9 ¹ Co'o njan asto lhema apostol ncanec asuetai'awec apuesque engancoc Jesus, ca astemesquesaianco lhta njan quetlhencap Jesucristo apquennemolhema aniem'o actemesquesaicamoc asmacmecama lhta jeiasennaicama Apuesque, nietawec na alhcac aquianmoma asmacmecama ca ctemo nac na apostoles. ² Moclhem'a enenlhet jetlhenque mota motnema apostol co'o, coca apquelliawec niecje quetlhencap astema apostol co'o ncanec aptaianquec na Jesucristo apquennemolhema quetlhencap aniem'o asmacmecama altemesquesaicamoc, nwetammalhquec asto jawe ngiapac anque astema apostol co'o. ³ Moclhem'a enenlhet jeliematquesama co'o, coca anwasennalhco ta ejenquec co'o lha, ⁴ nietawec ennenco'o angetlhewancoc nentoma, nengiama aquiacmoiecja la nenmacmecama, ⁵ nietawec na angeliantemoc entawa la Jesucristo acnemolhema nemmancolha la'a, ca aptaiancolha lhta nja mota po'oc apostoles, cacpota njan apquelialheng'a Apuesque, ca njan Cefas ¹ . ⁶ Lhamacjo apquellelto lhta apostoles nietawec etlhewancoc aquianmoma apquenmacmecama la'a. ¿Se lha ntemac co'o cacpota njan Bernabe mancomajai'o nac angetlhewancoc na aquianmoma nenmacmecama, je? ⁷ Malha aptonac lhema soldado la'a, nietawec elhcac aquianmoma apmacmecama, malha actonac na enenlhet apcanmo nac acnema nac aquielhna, netamen ma'a ntacmelcascasquec apcaniemjaicama aniem'o aptoma aquielhna, malha aptonac na apquelanecama nepquesec, ntacmelcascasquec na apcaniemjaicama m'a aniem'o apiama neme pancoc nepquesec, nietawec anquec ma'a. ⁸ Ca jengetlhecmoscama nac jawe ejencoc ejenquec, nietnec actalhesammalhca jenganemacja apancoc ⁹ Moisés annanga, ca actemo lhnac nanec actalhesammalhca m'a: «Meniapquesanquec atong buey necsa aptepelquecja trigo apelhcapcoc»lhnac nane ntemac actalhesammalhca m'a. Ca jenganemacja nac aclheianma niecje cacpota ncotacmelquesquesec buey apcaniemjaicama, ¹⁰ coca jawe wanlha buey ma'a, ennenco'o njan jengetlheianma cacpota ncoltacmelec nellaniemjaicama ncanec lhamacjo jenganemacja nac aclheianma altemo ncoltamelquesec nellaniemjaicama. Jai, apto la apencaiam lhepop aniep cacpota njan apto la apquemposcai'a aiempeioc apcanma la actec, nietawe ncoitec na apqueljalhanma malha aquianmoma. ¹¹ Nnawec na ennenco lha', nenpaiesquec ania'a actacmanma apiesecsec anac quetlhengcap, jengellietawec na angetlhewancoc lhamacjo caselha la aquianmoma nenmacmecama. ¹² Po'oc enenlhet apquetlhewanquec na colhuawe nac aquianmoma aniem'o apquelpasmoma quetlhencap, tep anquec ennenco'o jengellietemo njan angetlhewancoc aquianmoma nenmacmecama apiesecsec anac quetlhencap, mang coca ncomac'ac angenmancoc tacja m'a cacpota melpaqmetec jengellanjo, malha aliscama lhma ta nja ncotnec ania'a actacmanma m'a. ¹³ Apquelliawec na quetlhencap apquellelto nac apquenmacmecama Engiapom Neten apnemacja, apquetlhewanque mota aquianmoma m'a apquenmacmecama, cacpota njan apquellelto nac apqueltacmelquescama aluanlhemmalhquelha caselhaja nentoscama aplhewai'a nac Engiapom Neten, aptawenquec na apetec necja atcoc ma'a. ¹⁴ Apqueltawec na Engiapom Neten etlhewancoc