12
Apmatnama Santiago cacpota njan nema aclhenquescama Pedro nengaqlhencasemmalhquelha
1
Apiau'acja apuesque Herodes apquennemolhema Jesus ma'a,
2
apmenlhenaianca lhnac moclhem'a apquellelto apmatnamo lhnac pelletau acuenactema Santiago Juan apialheng
3
Nquelleclemawec nac apualho'oc judios apquellengai'o ania'a, ca apqueltemo lhnac na Herodes elpatjetec Pedro m'a necsa actacmelaicama lhma pan metca apqueliepjescama.
4
Netamen ma'a apatjetammacpec nac na Pedro m'a nemo aclhenquescaiacmo nengaclhencasemmalhquelha m'a, moc 4 apquelpasmecja soldado lhnac apquellanecama necjau'ac m'a. Ca apmajai'o lhnac na Herodes eiantemecja Pedro napaqtawec enenlhet acmasco la actacmelaicama lhma Pascua.
5
Apnenquec nac Pedro nengaclhencasemmalhquelha m'a, awanjec nac apquellanecama soldados ma'a. Coca awanjec nac apquelelmalhnesquescama Jesucristo apquennemolhema Engiapom Neten cacpota epasmoc Pedro m'a.
6
Lhema cnem nac ncaimommalhca Herodes eiantemoc jata m'a Pedro napaqtawec judios, ca actemo lhnac pelhasep ma'a, apteianmec nac Pedro aquieplomo acnactetemmalhca apmeioc cadena, apquelanmec noca apcanet soldados napocja apnacja m'a, po'oc soldados lhnoca apquelanmec nac aquieto atong.
7
Mpelapquescanquec nac apiepjonwei'o Enenlhet Neten apcapascama Engiapom Neten, nquelienmonquec nac conne nengaclhencasemmalhquelha, apmanweiacmec nac napocja Pedro, lhna ptemac apcanemo:
—¡Elhatacja, etnemecja neten, engiacjetamoc!—lhna aptemac
Apquenmecjec nac neten Pedro m'a, colhuawec anquec nac mpalleiacmoc cadena apmeioc.
8
Lhnac ptemac mocjom Enenlhet Neten apcanemo Pedro:
—Eiapnecja apiapnama, enactetecja apnactetoma apmancoc—
Apqueliejecjawec nac Pedro m'a, lhna ptemac mocjom Enenlhet Neten:
—Engiaqlap apcaqlammap anac, noc, jeieplanta—lhna aptemac
9
Apieplecjec nac Pedro m'a Enenlhet Neten, malhna lhnoca ntemac acuetai'a apaqtec la'a.
10
Ca apqueliecai'o lhnac lhema apquemjamacja guardia, apqueliequecjo njan mocjom mo'oc apquemjamacja guardia, ca apqueluacjo atong tawapac ma'a, mmaijecjec nanquec atong ma'a. Ca apquelenteiapmo lhnac ma'a, apquetlhengamo lhnac quetsec tep ma'a, apsepanenwecjo lhnac Enenlhet Neten ma'a.
11
Ca aclheianwecjo lhac apualhoc Pedro m'a, lhna ntemac aclhenaicama apualhoc:
—Jawe na ngiapac Engiapom Neten jeiapascasac Enenlhet Neten cacpota jewonquesec tep necsa apquenmajai'a jenaqtewacsec Herodes cacpota njan judios —lhnac ntemac aclhenaicama apualhoc Pedro.
12
Ca apmeiecjo lhnac colhuawec anquec acnemacja Maria Juan nquen, mo'oc nema altema njan Marcos, man na ntec enenlhet ma'a apquelpacmetquescama Engiapom Neten.
13
Apuecjec nac Pedro m'a aquieto atong, apueneianca lhnac aptecpoianca, netamen nqueluana tcoc acuesai'a Rode actenenwecjo lhnac atong acnacja acuenenca cacpota ncolanjoc enenlhet apto aptecpoicama atong.
