1
شومَأن شیمی گوناهان و تقصیراتِ وَسی بمرده بید،
2
اونموقعی کی اَ دونیا راه هایِ کجِ میَأن قدم زَئید، و اَ دونیا رَوشانِ جَه و نیروهایِ پلیدِ رئیسْ، یعنی شیطانِ جَه پیروی کودید، هون روحی جَه کی هَسَه اَفرادِ شرور و گوناهکارِ دورون عمل کودَأن دره.
3
اَمَأنم همه تَه ایته زمانی اوشَأنِ مَأنستَأن بوئیم و اَمی جسمِ شَهوتانِ جَه پیروی کودیم و جسمِ هَوَسان و اَفکارَ بجا اَوردیم، و اَمَأنم دیگرانِ مَأنستَأن اَمی طبیعتِ وَسی سزاوارِ خدا خشم و غضب بوئیم.
4
ولی خدا کی رَحمت کودَأنِ میَأن ثروتمنده، خو محبتِ عظیمه وَسی،
5
حتی اون زمانی کی اَمی نافرمانی یانِ میَأن بمرده بوئیم، اَمرَه مسیحِ اَمرَه زندَه کود، پس جی راهِ فیضْ نجات پیدا کوده دَأرید.
6
بله، خدا اَمرَه مسیح مرَه ویریزَأنه و قلمرویه آسمانی میَأن، مسیحِ عیسی اَمرَه بینیشَأنه.
7
تا عالمِ آینده دورون خو فیضِ بی نهایت و بی همتایَ نشان بده، و اون لطفی کی بواسطۀ مسیحِ عیسی در حقِ اَمَأن بوکوده یَ آشکارَ کونه.
8
چون فیضِ وَسی و جی راهِ ایمان نجات پیدا کوده دَأرید، و اَن شیمی کار نییِه، بلکی خدا بخششه،
9
اَن نجاتْ شیمی اَعمالِ جَه نییه، تا هیچکس خورَه افتخار نوکونه.
10
چون اَمَأن اونِ دسِ چَأکوده ایم، و اون مسیحِ عیسی دورون اَمرَه ایتَه زندگی جدید فَأدَه دَأره تا کارایِ نیکو انجام بدیم، کارایی کی خدا جی پیشتران مُقدر بوکوده بو تا اَنجام بدیم.
مسیحِ اتحاد و یگانگی
11
جی خاطر نوبورید شومَأن غیرِیهودی بودونیا بأموئید و زمانی بُت پرست بوئید و یهودیان شمرَه کافر و نجس دخَأدد، ولی خودشانِ دیلم ناپاک بو، با اَنکی همۀ مراسمِ مذهبی هم بجا اَوردد و ختنه هم بوبُسته بود.
12
او زمان، شومَأن کاملاً مسیحِ جَه سیوا زندگی کودید و جُزِ خدا قؤمْ یعنی اسرائیلِ خاندان به حساب نأموئید، و هیچکودام جی خدا وعده یانْ کی اُمیدبخشه شیمی شامل نوبوسته. اَ دونیا میَأن شومَأن بی خدا و بی اُمید بوئید.
13
ولی هَسَه مسیحِ عیسی اتحادِ اَمرَه، شومَأنی کی زمانی خدا جَه دور بوئید، بواسطۀ مسیحِ خون نزدیک بأورده بوبُستید.
14
چون مسیحْ اَمی صُلح و سلامتی پیونده، اون خودش اَمَأن یهودیانَ شومَأن غیرِیهودیانِ مرَه آشتی بدَه و حَصاری کی جودایی تَأوَأده یه و اَمی میَأن نَهه بویَ جی میَأن اوسَأد.
15
یهودِ شریعت، یهودیانِ جَه طرفداری کوده و غیرِیهودیانَ قبول نَأشته، و اَن اَمی میَأن کینه و دوشمنی یَ باعث بوبُسته بو، ولی مسیح خو کارِ اَمرَه اَ دوشمنی یَ جی میَأن اوسَأد، چون اون خو جانَ فدا بوکود تا اَن محدودیتهایی کی یهودِ شریعت بوجود بأورده بویَ خاتمه بده. و هَسَه اَمرَه کی پیشترانِ رِه همدیگرِ اَمرَه دوشمن بوئیمَ پیوند بزَه و جُزئی جی خودشِ بدن بوکود، اون ایتَه انسانیت تازه بوجود بأورد و صلح و سلامتی یَ برقرار بوکود،
16
تا هر دو تَه گروهَ ایتَه بدنِ میَأن خدا مرَه آشتی بده، بواسطۀ خو صلیب کی دوشمنی یَ اونِ رو بوکوشت.
17
اون بأمو و صُلحِ بشارتَ، هم شمرَه کی دور بوئید، و هم اوشَأنی کی نزدیک بودَه برسَأنه.
18
چون بواسطۀ اونْ، اَمَأن هر دو تَه گروه بواسطۀ ایتَه روحْ، یعنی روح القدسْ، تَأنیم بیشیم پئرِ حضور.
19
پس دِ نه بیگانه و اَجنبی، بلکی خدا مُقدسینِ مرَه هَموَطنْ، و باقی ایماندارانِ مرَه خدا اَهلِ بیت اید.
20
شومَأن ساختمانی یَ تعلق دَأرید کی اونِ زیربنا رسولان و اَنبیاء ید، و عیسی مسیح خودشْ، اونْ ساختمانِ اَصلی سنگه.
21
اونِ اتحادِ اَمرَه اَ ساختمان بهم پیوند خوره و رُشد کونه و خداوندِ مُقدسِ مَعبدَ چَأکونه.
22
و شومَأنم اونِ اِتحادِ اَمرَه همدیگرَ بَنا کونید تا ایتَه خانه شبیه بیبید، خانه ایی کی خدا بواسطۀ خو روحْ اونِ دورون ساکن بِه.