15
Apquenmeiecja Pablo cacpota njan Bernabe aquieto m'a Jerusalen
1
Apqueluai'ac nac ma'a judios apquelleniem'o iocjalhma Judea aquieto Antioquia, ca apquetlhecmoseianco lhnac meluoncasacpec tep metnanco la circunsicion aptemacja lhnac nanec Moises apcanemacja etnancoc.
2
Coca ncoijec nac apquellatemmommap Pablo cacpota njan Bernabe m'a, man nac ncoleclemoc apualho'oc actemacja nac apquetlhecmosecamoc ma'a. Ca apqueluetai'o lhnac apquellemjama apmaniaie Jesucristo apquennemolhema m'a, apquellapascamo lhnac Pablo, Bernabe cacpota njan po'oc apquetlhelhma'ac aquieto Jerusalen cacpota elpacmetcasacpoc apostoles cacpota njan metno apquetco'oc ma'a actemacja apquetlheianma circunsicion
3
Ca apqueliecai'o lhnac iocjalhma Fenicia cacpota njan Samaria, apquelleltennaseianco lhnac ma'a janet iocjalhma nac necsa apqueliecai'a ania'a actemacja apqueluatesaicamoc caselha ncolatsecama apquellanecamoc metno judios cacpota meliascamec Engiapom Neten. Nquelpaijecjec
nac apualho'oc Jesucristo apquennemolhema apquellengai'o ania'a m'a.
4
Netamen Pablo cacpota njan Bernabe apquetlhengecjo lhnac mocjom apqueluecjo Jerusalen, ca apquenmaianco lhnac tacja Jesucristo apquennemolhema m'a, apostoles cacpota njan metno apquetco'oc, ca apquelleltennaianca lhnac Pablo cacpota njan Bernabe lhamacjo actemacja apqueluetai'a necsa apquellaniemjaicama lhamacjo apquellawacja aniem'o njan apquelpasmoma Engiapom Neten.
5
Coca moclhem'a lhnac Fariseos apcacjaiancoc nac na m'a apquellelto meliasqueiam Jesus, apquelaqnecjo lhnac neten, lhna aptaiancoc ma'a:
— Nietawec na etnancoc circunsicion ma'a metnanco nac judios cacpota elieplauquesec actemacja nac jenganemaja Moises—lhna aptaiancoc ma'a.
6
Ca apcaqnecjo lhnac mocjom apostoles cacpota njan metno apquetco'oc cacpota etlhenec actemacja circunsicion,
7
awanjec na ntemac apquellatemmomap ma'a, ca apquenmecjo lhnac neten Pedro, lhnac aptemac:
— Apqueliawec quetlhencap Engiapom Neten apto jeliequiescama lhennenga cacpota atlhecmosancoc ania'a actacmanma aplhenammap Jesus apiesecsec metno judios cacpota meliascame'.
8
Apqueliecpelcawec Engiapom Neten apualho'oc aplhamacjo enenlhet'awoc, apquenmanquec na tacja m'a metno judios, apquellaianco njan Espiritu Santo, nnawec na actemacja nac jengellanei'o ennenco'o.
9
Nennawec ennenco'o m'a metanco nac judios anac, apquenmasquescanquec na meliamolhma apquellelto nac meliasqueiam Jesus, nnawec na ennenco'o m'a.
10
Apquellammelhquec Engiapom Neten quetlhencap apquenmajai'a elpatenquesec aquientalhnema metnanco nac judios, nellieijenca'a nnenga cacpota njan ennenco'o ma lhta angelpatama aquientalhnema nac.
11
Mongeliasqueiacmoc ennenco'o angeluoncasalhcac jata tep metca aquianmoma aniem'o jengamelaiam apuesque Jesus, nnawec na m'a metnanco nac judios —lhnac ptemac Pedro.
12
Lhamacjo enenlhet nac apqueluanmeiancoc apqueltacmelquescamawec nac apquelailheianco m'a, ca apquellempai'o lhnac na apqueleltennasecama Pablo cacpota njan Bernabe lhamacjo actemacja apquellanai'a caselha monwetai'o aniem'o neten, caselha jempelapquescama aniem'o Engiapom Neten apiesecsec metno judios ma'a,
13
ca apquelpenescamo lhnac apqueleltennaicama m'a.
Ca ampaiacja lhnac apqueltennaicama Santiago m'a, lhna aptemac:
—Ellailho no asmac'acja atnec aleltennacsec colhuawe nac,
14
jengeleltennasema lhta ania'a Simon
actemacja apqueltacmelquescama secjec anque lhta Engiapom Neten metno judios, apqueliequiescanquec na cacpota etnancoc apquennemolhema apanquec na m'a.
15
Nlheianmec nac nanec na ania'a apnactalhescama quetsecama ania'a lhennenga, lhnac na nec ntemac:
16
«Awatamoc jata mocjom co'o cacpota alanecjac alhnancoc mocjom apnemacja lhta pa'at David actewasemmalhca lhta, alanecjac jata njan mocjom alhnancoc pa'at acmasquema lhta alatsecama.
17
Netamen enenlhet'awoc ma'a elquetmoc jata Apuesque, apquetlhelhma'ac na metno judios apquellelto jelpoccanma co'o.
18
Apuesque lhnac nanec apquelleltema eliecpelcoc lhamacjo caselha nac lhennenga apquellaianco lhta njan apaioma
19
Ca stac co asquellano quetlhencap colhuawe nac, meliasamonque lhma metnanco nac judios apquellelto lhta meliasqueiam Engiapom Neten,
20
wanlha coca ncaimelhquec annactalhesquesec lhema waccajac annawesaicama la m'a cacpota menmanwomec caselhaja ncollecjojo acpaiseiam aniem'o caselha aquiocja alanemmalhca ancoc, metnocjec apnacteianca'a manganemmalhquelha nac antejec, metawanquec na nentoscama acuaiwecamoc atsepma nac, metawanquec na apetec aquieplomo ema ncoc.
