14
1
Apqueluaiacmec nac Pablo cacpota njan Bernabe aquieto Iconio, apquelentalhnenwaiacmo lhnac apcacnecjelha judios, ca apquetlhecmoseianco lhnac ania'a actacmanma m'a. Man nantec judios cacpota njan metno judios man nac eliasqueiacmoc ania'a nac.
2
Coca moclhem'a judios apqueliasqueiacmec nac ma'a, ca apquellauquescamo lhnac na moclhem'a metno judios ma'a cacpota ellammelhecjac Pablo cacpota njan Bernabe
3
Coca njeclhec nac apcacjaicamoc Pablo ca njan Bernabe m'a aquieto Iconio, apqueleltennaseianca lhnac na ania'a jengamelaiam Engiapom neten enenlhet'awoc ma'a metca apquellai'a, ncanec apquelliamawec nac Engiapom Neten apto apqueltacmelquescama m'a. Apquellaianquec nac na m'a apquenmopuanca'a cacpota ellanancoc caselha monwetai'o aniem'o neten cacpota njan caselha jempelapquescama.
4
Coca enenlhet'awoc anac ma'a apquelhpanquesammacpec nac ma'a napocja lhnac apquelieplomac apquelemjama apmaniaie judios cacpota njan napocja apostoles
.
5
Ca netamen ma'a apiepetquecjo lhnac mocjom po'oc moclhem'a judios, metno judios cacpota njan apquelemjama apmaniaie apqueleltemo enaqtewacsec Pablo cacpota njan Bernabe, eliaqnancoc na metaimong, cacpota ennapoc ma'a.
6
Apquelliamawec noca apostoles ma'a, apquengiaianco apquenmeiecjo na temma Listra cacpota njan Derbe, aquieto conne iocjalhma Licaonia, lhamacjo apnacja la temma m'a,
7
ca apquetlheianweiacmo lhnac na ania'a actacmanma apqueluaianlha la'a.
Nema aliaqnai'a metaimong Pablo aquieto Listra
8
Apnenquec nac nalhepop lhema enenlhet apteiaianlha secja lhnac metca aptapno'oc aquieto Listra,
9
apcailheiancawec nac apquetlhecmoscama Pablo m'a, ca apqueltamescamo lhnac Pablo m'a enenlhet anac, apuetai'ac nac mei'asqueiacmo m'a cacpota njan etacmelecjac ma'a,
10
lhnac aptemac Pablo apcanemo apiennactescamo apaioma:
— Etnemecja neten lheiap, elpeiweso ta apio'oc—lhna ptemac Pablo.
Colhuawec anquec nac apquenmecjac neten pecjai'a nquec enenlhet anac, ca apiepconquesaianca njan aplhengama m'a.
11
Nquelpelapquescanquec nac enenlhet'awoc apqueluetai'o m'a, ca alpaijeianca lhnac apatno'oc apquelpacmeteianca apquelpacmeiasma apancawe co Licaonia, lhna aptaiancoc:
— Coca jam enenlhet'awoc anac dioses jam, apqueluaiwantaniec aquieto nac jenque'e— lhnac ptaiancoc.
12
Nquetlheianmec nac apualho'oc enenlhet'awoc ma'a Bernabe apto dios apuesai'a Zeus, Pablo coca dios apuesai'a Hermes, ncanec apto mota apmopuana eliatac ma'a.
13
Apnenquec nac ma'a lhema sacerdote apquenmacmecama apnemacja dios Zeus, aquieto necja atong nentalhnemacja na temma nac ma'a, apqueliantemecjo lhnac toro cacpota njan elhnemoc cacpota eluanlhancoc ma'a, apquenmajai'a lhnac eltacnescasancoc Bernabe cacpota njan Pablo.
14
Necsa apuetai'a lhnac Pablo m'a cacpota njan Bernabe apquetlheiacmo nengaqtec enenlhet'awoc ma'a, ca apqueliapteianco apquelentalhnema, aptaianquelha lhnac nconnatjacsec ma'a apqueluet'o la ncolatsecama, ca apalhacuaiacmo njan apiesecsec ma'a, apiaqcalheianca lhnac ma'a, lhna ptaiancoc:
15
— Metnamoc jam, jawe ennenco'o dioses, enenlhet apancawec ennenco'o, ca acto nac quetlhencap, wanlha nelua'ac lhec ennenco'o nenmac'o angetlhemosancoc ania'a actacmanma quetlhencap cacpota eluatesancoc apqueltemacja ncolatsecama, elietasquesecjoc na apualho'oc Engiapom Neten apto mengietsepma, apto apquelanai'a neten, nalhepop, aluata aquiawai'a cacpota njan caselha acnaianco alhma nquec jam.
