16 ¹ Asleng'o lhta njan nema aliatecama aquiennactema ngquec actepo m'a na temma apocquenammap, lhta ntac allano 7 Enelhet Neten lhec: —Enmeiacja ja'e, eliemasamoc jata nojaicoc lhec allaneianco Engiapom Neten aploma tacjalhet lhepop anac ma'a—lhna ntac nema aliatecama ² Ca apmeiacjo primer Enenlhet Neten ma'a, apianqueno nojaicoc tacjalhet lhepop lhmangquec jam, acuo'o lhta nja anmasca apiempeioc al'oc anmasca ncoie' tacjaplhet'oc apquellelto lhta nema allelqascama marca ancoc caselha newjac acloma, apquellelto njan apqueltacnescasecamoc aquiocja nema aquietquescamo caselha newjac anac ma'a. ³ Ca apmeiacjo lhta mocjom segundo Enenlhet Neten, apianqueno nojaicoc tacjalhet aquiau'acja aluata lhmangquec jam, ca actacjo lhta iemmen ema m'a, malha ema apancoc la apqueletsepma. Ca aletsepo lhta caselha alloma la nemmen. ⁴ Ca apmeiacjo lhta mocjom tercer Enenlhet Neten, apianqueno nojaicoc tacjalhet aluata' cacpota njan tacjalhet iemmen alenteiapmacja la nalhepop, ca altacjo lhta iemmen ema m'a. ⁵ Netamen asleng'o lhta njan apqueliatecama Enenlhet Neten lhec apto apientalhnemo tacjalhet'oc iemmen, lhta ptac: —Engiapom Neten, lheiap apto apiamolhma, apeiwomo njan ncanec apqueliecpelquec apquellanecamoc alhta ngcolatsecama enenlhet'awoc ma'a, ⁶ apquennapenque lhta apquennemolhema lheiap cacpota njan apquetsecama ania'a apancoc, colhua coca apqueliencasquec iemmen emma aniem'o lheiap, ncanec ngquellietawec ngcotnec apquellaniemjaicama m'a—lhta aptac Enenlhet Neten. ⁷ Asleng'o lhta co'o nema aliatecama actepo aluanlhenmalhquelha caselha, lhta ntac: —Apuesque Engiapom Neten, apto njan acnema apmopuana apanque', ietawec anquec aptacja nac lheiap apqueliecpelquemo enenlhet'awoc, lheiap apto njan apeiwomo panque'—lhta ntac nema aliatecama. ⁸ Ca apmeiacjo lhta mocjom cuarto Enenlhet Neten, apianqueno nojaicoc tacjalhet acnem, ca acno acmowana acnem cacpota ngcoluanlhec enenlhet'awoc lhmanquec jam. ⁹ Awanjec anque lhta apquenmeiasma aplhamacjo enenlhet'awoc, ngjeclhec coca mellaneicocja apualho'oc, mang na eltacnescaseiancoc apuesai'a Engiapom Neten apto aquietnema apmopuana tacjalhet'oc aquientalhnema lhquec, apqueltaqnewacque lhtoca mota apuesai'a m'a. ^{10 11} Ca apmeiacjo lhta mocjom quinto Enenlhet Neten, apianqueno nojaicoc tacjalhet caselha newjac acloma, apinactesque lhta lhma actemacja la awesque tacjaplhet'oc enenlhet'awoc ancoc, awanjec anque lhta njan apquenmenaicamoc apqueltaclhenco njan apmo'oc, awanjec anque lhta njan anmasca al'oc apanco'oc, ngjeclhec coca mellaneicocja apualho'oc, apnaqtewascama njan apuesai'a Engiapom neten. ¹² Ca apmeiacjo lhta mocjom sexto Enenlhet Neten, apianqueno nojaicoc tacjalhet aluata Eufrates, ca aquiemac'o iemmen ma'a, cacpota ntase ngcotnec eliec'a apqueluescaie apquelleniem'o co tep acnem cacpota elentelhec ennapacpoc. ¹³ Asuet'o lhta mocjom menasma aquiawai'a lhta, caselha newjac alhta acloma malha quemjawa' cacpota njan caselha newjac alhta acloma acnemo ngcapet'oc nepquesec apquenno, mo'oc nema altema njan secama ania'a mopuana ania'a, ngquelentepque lhta atno'oc mocjelhma nac ma'a casecapo au'alhoc malha napnecteng, ¹⁴ coca napneqteng anac ma'a allelto lhta queliacjameio' au'alhoc, nietne lhta anmowanca'a ngcollanangcoc caselha mongwetai'o, awanca'a lhta njan ngcollanquesecjac apqueluescai'e lhmangquec jam cacpota ngcotnec aquiawai'a apquennapommap Engiapom Neten apto acnema apmopuana apanque', acuo'o ta acnem apmajai'a eliecpelcoc enenlhet'awoc alhma nquec jam. ¹⁵ Lhta aptac apuesque engancoc Jesus: —Ngcotlapquesec jata awatac jam, malha acto nac enenlhet la apmenielhma, apquenmapseiwac'a ta enenlhet'awoc apquellelto apquelleljalhanma, apquelpenescamo njan apquellentalhnecja apquelentalhnema, cacpota metlhenge' apquelalhnai'o, menmangquec najan—lhta aptac Juan aplhenecjo apaioma Jesus. ¹⁶ Ngquellangquesacje lhta casecapoc au'alhoc apqueluescai'e lhmangquec jam aquieto m'a Harmagedon hebreo apaiwoma nema altema. ¹⁷ Ca apmeiacjo lhta mocjom septimo Enenlhet Neten, apianqueno nojaicoc neten, mpelapcasque lhta actepo nema aliatecama aquiennactema ngquec aquieto naqte' aptanema Engiapom Neten, lhta nta: —¡Mpenesalhqueje! —lhta ntac nema aliatecama. ¹⁸ Mpelapcasque lhta apquellelienmacmo, apquelelhtengioma, niewjema lhta njan lhepop ma'a, mangcolhno mota aquieujecama lhepop secje lhta. ¹⁹ Ngqueliapquesacje lhta 3 necja'ac apiau'acja temma Babilonia, apqueliaqnenque lhta njan lhamacjo temma mo'oc apquellawacja. Apiaqmoncasacjec actemacja apiau'acja temma Babilonia Engiapom Neten aniem'o njan ngquescama aploma. ²⁰ Ngquenmasquenwacme lhta lhamacjo lhepop aliaquienweiam cacpota njan lhienep acjaiam lhmangquec jam, ²¹ acpallacmo lhta njan ajecjo'oc alleniem'o neten, aliawai'a nquec ma'a, malha 40 kilos lhema aquiaquiema, netamen enenlhet'awoc apqueltacnewanca lhta apuesai'a Engiapom Neten aniem'o aquiawai'a aquientalhnema apiaqmoncasecja apqueltemacja meliamolhma.