11 ¹ Netamen cno jeiangco lhema alietquesammalhca iamet atcoc, lhta ntac jeiano: —Eniacja elietquescacja ta Engiapom neten apnemacja cacpota njan aluanlhenmalhquelha nac caselha, elietsec jata njan enenlhet'awoc apqueltacnescasenco nac Engiapom Neten ma'a. ² Coca melietquesangquec au'jac pa'at anac ma'a, coca etnancoc jata apanco'oc metno judios ma'a, etnancoc jata apqueluescai'e aquiennactema nquec tacjalhet Jerusalen acuacmo 3 años y medio. ³ Coca alapacsec jata apqanet apquetsecama ania'a m'a etlhenec jata asuesai'a acuacmo 3 años y medio, ncanec jeliecpelcawec co m'a. Elentalhnecjac jata mota apquelentalhnema apqueltaclhema nac engiempejec—lhta nna cto jeiano nema aliatecama. ⁴ Ca apquetsecama ania'a nac malha janet iamet olivos, malha njan janet nemacja acjescamacja nema alaponmatquescama ¹ , apcacjanque mota napaqtec apto apuesque lhepop lhmangquec jam. ⁵ Apmac'o la ngcolhec acnactewaso m'a apquetsecama ania'a nac, apatno'oc jata ngcolentepoc talha m'a cacpota elanmelhec apquellammelhma la'a acuacmo apquelletsepo. ⁶ Apuanca'ac na menmamacsec ma'a necsa apquetlheianma apuesai'a Engiapom Neten, apuanca'ac na eltemescasecjac iemmen ema' cacpota njan eluescac lhamacjo aptemacja aquellengaianco apquenmac'acja la njan eltejec. ⁷ Jata apquelpeneso ta apquelpaiescama aptemacja Engiapom Neten ma'a, ngcotiepo ta lhema caselha conne malhec ngcotnengwaiam annelha, ngconnapalhcata apqanet anac apquetsecama ania'a, ngoltemescasecjac jata coneng, ngconnapoc jata njan. ⁸ Ngcolhnancoc jata apjapawoc amai apiesecsec temma apiau'acja, ca aquietemelha lhta njan apquelhnammacpelha neten iamet actennescama apuesque engancoc ma'a, apqueltemesquescamacja lhta njan temma nac acuesai'a malha Sodoma, Egipto. ⁹ 3 acnem jata ngcotnec apnaicamoc apjapawoc apquelletsecama ania'a m'a, tres dia y medio ta ngcotnec eluo'oc amaica'a apqueltenenwai'o m'a apquelleniem'o lhman quec jam, mangcolhec jata njan alleltemo elcatonnancoc apjapawoc ma'a. ¹⁰ Lhamacjo enenlhet'awoc jata ngcolpaijecjac apualho'oc aniem'o m'a apquelletsepma apcanet anac apquetsecama ania'a aniem'o njan apqueliasecamo lhma apquennawescama apquellanecamoc meliamolhma, aquiawai'a actacmelaicama lhma ta njan ellanancoc ma'a, metca aquianmoma ta njan ellancoc po'oc caselha apanco'oc. ¹¹ Netamen asuet'o lhta njan aquieco tres dias y medio, ca apqueltemescasacjo lhta mocjom apjalhnancoc Engiapom Neten apquetsecama ania'a lhta, awanjec anque lhta apquellai'a apquellelto apqueluetai'a m'a. ¹² Netamen actepo neten nema allawecama apquetsecama ania'a nac, ca apquenmeiacjo lhta neten aquieplomo iepjopai'a aliantemecja m'a, apqueluet'a lhta lhamacjo apquellelto apquellammelhmacja m'a. ¹³ Mpelacasque lhta aquieujenca lhepop aquiawai'a, nsaujelhcawe lhta aliaqmeno decima parte pa'at aliawai'a apiau'acja temma nac, apqueletsepque lhta 7.000 enenlhet'awoc, coca apquellelto lhta meletsepma, colhuawe lhta apqueltacnescasencoc Engiapom Neten aniem'o apquellai'a. ¹⁴ Colhua ngquelieca'ac janet aquientalhnema, colhuawec jata ngcowac mocjom mo'oc. ¹⁵ Netamen apaiwaso mocjom trompeta septimo enenlhet neten, ca asleng'o nema aliatecama aquiennactema nquec neten, lhta ntac: —Colhuawe nac lhmangque jam aptanquec apqueluescai'e Engiapom Neten cacpota njan apto apcapasammap apuesai'a Cristo, mangcotnengwomec jata mota nnelha aptaicamoc apqueluescaie— lhta ntac nema aliatecama. ¹⁶ Apquelleljalhantanie lhta njan acuacmo apquellelteclhei'o napaqta'a lhepop 24 metno apquetcoc alhta, napaqtec Engiapom Neten aptanema, apqueltacnescasenco njan, ¹⁷ lhta aptancoc: —Nentangquec ennenco'o gracias lheiap Engiapom Neten apuesque engancoc, apto njan aquietnema aquiawai'a apmopuana, lheiap na apto mangcotnengwaiam annelha apcaniemjaicama, colhua coca aptac apuesque lheiap lhma ngquec jam aquieplomo apmopuana. ¹⁸ Awanjec apquelloma enenlhet'awoc meliamolhma ncanec ngwa'ac lheiap apiaqmoncasecja apqueltemacja meliamolhma, eliecpelcoc jata njan apquellelto lhta apqueletsepma, ellancoc jata njan aquiacmoiecja apquellelto lhta apquellasennaicama apquetsecama ania'a apancoc, ellancoc jata njan aquiacmoiecja apquellelto apquennemolhema, apquellelto njan apquellai'o apuesai'a, nlho ca la njan apquelientalhnemo, melientalhnemo njan, ncolhoc jata mo'oc apquellaicamoc aquiacmoiecja m'a. Coca enaqtewacsec jata lheiap apquellelto nac apnactewascama tacjalhet lhepop—lhta aptancoc apquellano metno apquetcoc Engiapom Neten. ¹⁹ Asuet'a lhta njan ma'a neten atong nema acmaisecja Engiapom Neten apnemacja, nietne lhta m'a conne iamet aisecsec, acnaiancolha waccajac jenganemacja Moises. Mpelapcasque lhta apquelienmacmo m'a, apquelelhtengioma, aquieujecama lhepop cacpota njan aliawai'a ajecjoc.