21
Ca jenganemacja nac Moises lhennenga nemo atlhecmoscamo enenlhet'awoc moclhem'a apquellawacja apcacnecjelha la judios lhamacjo acnem sabado.
Nema actalhesquescama waccajac ania'a apasammalhca metno judios.
22
Aplhamacjo apostoles cacpota njan metno apquetco'oc ca njan aplhamacjo Jesucristo apquennemolhema apqueliequiesaianco lhnac apcanet enenlhet apquellelto neten apancawec apqueliaspommap apqueluesai'a Judas mo'oc nema altema Barsabas, cacpota njan Silas, cacpota eltec apquetlhelhma'ac ma'a Pablo cacpota njan Bernabe necsa apquetlhengama aquieto Antioquia.
23
Ca apquellaianco lhnac na lhema waccajac cacpota etso'oc ma'a, lhna ntemac actalhesammalhca:
— Ennenco'o apostoles ca njan metno apquetco'oc nquetlhenquec engellualho'oc quetlhengcap engelialheng'a metno judios aquieto jam iocjalhma Antioquia, Siria, cacpota njan Cilicia.
24
Nelleng'ac ennenco'o ania'a moclhem'a nennemolhema apquenmeioiam jam apquetsoiam mocjom ncolatsecama apquetlhecmosecamoc cacpota ncoltemesquesec meliamo apquelieplauquesacja quetlhencap, coca jawe ennenco'o nellapascama jam.
25
26
27
25–27 Ca ncanec angellapacsec engellialheng'a Judas cacpota njan Silas, etnancoc apquetlhelhma'ac Bernabe cacpota njan Pablo, alletlhenquescamo lhta njan etequio'oc necsa apquetlheianma mota apuesai'a apuesque engancoc Jesucristo m'a, jata elelpeiwescasecjac quetlhengcap netlheianma ania'a altemesquescama meliamo apquelieplauquesacja quetlhencap.
28
Coca nnecjec mo'oc atlheianma engellualho'oc ennenco'o cacpota njan Espiritu Santo cacpota mongelpatenquesec malha aquientalhnema quetlhencap,
29
wanlha coca ntasec metawanquec nentoscama apetec apquellaicamoc apqueluanlhecamoc la caselha aquiocja alanemmalhca ancoc, metawanquec na apetec aquieplomo ema ncoc, metawanquec na nentoscama acuaiwecamoc atsepma nac, cacpota njan metnocjec apnacteianca'a manganemmalhquelha nac antejec. Ca apquelleliajacjo la quetlhengcap ma'a jenganemacja nac, ncotnec jata acpeiwomo apquellanecamoc ma'a. Jai, nnelha, wanlha m'a—
30
Netamen apquetlhengamo lhnac Bernabe, Pablo, Judas cacpota njan Silas aquieto Antioquia,
ca apquellanconwecjo lhnac waccajac actalhesammalhca Jesucristo apquennemolhema m'a.
31
Nquelpaijecjec nac apualho'oc ma'a apquelietsateianco waccajac ncanec alpaiesquescaiacmo lhnac apualho'oc ma'a.
32
Judas cacpota njan Silas apquellelto lhnac na apquetsecama ania'a, apquelpaiesquescaiacmo lhnac na apualho'oc, apqueliateicocjo lhnac na Jesucristo apquennemolhema m'a.
33
34
Apcacjenwaiacmec nac ma'a moclhem'a cnem, netamen apquelleltemo lhnac acpaiwesquecja apquellanei'o Jesucristo apquennemolhem'a m'a aquieplomo alpaijecja apualho'oc, ca apquelelhiaiacmo aquieto apquelempai'acja.
35
Man noca ncomajai'ac eltaqjoc ma'a Pablo cacpota njan Bernabe, apcacjenweiacmec nac Antioquia apquetlhecmoseianco ania'a aplhenammap Apuesque engancoc, apquelpasmecjo njan po'oc apqueltemo lhemec ma'a.
Pablo ncolhnemo mo'oc apualho'oc Bernabe
36
Ca netamen ma'a, lhnac ptemac Pablo apcanemo Bernabe:
— Noc, antanco amaica'a mocjom lhamacjo natemma nellempai'acja lhta secja netlhecmosecamoc ania'a aplhenammap Apuesque engancoc, cacpota njan angeliojoc actacja apquellaniemjaicama m'a— lhna aptemac Pablo.
37
Coca Bernabe apmajai'o lhnac na eiantemama njan Juan Marcos,
38
man noca ncoleclemoc apualhoc Pablo m'a, lhna sonquec Juan Marcos apquelhacjanweiacmo secje lhta aquieto m'a Panfilia necsa apquenmacmonwaiam ma'a.
39
Awanjec na ntemac apquellatemmomap Pablo, Bernabe m'a, ca apquelhpanmo lhnac ma'a. Bernabe lhnoca apiantemecjac Juan Marcos ma'a, apquelcanantemo loma nemmen apquenmeiecjo iocjalhma Chipre.
40
Pablo lhnoca apiantemecjac Silas cacpota etnec aplhelhma, ca apquelpaiweseianco lhnac Jesucristo apquennemolhema m'a aquieplomo apquellamelaiam Apuesque, ca apquetlhengamo m'a.
41
Necsa apqueliecai'a lhnac Siria cacpota njan Cilicia, apqueliateicocjo Jesucristo apquennemolhema apqueluaianlha la'a.