13
Ampaiacja apquetlhengama Bernabe cacpota njan Saulo cacpota elpaiacsec ania'a actacmanma
1
Apcacjaianquec nac apquetsecama ania'a cacpota njan jengetlhecmoscama apiesecsec Jesucristo apquennemolhema aquieto iocjalhma Antioquia, apqueluesai'a Bernabe, Simon mo'oc
nema ltema Apaiseiam, Lucio apqueniem'o natemma Cirene, Menahem cacpota njan Saulo. Menajem noca apcactengaianco lhemec ma'a apuesque Herodes Antipas.
2
Lhema cnem na ntemac apcaqnecjo m'a cacpota eltacnescasancoc Engiapom Neten cacpota njan apquellacjasquesammacpoc mec, lhna ptemac apquellanemo Espiritu Santo m'a:
— Jeliequiescasamoc Bernabe cacpota njan Saulo, allancoc apquenmacmecama—lhna aptemac.
3
Apquelpaqmetquescanquec nac mocjom Engiapom Neten cacpota njan apquellaqjasquesammacpo mec, ca apnenquenaianco lhnac na apmeio'oc tacjaplhet'oc ma'a, apquellapascamo njan elhpanquesec ania'a actacmanma.
4
Ca apqueleltennaseianco lhnac E.S. amai ma'a, ca apquetlhengamo iocjalhma Seleucia, apquelcanetuaiacmo njan loma nemmen ma'a, apquenmaianco apqueljalhtepelhquetmo iemmen acuacmo aquiaquienweiam lhepop acjalhiencaiam iemmen acuesai'a Chipre.
5
Ca apqueluaiacmo m'a necja iemmen acnactetemmalhquelha loma nemmen, apquelentalhnemo njan na temma m'a Salamina, apquetlheianweiacmo m'a ania'a aplhenammap Engiapom Neten aquieto lhamacjo apcacnecjelha judios ma'a. Juan nac na apquetlhelhma'ac ma'a apquelpasmoma mota.
6
Apqueliaijecama lhnac lhamacjo iocjalhma m'a, ca apqueluaiacmo njan na temma Pafos, apqueluetanweiacmo lhema judio secama ania'a apmopuana ania'a, acnema apqueltoncoma meijamolhma
apuesai'a Barjesus.
7
Ca aptemo lhnac na mota aplhelhma gobernador apuesai'a Sergio Paulo, apto njan neten apanquec apianweiacmo m'a. Ca apqueltemo lhnac gobernador ngcolhec aquiantemantamo Bernabe cacpota njan Saulo, apmajai'awec nac engiailhoc ania'a aplhenammap Engiapom Neten.
8
Coca mang noca engiasecjai'ac apiolhma Barjesus, mo'oc nemaltema griego apaioma Elimas, man nac eltemoc emoc tacja gobernador ania'a aplhenammap Engiapom Neten ma'a.
9
Ca apuai'o lhnac Saulo m'a, mo'oc nema altema coca njan Pablo, aplanei'awec nac apualhoc Espiritu Santo, apqueltamescamawec nac apiolhma Barjesus ma'a,
10
lhnac aptemac apcanemo:
— Meijamolhma nac lheiap apmopuana ania'a, queliacjameio' atca, mancomajai'ac ellana caselha actacmanma, apquelaptencasecama apmac'acja ellanac Engiapom Neten.
11
Metca apaqto'oc jata etnec colhuawe nac lheiap aniem'o Engiapom Neten, iacuatacjo toca ncotnec metai'a lhma— lhnac aptemac Pablo apcanemo.
Colhuawec anquec na ntemac metca apaqto'oc apiolhma Elimas ma'a, ca apquelpaqnemaianca lhnac apmajai'a emanwomoc enenlhet cacpota epasmoc aplhengama.
12
Niemascangquec nac apualhoc gobernador apuetai'o m'a, ca mei'asqueiacmo lhnac na nema atlhecmoscama aniem'o Engiapom Neten.
