18
Aptewasemmap apiau'acja temma Babilonia
1
Netamen asuet'o lhta mocjom lhema Enenlhet Neten acnema apmopuana apanque', apqueniem'o neten apuaiwantamo lhta nalhepop, ngcaponmatque lhta apiocja lhmanquec jam,
2
apiennacteso lhta njan apaioma, lhta ptac:
—Aptewasecpec apiau'acja temma Babilonia, aptacjec acjaiancolha queliaqjameioc, alielhanmomacja njan lhamacjo actemacja casecapoc au'alhoc ngcollatsecama, ntangcocjec na alhano'oc alhua'ac la'a caselha newjac alloma cacpota njan alhano'oc anata ngcollatsecama nquec.
3
Aptewasecpec apiau'acja temma Babilonia ncanec ngqueliatengquec apqueluescai'e cacpota njan enenlhet'awoc cacpota eltacnescasancoc caselha aquiocja alanemmalhca. Lhamacjo macatero aptanque ngquescama pataccon apanco'oc nganec ngquenme mota lhamacjo caselha ngcollatsecama mmac'acja la ngconmoc ma'a—lhta ptac apiennacteso apaioma Enenlhet Neten
4
Netamen asleng'o lhta mocjom nema aliatecama aniem'o neten, lhta ntac: —Elentep quetlhengcap asquennemolhema apiau'acja temma nac jam, melwanamongquec actemacja nac jam cacpota melluetiec apquellengaianco ngcowac jata jam.
5
Awanjec anque lhta alanai'a caselha ngcolatsecama, apiawe mota actemacja Engiapom Neten.
6
Eliaqmoncasecja ta njan janet aptaicocjo quetlhengcap aniem'o allanesquescama caselha ngcolatsecama, ngquelpenescasque lhta apienaicamoc acmasca ngcoie, ellancoc jata njan quetlhengcap janet actaiecjo aquiama m'a.
7
Awanjec anque lhta anmalhcojo, ngqueltawe lhta mota ngcollana acmac'acja la ngcolana, colhua coca quetlhengcap ellengasquesamoc jata aquiawai'a nquec ma'a cacpota ngcowene ngquescama nquec aniem'o acmasca.
Wanlha lhta mota aclheianma au'alhoc actema awesque tacjalhet actanema, metca njan aclengaianco ngcowac jata aquientalhnema cacpota njan metca actema lhentampe, lhta ntema mota alquetansema au'alhoc ma'a.
8
Coca ngcotlapquesc jata ngcowac aquiawai'a aquientalhnema, mec, aclengaianco, atsepma cacpota njan ngconietec jata aniem'o apiecpelquema actemacja ngcolatsecama Engiapom neten acto njan acselhnanemmalhca ngcoie'.
9
Netamen eluetac jata acmeta eten ancoc aplhamacjo apqueluescai'e apquellelto lhta apquelpasmecja apqueltacnescasecamoc caselha aquiocja alanemmalhca, apquelpasmecja njan altacmanma caselha ancoc, elleclhamong jata, eiapcalhec jata njan apquelietnai'o na'at ma'a,
10
coca meltetescamec jata njan ma'a aniem'o apquellai'a ngcolhec aliaqmoncasquesacjo njan apqueltemacja m'a, jata etnancoc na m'a:
—"¡Aiii, mamma ngcotnesquesec lheia' apiau'acja temma Babilonia, nietne lhta niecje acmowana, coca mpelapcasque acuet'o aquientalhnema jam"—jata etnancoc ma'a
11
Eliapqalhec, elleclhamong jata njan aplhamacjo macatero aliecpelquemelha la'a aniem'o apquelietnai'o na'at ma'a ncanec mangconmalhquec jata mocjom caselha apanco'oc apquelhaicamoc apquelletsecamaja,
12
ca ctonac oro, metaimong actec apmennawe ncoie', ietamopai'a lino apielhuasema purpura apmennawe panque, cacpota njan lhamacjo aptemacja iamet nacja'a anmases aimes, caselha alanemmalhca marfil, caselha alanemmalhca ancoc iamet necja'ac acmennawe, bronce, tawa apac cacpota njan marmol.
