8 ¹ Colhua smac'ac allatemmoma jelelmalhnecama lhta actemacja nac nentoma apetec apquellaicamoc mota'a caselha aquiocja alanemmalhca, apquelliáwec niecje quetlhencap actemacja nac ma'a, ncacjoc coca apqueliamenammacpe mota quetlhencap apquetlheianmo m'a. Nengianweiacmo nac nqueltemesquescanquec apquellammacpo, coca nengamelaiam anac na nqueltacmelquesquescanquec apquellaniemjaicama. ² Niecje lhema enenlhet la aclhenammalhco nquec apualhoc nema apianweiacmo nquescama, coca atquetsec apianweiacmo m'a, ncaimelhquec mocjom. ³ Enenlhet apto la apcamelaiacmo po'oc, ca enenlhet anac ma'a apto neten anquec aquietnema apianweiacmo m'a. ⁴ Ca actemacja nac mongeltammalhca nac, nlho ca la njan ntase anto'oc nengaicamoc anac caselha aquiocja alanemmalhca, nelliawec ennenco'o caselha aquiocja nac mamma aniemjaicama m'a, mancolhenec najan, wanlha coca lhema apjapac apto Apuesque, Engiapom Neten apuesai'a m'a. ⁵ Nnaianquec neten caselhaja cacpota njan nalhepop anac, moclhema enenlhet coca apqueleltanque mota dioses apanco'oc canjan apqueluescai'e apanco'oc, ⁶ coca nelliawec ennenco'o wanlha lhema apjapac Engiapom Neten, apto njan apquelentepquescama lhamacjo caselha alhma nquec jam, nelloca njan ennenco'o aniem'o apmopuana m'a. Nelliawec na apnec lhema apuesque engancoc apuesai'a Jesucristo, apto apmaicama Engiapom Neten apquellanei'o lhamacjo caselha alhma nquec jam, ennenco'o njan, ⁷ coca moclhem'a enenlhet meliamoc ma'a. Lhennenga lhta moclhema quetlhencap apqueltacnescaseianque lhta caselha aquiocja alanemmalhca, atlheianmo lhta apualho'oc mancolatsecama anto'oc nentoma nengaicamoc anac caselha aquiocja nac alanemmalhca, ca ncanec colhuawe nac aptawenco la nentoma nac nwactaniec aclheianma apualho'oc altennasquecta ncolatsecama etawancoc ma'a, aniem'o coca njan ma'a ncoliennactema apualho'oc. ⁸ Ennenco'o coca nelliawec jengenmo la tacja Engiapom Neten jawe aniem'o m'a anto'oc nentoma nlho ca la njan mantewec nentoma. ⁹ Nenmac'o la antawancoc nentoma nengaicamoc anac caselha aquiocja alanemmalhca, ntasec anto'oc ma'a, coca jawe napaqtawec ma'a ncoliennactema nac meliasqueiam ncanec ellammelhecjac quelha m'a. ¹⁰ Apiáwec lheiap caselha nac, coca apcacjanquec engellialheng'a meliojo mocjom aniem'o mancoliennactema meliasqueiam. Asietquescamaca apno la lheiap aptawecja conne pa'at caselha aquiocja alanemmalhca ancoc, ewac na lhema engialheng ngcoiennactema la meiasqueiam, etenwac ma'a aptawecjac lheiap, ncolhenec quelha apualhoc ntase nac anto'oc apetec nema acmescama nac caselha allanemmalhca aquiocja, etuoc jatelha njan ma'a, coca ncoietnancoc apaqtec necsa aptawecja ma'a mancolatsecama anto'oc. ¹¹ Ncotuacsec jata m'a aniem'o apuanenwaia aptoma lheiap ncanec mancoiennac mocjom meiasqueiam ma'a, lheiap coca nietnac apianweiacmo. Mancolatsema nquec ma'a ncanec apcamelaiam Cristo enenlhet anac. ¹² Ca apnactewasqueso la lheiap apualho'oc Jesucristo apquennemolhema mancoliennactema nac meliasqueiam, malha niecje njan aptewasquec na lheiap Cristo. ¹³ Ca njan apietnocjasqueso la apualhoc po'oc aniem'o aptoma apetec lheiap monganemmalhquelha nac anto'oc, ntasec metuec ma'a cacpota metuasec po'oc.