Apqueltennaicama Pablo ania'a actacmanma aquieto Antioquia Pisidia
13
Apnaiacmec nac Pablo cacpota njan apquetlhelhma'ac na temma Pafos, apquelcanantemo lhnac loma nemmen ma'a apquenmeiecjo Perge aquieto conne iocjalhma Panfilia, coca Juan aptaqjenweiacmec nac neptamen aquieto Jerusalen.
14
Coca Pablo cacpota njan Bernabe apquelicai'ac nac na temma Perge, ca apqueluaiacmo lhnac natemma Antioquia, aquieto conne iocjalhma Pisidia.
Acnem sabado lhnac ntemac ma'a, apquelentalhnenwaiacmo lhnac apcacnecjelha judios, apcacjenweiacmo njan conne m'a.
15
Ca acnemo lhnac alietsatemo waccajac jenganemacja Moises cacpota njan waccajac apanco'oc apquetsecama ania'a nnenga, ca netamen ma'a apquelemjama apmaniaie nemacnecjelha nac lhna aptaiancoc apquellanemo Pablo cacpota njan Bernabe:
—Quetlhencap elialheng'a, ¿nietne ie ania'a la jengellaicamoc apaioma jengeliatecjo la'a ennenco'o, je?—lhna aptaiancoc.
16
Ca apquenmecjo lhnac neten Pablo napaqtawe enenlhet'awoc, apiasecjo lhnac neten apmec apquelleltemo eluanmac enenlhet'awoc ma'a, lhnac aptemac:
— Ellailhonojo co Israel cacpota njan quetlhencap metno judios apquellelto apquellai'o Engiapom Neten.
17
Engiapom Neten apuesque engancoc co Israel, apqueliequiescamo lhnac nanec nellieijenca, aplhamaseianco njan ma'a aquieto ncotnacja apquellawacja iocjalhma Egipto, netamen aplaqlosenwecjo njan aquieplomo apmopuana apanque.
18
Malha 40 iantelhcapa lhna ntemac apquelactemmap ma'a iocjalhma metquelha temma, apqueltacmelquescanquec nac nanec na Engiapom Neten ma'a.
19
7 apquellawacja lhnac nanec na apnactewascamac Engiapom Neten conne iocjalhma Canaan, apquellaicocjo lhnac nanec cacpota etnocjac apquellawacja enenlhet'awoc Israelita,
20
coca malha 450 iantelhcapa lhnac nwaiacmoc ma'a apqueluetai'a caselha nac ma'a.
Netamen Engiapom Neten nac nanec na apquellaianco apquenmopuanca'a etnancoc jengiecpelquemo ngiapma'ac
tacjaplhet'oc co Israel acuacmo acnem apuo'o secama ania'a Samuel.
21
Netamen enenlhet'awoc co Israel apqueltengiai'o lhnac nanec na apiau'acja apuesque apanco'oc apancawec, ca apqueliequiescamo lhnac nanec Engiapom Neten lhema enenlhet apuesai'a Saul, Quis apquetca, apqueniem'o aptawana'ac neptamen Benjamin.
22
Netamen Engiapom Neten alhnac nanec aptepquesecjac mocjom Saul ma'a, ca aptemescasecjo lhnac apiau'acja apuesque David, Jese apquetca, lhnac ptemac Engiapom Neten aplheianmo m'a:
«Nlecawec co ewalhoc David Jese apquetca ncanec etnec jata asqueltacja la etnejec»
lhna nanec aptemac Engiapom Neten.
23
Apquelleltennascanquec nac nanec Engiapom Neten lhema apaioma, aptawen neptamen David ewac jata cacpota eluonquesec tep co Israelita, ca enenlhet anac ma'a Jesus alhta.
24
Amanie apmajai'a ewac nac Jesus ma'a, aplomaca lhnac Juan ma'a, aplheianmec nac apqueltemo ellanecjac apualho'oc co Israel cacpota ncolhec na allauquesanco conne iemmen.
