13 ¹ Asquenmama alhta necja iemmen aquiau'acja aluata', ntepque lhta nemmen mo'oc caselha newjac acloma mongwetai'o nque', 7 lhta apqatco'oc, moclhem'a lhta njan nietnac alelqama apnactewascama apuesai'a alammelhma Engiapom Neten, 10 alhta njan ngcapet'oc, moclhem'a lhta njan nietnac acnactetemmalhca corona m'a. ² Malha lhta quemjawa caselha newjac ma'a, amancoc alhtoca malha oso nac, atong alhtoca njan malha iama acmeiwa'. Menasma lhta aquiawai'a ngcangque lhta acmowana cacpota njan aquientalhnemo cacpota ngcotnec awesque m'a. ³ Awanjec anque lhta aquiensema lhema apqatec caselha newjac malha quemjawa', coca nne lhta actacmelcasquesacjo aquiensema m'a, ngquelpelapcasque lhta lhamacjo enenlhet apqueluet'o m'a, apquelieplacje lhta njan ma'a. ⁴ 4 Apqueltacnescasenque lhta enenlhet'awoc menasma aquiawai'a ncanec aianco acmowana m'a caselha newjac lhec malha quemjawa', apqueltacnescasenque lhta njan enenlhet'awoc ma'a caselha newjac anac, lhta aptancoc: —Awanjec anquec aquietnema acmowana caselha newjac anac, mamma njan awanco ngcammelhec— lhta aptancoc ma'a ⁵ Nne lhta njan ancojo ngcowannama aquiawai'a nquec Engiapom Neten apuesai'a, nne lhta njan anco aquientalhnemo acmac'acja la ngcolana acuacmo 42 pelten. ⁶ Ngqueliatacque lhta m'a anmelho acpaioma Engiapom Neten, cacpota njan apnemacja acpocquenammalhca, ngqueliatacque lhta njan aclheno apquellelto apcacjaicamoc ma'a neten. ⁷ Nne lhta njan ancojo cacpota ngconnapalhcac apquennemolhema Engiapom Neten acuacmo njan altemesquesacjo coneng, nne lhta njan ancojo ngcotnec aquientalhnemo tacjaplhet'oc lhamacjo aptemacja apiempeioc enenlhet'awoc lhmanquec jam, lhamacjo actemacja apquelpaqmeiasma njan. ⁸ Eltacnescasancoc jata njan aplhamacjo enenlhet'awoc lhmangquec jam, apquellelto mangcolhnaicamoc la apqueluesai'a waccajac aquiennactema ennengiec aquietnemo lhnac nanec tep nac nanec, ca waccajac anac apto apancoc nepquesec apquetcoc apto lhta apmatnama. ⁹ Eltacmelcaso no apquellailhemo cacpota eliojo', ¹⁰ moclhem'a ta ngcolhec aliantemacjo mo'oc apquellawacja apquenmammap alietelha ta, jai', ngcolhec jata aliantemacjo m'a, moclhem'a ta njan etequio'oc pelletaw acuenactema alietelha ta, jai', ngcolhec jata njan annapaqjo m'a, netamen eluetacpoc jata enenlhet'awoc apquellelto la jawe ngiapac anque Engiapom Neten apquetcac, metca njan apqueluatesaicamoc meliasqueiam. ¹² Nietne lhta acmowana, aniem'o lhta njan acmowana caselha newjac malha quemjawa' lhquec, ngquelleltawe lhta lhamacjo enenlhet'awoc eltacnescasancoc ma'a acuesai'a caselha neujac malha quemjawa' nac, acto lhta njan nema actacmelquescaiam aquiensema aquiawai'a lhema apqatec ma'a. ^{13 14} Ngquelana lhta njan aquiawai'a caselha mongwetai'o acnema lhque janet ngcapet'oc, acmowana ngcopalesenmac talha neten napaqtawec enenlhet'awoc, naqtec na awesque caselha newjac malha quemjawa lhquec, ngqueliennengcasema lhta njan enenlhet'awoc cacpota ellanancoc aquiocja ma'a apquelietquescamo malha lhquec quemjawa', acto lhta aquiensema lhema apqatec aniem'o pelletaw acuenactema, coca ntacmalueiacme lhta njan ma'a. ¹⁵ Apquellanenque lhta enenlhet'awoc aquiocja m'a apquelietquescamo caselha newjac malha quemjawa' lhquec, netamen acuo'o lhta caselha neujac janet ngcapet'oc lhec, ngwatepnapua lhta m'a aquiocja apquellanecamoc lhec cacpota ngcoitec acmowana m'a, ca aliatenca lhta m'a aquiocja nac apquellanecamoc, acmac'o lhta ngconnapoc mellelto la apqueltacnescasecamoc enenlhet'awoc acuesai'a m'a. ¹⁶ Nquelleltawe lhta ngconactalhacsec mongenatquescama marca alqama ancoc aquieto aquiennacja apmec nlho ca la paijacja napa'at, nematcac, apquelliawo', nema apquelletsecama, metca apquelletsecama, esclavos cacpota njna metno esclavos, aplhamacjo apanque' enenlhet'awoc lhmangquec jam. ¹⁷ Mangcollapuangque lhta enmancoc caselha cacpota njan metlhangquec apanco'oc la'a apquellelto metco la mongenatquescama alqama, nlho ca acuesai'a caselha newjac malha quemjawa lhquec. ¹⁸ Ca alqama lhta ancoc caselha newjac 666, coca alqama nac aniem'o m'a enenlhet, ngcaimelhquec ngcoitec nema nengiamo enganquec cacpota aniojoc ma'a aquietquesammalhca alqama nac.