17
Apiau'acja temma Babilonia acuesai'a nqueluana alanactema
1
Jetetes co'o lhta lhema apjapac Enenlhet Neten apqueniem'o apiesecsec 7 Enenlhet Neten alhta apquetseianca lhta njan nojaicoc 7, asuetai'a lhta njan secjec anque lhta m'a, lhta aptac jeiano:
—Noc, atesquesec jata lheiap ngcowac jata nema aquiaqmoncasecja actemacja nqueluana alanactema acnema tacjalhet iemmen
.
2
Ngcangquesecje lhta aplhamacjo apqueluescai'e lhmangquec jam cacpota eltacnescasancoc caselha aquiocja alanemmalhca, ngcasecje lhta njan meliojo' mocjom Engiapom Neten, apqueltacnescaseianco lhta njan ma'a caselha aquiocja alanemmalhca—lhta ptac jeiano Enenlhet Neten.
3
Ngwet'a lhta ejaqtec aniem'o Engiapom Neten Apualhoc jeiantemacjo Enenlhet Neten aquieto m'a metquelha temma, asuet'o lhta m'a lhema nqueluana anantema caselha newjac acloma aquielhuasema,
7 lhta apqatco'oc, 7 lhta njan ngcapet'oc, ma lhta ntec alqasemmalhca aiempejec anmelhaicama Engiapom Neten.
4
Apielhuasema purpura alhta actalhnema nqueluana nac, annatanma lhtoca oro cacpota njan metaimong actec altacmanma nque anmennawe ngcoie', acsecama lhta njan amec nojaicoc oro aclanei'o vino, aquietquesammalhca coca m'a actacnescasecamo mota caselha aquiocja alanemmalhca, cacpota njan lhamacjo caselha alanai'a ngcolatsecama.
5
Nietne lhta actalhesammalhca acpaijacja na'at acuesai'a aquientalhnema aniojo, lhta ntac alqama jengque'e: —Co'o asto aquiau'acja temma Babilonia, ngcana'ac na ngqueluana'ac allanactema cacpota njan maniamolhma—lhta ntac actalhesammalhca acpaijacja na'at.
6
Anmen ato nque lhta ntac ngquelwana aniem'o aquiama ema apanco'oc apquellelto Engiapom Neten apquennemolhema, aptequioma lhta necsa apquelpaiescama apuesai'a Jesus.
Ntengcasque lhta co ewalhoc asuet'o m'a,
7
coca lhta ptac jeiano Enenlhet Neten:
—¿Se lha ntac acteiacmo nac apualhoc lheiap que? Colhua coca asmac'ac alpeiwescasecjac actemacja aquietquesammalhca ngquelwana nac, cacpota njan caselha newjac acloma anantema, 7 apqatco'oc cacpota njan 10 ngcapet'oc.
8
Ca caselha newjac anac acloma lhnac nanec lhennenga, colhua coca ngquetsepac, coca ngcotiepoc jata mocjom conne malhec metca actemo ngwaiam annelha, ngcoiaijama ta tacjalhet lhepop anac lhmangquec jam, ngcopalesenmac jata apualho'oc apqueluet'o ta apquellelto nac ngcolhnaicamoc apqueluesai'a waccajac aquiennactema ennengiec, lhennenga lhnac na nec aquietnemacja waccajac anac, amanie alanemmalhca lhnac na nec lhma nquec jam, coca ngcolhec jata actewasacjo mocjom ma'a caselha newjac anac acloma.
9
Ngcaimelhque ngcoitec nema apqueliamo enenlhet cacpota eliojoc aquietquesammalhca lhamacjo actemacja nac ma'a, ca 7 apqatco'oc anac ma'a aquietquesammalhca 7 lhienep acjaiam apquellawacja cacpota njan 7 apqueluescai'e ancoc, actemacja awesque ngquelwana nac apiesecsec ma'a.
10
Apqueletsepque lhta m'a 5 apqueluescai'e apquellawacja nac ma'a, colhua coca lhema apjapac apanquec apuesque nengwanlha nac, netamen jata m'a ewac po'oc apuesque, aquiacuatacjo nquec jatoca etnec apuesque m'a.
11
Netamen ngcowatac jata mocjom caselha newjac acloma lhnac nanec lhennenga tep, colhua coca nmasquengwacmo, coca ngcowatac jata mocjom ma'a, ngcotnec jata malha octavo awesque lhmanquec jam, nietnec acmowana malha 7 lhta apqueluescai'e, coca ngcolhec jata njan actewascasacjo m'a.
12
Ca 10 ngcapet'oc anac ma'a aquietquesammalhca 10 metnangco mocjom apqueluescai'e, etlhewancoc jata aptaicamoc apqueluescai'e acuacmo lhema alanei'o cnem, atlhelhma'ac coca caselha newjac acloma.
13
Netamen jata m'a ellancoc aquientalhnemo cacpota njan acmowana caselha newjac anac,
14
ngcolpasmecjac jata annapommalhca' Nepquesec Apquetcoc, coca coneng jata etnescasentac ma'a ncanec apto apuesque acnema apmopuana apanque, etnancoc jata njan apquetlhelhma'ac apquellelto lhta apquellawommap cacpota njan apqueliequiesammap, apquelleliejecjo mota m'a—lhta ptac jeiano Enenlhet Neten.
15
Netamen ma'a lhta ptac mocjom jeiano:
—Coca iemmen apuet'o lhquec acnema nqueluana m'a, coca aquietquesammalhca enenlhet'awoc lhmanquec jam, lhamacjo aptemacja apiempeioc, apquelpaqmeiasma njan,
16
coca 10 lhec ngcapet'oc, aquietquesammalhca 10 apqueluescai'e apquellelto ta apqueltacnoncama ngquelwana lhquec allanactema, eliengiecjac jata njan alhnai'o ncoie', ngcotawecjac jata apetec ancoc, ngconietec jata njan ma'a.
17
Coca 10 lhec apqueluescai'e ellancoc jata aquientalhnemo caselha newjac lhec acloma, Engiapom Neten apcaianco m'a ncanec nietnengquec apenescamo ngcotnec apqueltacja ngcotnec ma'a.
18
Coca ngquelwana apuet'o lhquec aquietquesammalhca m'a apiau'acja temma, awesque njan tacjaplhet'oc apqueluescai'e nco'oc lhmangquec jam—lhta ptac jeiano Enenlhet Neten.