aquianmoma apquellelto nac apquelpaiescama ania'a actacmanma. ¹⁵ Coca ejencoc ejenquec momac'ac amoc tacja aquianmoma asmacmecama, ca waccajac anac astalhescama jawe asqueltemo jellancoc aquianmoma, awanjec co'o ammalhco ewalhoc aniem'o asqueltennaicama ania'a actacmanma nac metca aquianmoma, niecje jeiaqjema mec, ntasec niecje njan anwetsepoc momec coca tacja aquianmoma asmacmecama nac. ¹⁶ Mancolheianma co ewalhoc asto neten ejenque aniem'o asqueltennaicama ania'a actacmanma, ascanemmalhca moiecacsec ma'a, co'o la ie motno la m'a ¹⁷ Asto la asqueniemai'o ejenquec co'o asmajai'a altennama ania'a actacmanma, ntasec na elianmonquesec asmacmecama m'a, coca jawe lhta co'o asqueniemai'o ejenquec ma'a, ascanemmalhca lhtoca atnec aspaiescama ania'a actacmanma nac. ¹⁸ Coca nema acpaiesecja na mota ewalhoc ca nema aquianmonquescama asmacmecama metca aquianmoma m'a, nietawe niecje anmoc aquianmoma asmacmecama, coca momac'ac co'o anmoc tacja m'a. ¹⁹ Jawe co'o esclavo, astec coca jellasennaicama aplhamacjo quetlhencap cacpota alpasmoc ncoitec na meliasqueiam Cristo alienlhanmoc na alhamasecja la'a. ²⁰ Necsa asnema lhta apiesecsec judios, asieplaucasque lhta njan jenganemacja apanco'oc, ewanque lhta niecje moluananquec jenganemacja apanco'oc, coca asqueliejacjawe lhta cacpota njan ma'a enmancoc tacja ania'a aplhenammap Cristo. ²¹ Coca asno la apiesecsec metno judios apquellelto nac metca jenganemacja Moises, astemenquec na aptaiancolha m'a cacpota enmancoc tacja ania'a aplhenammap Cristo. Wanlha mota asqueliejecjo jenganemacja apancoc Engiapom Neten, nnawec na jenganemacja apancoc anac Cristo m'a. ²² Coca asnemo lhta apiesecsec mancolliennactema nac meliasqueiam Cristo, astemenquec na aptaiancolha nac ma'a cacpota alpasmoc meliascamec na Cristo. Lhamacjo apquellawacja lhma nquec jam asmanquelha la'a, astemenquec na aptaiancolha m'a cacpota alpasmoc eluoncasacpoc na tep ma'a, ²³ alletsewasama njan lhemec ma'a aniem'o jengeltamelquesquescama nengellaniemjaicama ania'a actacmanma m'a. ²⁴ Apquelliawec quetlhengcap actonac nelpaiwasemmalhca nac aplhaniec apquengiaicamoc ma'a, coca lhema apjapac enacsepoc aquianmoma. ¡Eltacmelcaso ta apquengiaicamoc apquelpaiwasemmap cacpota etlhewancoc aquianmoma! ²⁵ Jai, apquellelto la apquenmajai'a elpasenwomoc apquelpaiwasemmap, elpecquenecja acnaqtewascama la apiempeioc cacpota ennacsepoc ma'a, etengiamo ta apiempeioc cacpota eluetanwomoc apquetlhewai'a aquianmoma m'a, coca aquianmoma nac ncomascoc alatsenca m'a. Ca apquellaniemjaicama nac apquellelto nac Jesucristo apquennemolhema malha apquelpaiwasemmap antac ma'a, coca aquianmoma ta m'a mancawanquec ncomasquenwomoc ma'a. ²⁶ Ca ncanec co'o squeniem'o nac malha nelpaiwasemmalhca nac astec co'o nema asiamo m'a, motnac co'o alquetansema ewalhoc actema la acjemo. ²⁷ Astacmelcasawec aclhenaicamoc ewalhoc necsa asqueniem'a cacpota anacsepoc aquianmoma m'a, squeleiwesalhquec eiempejec cacpota ncoiennac ma'a, motnec jata nema jelhnesecja la'a niecje astema asquetlhecmoscama co'o.