12 ¹ Netamen asuet'o mocjom caselha mongwetai'o nquec neten, lhema nqueluana lhta m'a, ncaponmatque lhta malha lhta ntac acnem, cacpota njan coneng amancoc alteioiam pelten, nietne lhta actetema apqatec, 12 iau'a m'a. ² Nlose lhta m'a, quetse lhta ncaimelhca apteiam atca, ca aleclhanwo' lhta m'a. ³ Asuet'o mocjom caselha mongwetai'o nquec neten, lhema caselha neujac acloma aquielhuasema, malha menasma aquiawai'a la'a, 7 apqatcoc alhta ma'a, 7 njan acnactetemmalhca apqatcoc moclhem'a m'a, 10 na ngcapet'oc. ⁴ Mmacjesque lhta aipaquiec acpalesacmo lhema necja ¹ iau'a lhmanquec jam, ca netamen ma'a actetescacmo acnaja nqueluana lhquec cacpota ngcotwoc jata atca apteiacmo ta. ⁵ Ngwet'a lhta atca m'a apquennawo', etnec jata apuesque lhmangquec jam, ngcolhec jata apmopuana. Netamen acno lhta acuacmo nematca, nne lhta acsacjo napatec Engiapom Neten apno aptanema m'a. ⁶ Annio njan ngquelwana lhque aquieto m'a metquelha temma, Engiapom Neten alhta apenesquescamo m'a cacpota ngcolhec actacmelcaso m'a acuacmo 1.260 acnem. ^{7 8} Asuet'o lhta njan mocjom apquennapommap neten, apuesque enenlhet neten Miguel cacpota njan apquetlhelhma'ac apqueltemesquesacje lhta coneng menasma aquiawai'a cacpota njan aclhelhma'ac, nne lhta aso m'a ngcolhec neten menasma aquiawai'a, ⁹ nne lhta njan aquiengiantamo coneng aquieto tacjalhet lhepop, ca menasma nac aquiawai'a nquec, lhennenga tep nac nanec ma'a, acuesai'a njan queliacjameioc, mo'oc acuesai'a satanas, nema altema coca jenniennengquescama ngquen. ¹⁰ Asleng'o lhta njan nema aliatecama neten, lhta ntac: —Colhua coca nengelluetac nengelwoncasemmalhca tep, nietnec apmopuana Engiapom Neten etnec apuesque, nengwet'ac na apientalhnemo apto apcapascama lhta apuesai'a Cristo, ncanec nnec actepqueso neten queliacjameioc, acto lhta aclheianma apqueluesai'a meliamolhma engellialheng'a napaqtec Engiapom neten ma'a. ¹¹ Apqueleltemesquesaje lhta coneng ma'a queliacjameio' aniem'o apquetsepma lhta nepquesec apquetcoc, apquetlheianmo lhta njan apuesai'a ma'a metca apquellai'a etequio'oc quelha njan. ¹² Colpaijecja apualho'oc apquellelto apquelloma neten, coca quetlhengcap la ie' apquellelto nac apquelloma tacjalhet lhepop, ncanec ngwaiwantaniec queliacjameioc jam, mangcasac acnatjescama, niawec quetsec ngcaimelhca acnem ngcotwasalhcoc jata m'a—lhta ntac nema aliatecama m'a. ¹³ Netamen menasma aquiawai'a lhquec aquietnecta tacjalhet lhepop nema aquiengienta, niaqmasema lhta nqueluana acuetai'a lhta atca. ¹⁴ Nne lha allanco janet alhempancoc nqueluana malha acto nac mama' apuenactema, cacpota ngcomjangcoc mocjec anquec aquieto m'a metquelha temma, cacpota ngcolhec actacmelcaso m'a acuacmo 3 años y medio ^{15 16} Coca menasma nac aquiawai'a ntepcasque lhta iemmen atong, aquiawai'a malha aluata la'a cacpota ngcowaiwesangco niecje nqueluana, coca lhepop alhta njan mpasmac ma'a nqueluana nac, nmaija lhta acnacsepo iemmen ma'a. ¹⁷ Ma lhta ngcasac anquec acnatjescama menasma aquiawai'a m'a, mmeiacje lhta m'a cacpota ngconnapalhcac aplhamacja atcac netamen nqueluana, apquellelto apquelleliejecjo mota jenganemacja Engiapom Neten, apquellelto njan apquetlhenquescama apquetlheianma apuesai'a Jesucristo. ¹⁸