونه، بینهایت ویشتر جی اونچیزی کی بخَأئیم یا تصور بوکونیم عمل بوکونه.
21
اونَ کلیسا دورون، و مسیحِ عیسی دورون، نسل در نسل، تا اَبدالاباد جلال باد، آمین.