14
Niecpelquenquec nac apaioma Pedro m'a, acpaijecjo lhnac na au'alhoc ma'a, colhuawec anquec nac nquetcacjac apcacjanquelha aleltennascacjo ania'a, aluancaiacmo lhnac mancolecquescamo atong Pedro m'a.
15
Coca lhnac ptaiancoc ma'a:
—Jawe Pedro jam, mancoijec lheia', malha anema lheia'—
—Tocja, Pedro lhca iec —lhna ntemac atemmoianca m'a. Coca lhna aptaiancoc mocjom:
—Jawe Pedro m'a, Enenlhet Neten apancoc acnemo napa'at ma'a—lhnac ptaiancoc ma'a.
16
Coca njeclhec nac apueneianca Pedro m'a aquieto atong, ca cno acmaiesquescacjo m'a, apquelienwactenquec nac apqueluetai'o Pedro m'a.
17
Moc apopjec nac aptemac Pedro apqueltemo eluanmac ma'a, ca apqueltennaianca lhnac actemacja aptepecja nengaclhencasemmalhquelha aniem'o apasmoma , Engiapom Neten, netamen lhnac ptemac apquellanemo:
—Enmeiacja ta, eleltennascacja ta Santiago cacpota njan apquellelto apquennemolhema Jesus ma'a— lhna aptemac
Ca apteiapmo lhnac conne pa'at Pedro m'a, aplhengamo.
18
Ca atsai'o lhnac ma'a, apqueliamenammacpawec nac apancawe soldados apquellanecama nengaclhencasemmalhquelha, man nac eliamoc apmaiancolha Pedro m'a.
19
Netamen apuesque Herodes apqueltemo lhnac eltacmelcaso elleliama Pedro, coca man nac eluetecjac ma'a, ca apquelpesqueiacmo lhnac apquellanecama atong, apqueltemo lhnac na ncolhec annapacjo. Netamen Herodes apteiapmo lhnac Judea m'a apmeiecjo Cesarea, ca apnaiacmo lhnac na m'a.
Apquetsepma apuesque Herodes
20
Nnatjescanquec nac apuesque Herodes apquellanei'o enenlhet iocjalhma Tiro cacpota njan Sidon, ca apqueltenenwecjo lhnac apnacja apquemjama apmanie apmacmesaicama Herodes apuesai'a Blasto, apquellaianco lhnac pataccom ma'a cacpota eltennascacjac Herodes ania'a meltacnewec mocjom, ncanec apquellaianco lhna mota aptecamoc ma'a.
21
Netamen Herodes apqueltemo lhnac engiaqnecjoc lhemec ma'a enenlhet'awoc co Tiro cacpota njan Sidon, ca apnemo lhnac aquieto nengiecpelcammalhquelha, ieplomo njan aptalhnecja aptalhnema apmennawe m'a, ca apqueliateianca lhnac aquientalhnemo apaioma.
22
Nquelleclemawec nac apualho'oc enenlhet'awoc ma'a, apiaqcalheianca njan, lhna aptaiancoc:
— Nientelhec anquec apaioma lheipa, malha Engiapom Neten lheiap—lhnac ptaiancoc enenlhet ma'a.
23
Colhuawec anquec nac apcasquescamac apiempec Herodes aniem'o Enenlhet Neten ncanec apnesemmacpo lhnac malha Engiapom Neten, netamen apquetsepmo lhnac Herodes aniem'o aptecamoc apjapetec iapa apquetcoc.
24
Ca atcaianca lhnac ania'a actacmanma aplhenammap Engiapom Neten aclhamacjo apquellawacja.
25
Coca apquelpenescanquec nac apquelpaiescama ania'a actacmanma Bernabe cacpota njan Saulo aquieto Jerusalen, apqueltaqjemo lhnac iocjalhma Antioquia, apqueliantemecjo lhnac na Juan mo'oc nema altema Marcos.