25
Netamen quetsec nac ncaimommalhca apquetsepmacja Juan, lhnac aptemac:
"Jawe co'o Mesias aplheianmo lhnac nanec Engiapom Neten ewac jata, alhaiec jatoca ewac ma'a, monwapuanac niecje njan atnec jennencasecama
m'a ncanec coneng anquec co'o" lhnac aptemac Juan.
26
Ellailho quetlhencap elialheng'a Abraham aptawana'ac neptamen, cacpota njan quetlhencap metno judios apquellelto apquellai'o nac Engiapom Neten, ca ania'a nac acto jenwonquescama tep nenlhamacjo.
27
Apquellelto lhta apquelemjama apmaniaie cacpota njan enenlhet'awoc apquellawacja nac ma'a Jerusalen, ma lhta ncotlheianweiacmoc apualho'oc Jesus apto Mesias. Lhamacjo sabado lhta njan niecje apcacnecjac aquieto nemacnecjelha apquelietsateianco lhta njan apnactalhescama apquetsecama ania'a, coca ncacjemawec apnaqtewascanquec Jesus, aptaianquec ma'a actemacja apquetlheianma apquetsecama ania'a nnenga ncotnec jata m'a.
28
Ma lhta eluetai'a niecje aptemacja ncolatsecama Jesus ma'a, coca njeclhec lhta apquelelmalhnenwecja Pilato cacpota engiaqjec ma'a.
29
Ca apquellaqjemo njan, nwai'ac acnem actemacja lhnac nanec apnactalhescama apquetsecama ania'a, netamen ma'a nemo njan aclecuecjo apjapac neten iamet actennescama, nemo njan aclhenquescaiacmo metaimong alhua.
30
Coca Engiapom Neten alhta aptemesquesacjac apjalhnancoc mocjom apiesecsec apquenmasquenwaiacmo m'a,
31
nlhamacmec nac na cnem apuetasquesammacpo lhnac na napaqtawec apquellelto apquetlhelhma'ac apquenmeiecjo apquellempai'o Galilea acuacjo Jerusalen, coca colhuawe nac apquelpaiesquec ania'a actemacja aplhenammap Jesus napaqtawec enenlhet'awoc.
32
33
Apquelleltennascanquec nac nanec Engiapom Neten lhema apaioma nelieijenca ncotnec jata, coca meluetai'ac ma'a, ennenco'o coca neluetai'ac, nenmac'ac na angelleltennacsec napaqtawec quetlhencap ania'a actacmanma nac Engiapom Neten aptemescasecja mocjom apjalhnancoc apiesecsec apquenmasquenwaiacmo Jesus, actemacja lhnac nanec actalhesammalhca waccajac salmos 2:
«Lheiap apto eietca, co'o jeieniemai'a astepquescama colhuawe nac»
34
Lhennenga lhnac nanec aplheianma Engiapom Neten etnescasecjac jata mocjom apjalhnancoc Jesus, meltemo njan ecpelcacpoc apjapac conne metaimong alhua, lhnac nanec aptemac Engiapom Neten:
«Atnec jata astacja lhta lhema aspaioma acto jawe ngiapac anquec asqueltennascamo lhta David»
35
Ca ntac na actalhesammalhca mo'oc Salmos:
«Mengianconquec ncocpelcalhcac apiempec apjapac apto lheiap apquennencasecama apiamolhma»
36
Coca apiau'acja apuesque David apquelpasmonquec nac nane mota apquennemolhema aniem'o Engiapom Neten apqueltema etnec ma'a, ca apquetsepmo lhnac na m'a, acnemo aclhenquescaiacmo njan conne metaimong alhua apjapac ma'a aquieto apnaiancolha njan apquelieijenca apqueletsepma, coca ntepelcammalhquec nac nanec apjapac ma'a.
37
Coca apiocja apjapac Jesus, Engiapom Neten noca aptemescasecjac apjalhnancoc mocjom apiesecsec apquenmasquenwaiacmo m'a, lhno ca mancocpelcammalhcac apjapac ma'a.