13
Cacpota njan apquelletsecama canela, panactema acmases aimes, aimenec acmases aimes, vino, aceite, alena nema actepelquema, trigo, cacpota njan apnaqtoscama acmowana ngcolpatmoc caselhaja, nepquesec, etanlheng, coleto, cacpota njan apqueletsoiam esclavo apanco'oc, lhamacjo caselha nac apquelhaicamoc
14
Jata etnancoc na ellanac apiau'acja temma:
—"Mamma colhua aquielhna acmases la anto'oc, mmasquenwacmec caselha anco'oc altacmanma acmennawe ngque lhta"— jata etnancoc ma'a.
15
Coca apquellelto altemesquescama ngquescama pataccom apanco'oc aniem'o anmama caselha apanco'oc Babilonia, mocjec jata etnancoc aniem'o apquellai'a actemacja nema aquiacmoncasecja aquientalhnema apiau'acja temma nac, eiapcalhec jata, elleclhamong najan,
16
jata etnancoc:
—"Aiii, lheia laie' apiau'acja temma, wanlha lhta mota actalhnecja ietamopai'a acmennawe panque lino, ietamopai'a apielhuasema cacpota njan purpura, annatanma mota oro, metiamong actec altacmanma cacpota njan perlas, wanlha lhta mota alentalhnecja atsecama apmennawe ncoie',
17
mpelapcasquec coca atsepanenwaiam ma'a"— jata etnancoc ma'a. Ellanama ta njan mocjec apquellelto apquenmacmecama nemmen, apuesque capitan, marinero,
18
actacja acmeta apiau'acja temma, eluenama ta m'a, jata etnancoc:
—Coca apiau'acja temma nac acto lhta niecje neten anquec apiaspommap melhnoc po'oc la temma— jata etnancoc ma'a.
19
Elelhpacjac jata lhepop actec apqatco'oc aniem'o anmaiosac'a apualho'oc, apquelleclhanwoma cacpota njan apqueluenema, jata etnancoc aquiennactema nquec:
— "Aiii, lheia la ie' apiau'acja temma, jengeltemesquescanque' nquescama patacom enganco'oc aniem'o anmama' caselha enganco'oc acnema nac loma nemmen enganco'oc, mpelapcasquec coca acno actewaso lheia"—jata etnancoc ma'a.
20
Colpaijecja apualho'oc apquellelto apcacjaicamoc neten ncanec aptewasecpec apiau'acja temma nac, colpaijecja njan apualho'oc apquellelto Engiapom Neten apquennemolhema, apostoles cacpota njan
apquetsecama ania'a ncanec Engiapom Neten apiaqmoncasacjec actemacja ngcolatsecama apiau'acja temma nac—lhta ntac nema aliatecama.
21
Netamen, asuet'o lhta mocjom po'oc Enenlhet Neten acnema apmopuana, apquenencasaje lhta neten lhema metaimong aquiawai'a aquiaquiema malha acto nac acteclheclhema trigo, ca apiengiantamo lhta tacjalhet aluata aquiau'acja iemmen, lhta ptac:
—Jata ngcotnec lheia apiau'acja temma Babilonia, nema aquiengienta coneng, ngcomasquenwomoc jata m'a.
22
Mangconnalhquec jata mocjom lheia annecmasemmalhca arpa, iompa'at cacpota njan trompetas aquieto amai au'alhoc, emasquenwomoc jata njan aquieto nac lheia apquellelto apquenmacmecama lhamacjo aptemacja, ngcomasquengwomoc jata njan aliepioma alteclheicamoc ngqueluana'ac,
23
ienactesalhma ta njan ngotnec aquieto nac lheia', ngcomasquengwomoc jata njan aclengammalhca aquiennoma lhma aliemjapacja la'a, enmasquenwomoc jata njan macatero apquellelto neten apancawec aquieto nac lheia, ngcomasquengwomoc jata njan lhamacjo caselha altacmanma nac ncanec hiciste brujeria/actema apiolhma aliatmecama , ngqueliennengcasquec lheia lhamacjo apquellawacja lhmangquec jam—lhta aptac Enenlhet Neten
24
Jai', jata ngcotnec ma'a apiau'acja temma ncanec nquennapme lhta apquelletsecama ania'a cacpota njan Engiapom Neten apquennemolhema, ngquennapmec na enenlhet'awoc lhamacjo apquellawacja lhmanquec jam.