16
Apcaiancawec nac nanec Engiapom Neten enenlhet'awoc apquenmajai'acja la etlhenquesec apanco'oc apancawec,
17
coca njeclhe mota njan apqueltacmelquesquescama apquellaniemjaicama, apquellapascasquec acmamai'a cacpota ncoitec aquiawai'a apnaclhecamoc aquielhna, ncoitec na aquiawai'a aptecamoc cacpota ncolpaijecjac apualho'oc ma'a—lhna aptemac Pablo apquellanemo enenlhet'awoc ma'a.
18
Coca njeclhec nac apquenmajai'a eluanlhancoc caselha cacpota eltacnescasancoc ma'a Pablo cacpota njan Bernabe.
19
Coca nietemawec nac na apqueluai'o judios apquelleniem'o Iconio cacpota njan Antioquia, ca apquelpencanwecjo lhnac apualho'oc enenlhet ma'a cacpota ellammelhcasecja Pablo, ca apqueliaqneianco lhnac metaimong ma'a, apquellanemo njan enietsepmac ma'a, apqueliengioseicocjo lhnac na aquieto nepiawa temma.
20
Ca apqueluai'o lhnac apquellelto Jesucristo apquennemolhema, apqueljalhiencanwei'o lhnac apietnacja Pablo, ca apquenmecjo lhnac apanquec neten, aptalhnecjo mocjom natemma m'a.
Mo'oc acnem na ntemac ma'a apquenmeiecjo Pablo cacpota njan Bernabe na temma Derbe,
21
apquetlheianweiacmo njan ania'a actacmanma m'a, man na ntec enenlhet meliasqueiacmo m'a. Netamen apqueltaqjemo lhnac aquieto Listra, Iconio cacpota njan Antioquia.
22
Ca apquelleltemo lhnac amaica'a apquellelto Jesucristo apquennemolhema m'a, apqueliateicocjo lhnac na etlhenquesec meliasquiam Jesus ma'a, lhnac aptaiancoc ma'a:
— Annengancoc jata aquiaiwai'a aquientalhnema nenmac'o la antancoc Engiapom Neten nennemolhema —lhna aptaiancoc ma'a.
23
Apqueltesquesaianco lhnac na metno apquetco'oc tacjaplhet'oc moclhem'a meliasqueiam Jesus apcaclhemecjelha m'a, ca apquelpacmetquescamo lhnac Engiapom Neten cacpota elpasmoc ma'a, apquellacjasquesammacpo lhnac na mec ma'a.
Apqueltaqjemo Pablo cacpota njan Bernabe aquieto Antioquia conne iocjalhma Siria
24
Netamen apquellempaicocjo lhnac mocjom apquetlhengama Pablo cacpota njan Bernabe m'a, apqueliecanweiacmo m'a iocjalhma Pisidia, apqueluaiacmo conne iocjalhma Panfilia,
25
ca apquetlhecmoseianco lhnac ma'a ania'a actacmanma na temma Perge. Netamen ma'a apquenmeiecjo
lhnac Atalia,
26
ca apquelcanetuaiacmo loma nemmen cacpota eltaqjoc mocjom neptamna'ac aquieto Antioquia, apquellempaiacjasecja lhnac ma'a nema allapascama ca njan nemo alelmalhnesquescamo m'a Engiapom Neten cacpota elpasmoc necsa apquetlhengama cacpota eleltennasancoc ania'a actacmanma m'a.
27
Ca apqueluejo lhnac Antioquia m'a, apquellanquesecjo lhnac apquellelto meliasqueiam Jesus ma'a, ca apquelleltennaseianca lhnac ania'a actemacja apqueluetai'a necsa apqueliaijecama, ca apquetlheno njan actemacja apquelpasmoma Engiapom Neten cacpota eleltennasancoc na ania'a actacmanma metno judios cacpota meliascamec na aplhenammap Jesus ma'a.
28
Ca apcacjenwecjo lhnac cuanqacjo m'a apiesecsec apquellelto meliasqueiam Jesus.