38
39
Ellailho no Israelita ania'a netlhecmoscama nac, apquellelto la meliasqueiam Jesus ncolhec jata anmasquescaso meliamolhma, coca jenganemacja nac Moises mancawanquec ncomasquecsec mongeliamolhma.
40
¡Ellajo quetlhencap cacpota mancoujec aquientalhnema apquetlheianmo lhnac nanec apquetsecama ania'a, lhnac nanec aptaiancoc:
41
«Ellajo quetlhengcap apquellelto apqueluannaicama, enmenamoc engiengiamoc najan, awescac jata co'o caselha meluetai'o, eliascamoc jata acno ta aleltennasenca quetlhencap actacja acuetammalhca m'a»
42
Ca apquelenteiapmo lhnac Pablo cacpota njan apquetlhelhma'ac aquieto apcacnecjelha judios ma'a, ca nemo lhnac na alleltemo eluatamoc mocjom mo'oc sabado cacpota ellengasquesec mocjom ania'a actacmanma m'a.
43
Man nantec judios cacpota njan metno judios apquellelto apalhacuaiam apqueluanecamoc judios apquelieplecjo lhnac Pablo m'a cacpota njan Bernabe, apquelleltemo lhnac na meliengiecjec meliasqueiam Engiapom Neten aniem'o awanjec apquellamelaiam ma'a.
44
Ca acuaiacmo lhnac mocjom acnem sabado m'a, lhamacjo enenlhet nac apcacnecjac ma'a apquenmajai'a ellailhoc ania'a aniem'o Engiapom Neten.
45
Apqueliasepquescanquec noca judios apqueluetai'o enenlhet'awoc apentalhnema apcanquesecja Pablo m'a, ca apquellempai'acja lhnac apqueliascama apatno'oc cacpota njan apqueltacnoncomo necsa apqueltennaicama Pablo m'a.
46
Coca Pablo cacpota njan Bernabe apquelleltennascamo lhnac metca apquellai'a, lhna aptaiancoc:
— Jengellietawec ennenco'o angetlhenec ania'a aplhenammap Engiapom Neten apmaniaie quetlhengcap apquellelto judios, coca menmac tacja m'a, melleltac ncoitec aliennactema apnengio'oc mancotnenwaiam annelha, coca ntasec angelletsauquesec ania'a nac apiesecsec anac metno judios.
47
Engiapom Neten nac nanec apqueltemo antejec, lhnac ptemac:
«Ascapasquec lheiap cacpota etnec malha apcapommatma lhmanquec jam, etso'oc jata ania'a asqueluonquescama ta tep aplhamacjo enenlhet'awoc acuacmo nnelha lhepop lhma nquec jam»
48
Nquelpaijecjec nac apualho'oc metno judios apquellengai'o m'a, apquetlheianmo lhnac na actacmanma ania'a aplhenammap Engiapom Neten, meliasqueiacmo njan apquellelto apqueliequiescama Engiapom Neten cacpota ncoitec aliennactema apenengio'oc mancotnenwaianlha nnelha.
49
Apquelpaiescanquec nac ania'a actacmanma lhamacjo iocjalhma nac ma'a,
50
coca apquellelto judios apquelentennasquecjo lhnac meliamolhma Pablo cacpota njan Bernabe naqtawec nqueluana'ac aliamolhma nquescama alletsecama njan, napaqtawec na apquelemjama apmania ie neten apancawec ma'a, ca acnemo njan alentepquescamo m'a iocjalhma nac.
51
Ca apquelenteiapmo lhnac Pablo cacpota njan Bernabe, apquelelpalhneianca lhnac apmanco'oc lhepop actec aniem'o apqueltacnoncoma enenlhet'awoc anac ma'a, ca apquenmeiacjo lhnac iocjalhma Iconio.
52
Coca neptamna'ac ma'a aquieto Antioquia nquelpaijecjec nac apualho'oc cacpota njan apquellanei'awec apualhoc Espiritu Santo m'a apquellelto Jesucristo apquennemolhema.