1
1
پولسِ طرفِ جَه کی به خواستِ خدا، مسیحِ عیسایِ رسوله،
به مُقدسینی کی شهرِ اَفِسُسِ میَأن زندگی کوند و ایماندارانی کی مسیحِ عیسی یَ وفادارد.
2
فیض و سلامتی اَمی پئر خدا، و اَمی خداوند عیسی مسیحِ طرفِ جَه، بر شومَأن.
برکاتِ روحانی مسیحِ دورون
3
مُتبارک بیبه خدا، و اَمی خداوند عیسی مسیح پئر، کی اَمرَه همۀ برکاتِ روحانی جَه بهره مند بوکوده، چونکی مسیحِ شینیم.
4
خدا پیشتر جی اونی کی جهانَ خلق بوکونه خو محبتِ وَسی اَمرَه انتخاب بوکود تا مسیحِ فداکاری مرَه اونِ حضورِ جَه مُقدس و بی عیب بیبیم.
5
خدا خو اِرادۀ نیکو وَسی، اَطو صلاح بیده و اَمرَه جی پیشتران تعیین بوکود کی بواسطۀ عیسی مسیحْ اونِ پسرخوانده بیبیم.
6
پس خدایَ ستایش کونیم کی تا اَ حد اَمرَه دوس دَأشته و اَمرَه فیض عطا بوکوده، فیضی کی بواسطۀ اون مَحبوبْ، کاملاً رایگان اَمرَه ببخشه دَأره.
7
اونِ مُتحد بوستَأنِ اَمرَه و بواسطۀ اونِ خونْ اَمَأن آزادَ بوستیم، کی هونْ آمرزشِ گوناهان حساب بِه کی اونَ خو فیضِ بی حد و اندازه
8
وَسی، حکمت و فهمِ کاملِ اَمرَه به فراوانی اَمرَه ببخشه دَأره.
9
خدا خو اِراده و نقشه یَ اَمرَه آشکارَ کود. نقشه ایی کی خو لطفِ وَسی پیشترانِ رِه طرح بوکوده بو، اون اَ کارَ بوکود تا اَمَأنم بفهمیم کی اون چی وَسی مسیحَ اوسه کوده جهانِ میَأن.
10
خدا قصد اَن بو کی وختی اون زمانِ مُعیَن فَأرسه، همه چیَه، چی آسمانِ میَأن چی زمینِ رو، همه یَ اینفرِ تحتِ فرمان جمعَ کونه، یعنی مسیحِ تحتِ فرمان.
11
خدایی کی همه چیَه بر طبقِ خو اِراده و نقشه انجام دِهه، اَمرَه جی هون اَزل بر طبقِ خو اِراده انتخاب بوکود کی اونِ شین بیبیم.
12
تا اَمَأن کی اولین کسانی بوئیم کی مسیحَ اُمید دوَستیم، اونَ، اونِ جلالِ وَسی ستایش بوکونیم.
13
و شومَأنم وختی کلامِ حقیقتْ، یعنی خودتانِ نجاتِ بشارتَ بیشتَأوستید و اونَ ایمان بأوردید، اونِ اَمرَه مُتحد بوبُستید، و خدا هم روح القدسِ موعودِ اَمرَه شمرَه مُهر بوکود،
14
روح القدسی کی اَمی میراث بیعانه یه، و اوشَأنی کی خدا شیندِ رِه تضمینی ایسه آزادی رِه، تا خدا جلال و شکوهْ، ستایش بیبه.
شکرگزاری و دوعا
15
هَنه وَسی من جی اون وختی کی شیمی ایمان به خداوند عیسی مسیح خبرَ بیشتَأوستم، و مُحبتی کی ایماندارانَ دَأریدْ،
16
هَطو یکسره خدایَ شیمی وجودِ وَسی شُکر کودَأن درم، و همیشه شمرَه می دوعایانِ دورون به یاد اَورم،
17
و اَمی خداوندْ عیسی مسیحِ خدا جَه، اون پئرِ پورجلالِ جَه، خَأیم کی حِکمت و روحِ مکاشفه یَ خودشِ شناختِ وَسی شمرَه عَطا بوکونه،
18
تا شیمی دیلِ چومَأنْ روشنَ بِه و اون اُمیدی کی خدا شمرَه اونِ رِه دخَأده دَأره یَ بشناسید، و هَطو بتَأنید درک بوکونید و بفهمید حقیقتِ اون میراثی کی خدا خو مؤمنینِ رِه تدارک بیده دَأره یَ، کی چقدر اَرزشمند و پورشکوهه.
19
و بدَأنید اونِ قدرتْ اَمَأن مؤمنینِ کمک کودَأنِ رِه بینهایت عظیمه. اَن قدرتْ، هون قدرتی ایسه کی
20
خدا اونَ مسیحِ رِه بکار بیگیفت و اونَ مُرده یانِ جَه ویریزَأنی و خو دسِ راستِ طرفْ، مقامِ آسمانی میَأن بینیشَأنی.
21
بوجُرتر جی هر ریاست و قدرت و قوّت و سلطنت و هر نامی کی چی هَسَه و چی در آینده ممکنه کسی شین بیبه.
22
و همه چیَه اونِ پا جیر بنَه، و مُقرر بوکود کی اون کلیسا رئیسْ و کلیسا سَر بیبه،
23
کلیسایی کی اونِ بدنه، و اونْ، اونَ خو حیات و وجودِ جَه لبریز کونه. اون همه چیَه در همه جا، خو حضورِ جَه پورَه کونه.