10
1
Quetlhengcap elialheng'a, cotlheianwacjo no apualho'oc actemacja lhnac nanec apqueluetai'a nellieijenca aquieto m'a iocjalhma metquelha temma, tacjaplhet'oc nac nlhengamac lhema iepjopai'a necsa apqueliecai'a aluata aquiawai'a m'a.
2
Malha lhna niecje ntemac aplhamacjo alapuai'a la iepjopai'a, malha lhnac na ntemac apquellauquesammap la iemmen ma'a
, apquelieplecjawec nac aptemacja la apquellanemo Moisés aniem'o apquelpasmecama m'a.
3
Aplhamacjo lhnac na aptoianco aptecamoc aniem'o neten,
4
aplhamacjo lhnac na apienaiancoc iemmen aniem'o Engiapom Neten, acteiapma metaimong actemo mota atlhelhma'ac necsa apquetlhengama m'a, coca metaimong anac Cristo m'a.
5
Nquetlhenquescanquec nac esaujacpoc aptaicamoc meliamolhma m'a, mang nac ncolleclemoc apualhoc Engiapom Neten, lhna nqueniemai'ac apquelpelhionweiacmo lhna apancawec
nalhepop apqueletsepma m'a aquiet'o iocjalhma metquelha temma.
6
Ntemenquec nac apqueluetai'a nellieijengca'a m'a aniem'o ncollatsecama apqueltemacja, colhua coca ennenco'o ntasec ncotlheianwacjoc engellualho'oc amota cacpota mongelleltec angellanancoc caselha ncolatsecama.
7
Meltacnescasamonquec caselha aquiocja allanemmalhca, ca aptaiancolha lhnac na nec ma'a, ca actemo nac actalhesammalhca waccajac Engiapom Neten apaioma:
«Apcacjanque enenlhet'awoc aptoianque aptecamoc, apienaianquec najan, netamen apquellaneianquec na apcaqnaicama cacpota ellanancoc caselha ncolatsecama m'a»
8
Mancolatsema antancoc nellanactema, ca aptaianco lhnac nanec ma'a nellieijengca'a annenga, lhna nqueniemai'ac eletsepoc 23.000 enenlhet'awoc ma'a, lhema acnem anquec noca m'a.
9
Meliepcon na Cristo, ca aptaianco lhnac nanec na nellieiejenca'a, ca altaclheianco lhnac ieiwa' m'a, apqueletsepmo njan.
10
Melleltamonquec na metca nque', ca aptaianco lhnac nanec nellieiejenca'a, ca nqueniemai'ac nconnapoc netsepma ngiapom.
11
Lhna na ne ntemac apqueluetai'a lhamacjo caselha nac jenque'e aniem'o ncollatsecama apqueltemacja, lhnac nane ntemac nema actalhescama nema jengellascama nenwanlha nac ncanec quetse ncaimelhcac actemonwanlha nnelha acnem.
12
Niecje atlheianma nac apualho'oc mellananquec caselha ncollatsecama, ¡ellajo ta m'a, metnamoncoie'!
13
Coca lhamacjo nac aquientalhnema apqueluetai'a aniem'o m'a enenlhet apancawe nac, mengianquejec jata Engiapom Neten na ncoiawancoc aliaqjapma aquientalhnema acuacmo la acuo'o mancolelianmommalhco, eliepjonwescamjoc jatoca njan ma'a Engiapom Neten necsa acuai'a aquientalhnema nac.
14
Quetlhencap elialheng'a asquellamelaiam, ntasec ncotlheianwacjo apualho'oc actemo lhnac nanec apqueluetai'a nellieiejenca'a, elpeiwescam coca colhuawe nac mancolatsema eltacnescasancoc caselha aquiocja alanemmalhca.
15
Asiawe co quetlhencap nietnec apquelianweiacmojo, ncotlheianwomoc jatoca apualho'oc acto jawe ngiapac anquec astacja lhquec aspaioma.
16
Aniem'o nelpasmecja Cristo nengienaianco na mota nojaicoc aquieplomo vino actacmanma aquietquesammalhca m'a ema apancoc Cristo, aniem'o njan nelpasmecja Cristo nennasquesammalhco na mota pan aquietquesammalhca apiocja Cristo, nentoianco njan.
17
Niecje nenlhamacma, malha enlhema coca ntacjac neliocja m'a aniem'o nentecamoc apnemo po'oc pan.
18
Ellanjono aptaianquelha nac co Israel, apquelpasmecja njan aniem'o aptaweicocja caselha apetec aluanlhemmalhquelha nengaicamoc anac Engiapom Neten.
19
19–20 Metnanco nac judíos apquennapenquec na apnaqtoscama cacpota ellancoc casecapoc au'alho'oc, jawe apquellaicamoc Engiapom Neten, ca ncanec moltejec elpasenwomoc quetlhencap ma'a necsa apqueltacnescasecamoc casecapoc au'alho'oc ma'a. Niecje metca nquec ma'a caselha aquiocja alanemmalhca nac, canjan apetec anac aclhewai'a m'a jawe njan acto neten aquiaspommalhca m'a mancolhno m'a mo'oc apetec la'a.
20
21
21 Coca mancoietoc quetlhencap einancoc nojaicoc ancoc anac casecapoc au'alho'oc necsa apienaicamoc la nojaicoc apancoc anac Apuesque. Mancoietoc na etawancoc nentoma casecapoc au'alho'c nema enquescama necsa aptecamoc la nentoma apancoc Apuesque nema enquescama la'a.
22
Mancoietoc ma'a ncanec eltemesquesec jata apancawec quetlhencap apquennatjaicama Engiapom Neten. ¡Ellajo ta quetlhencap ma'a ncanec neten anquec aquietnema apmopuana m'a, jawe ctonac ennenco'o!
Ntasec antengiancoc nentacmelquescama emmo'oc
23
Nlhenalhque mota:
—Apuanquec enenlhet apmac'acja la ellana'—ca ntac ania'a m'a.
Coca jawe lhamacjo aptacmelquesquescama la apcaniemjaicama po'oc.
24
Mancolatsema antengiancoc actacmanma nellaniemjaicama enganco'oc engancawec la'a, coca ntasec antengiancoc ma'a neltacmelquesquescama la apquellaniemjaicama emmo'oc.
25
Apuanca'ac quetlhencap etawancoc lhamacjo actemacja apetec alhammalhca nac aquieto actecquiomacja nentoscama, mancoietoc ncolquetamama apualho'oc ntase', nlho ca la mma', amanie la apquenmajai'a etawancoc ma'a.
26
Ntasec etawancoc lhamacjo apetec la ncanec Engiapom Neten apto apquelentepquescama allelto nac nennaqtoscama alloma nac lhmanquec jam.
27
Ca apquellanecpo la eltasemoc lhemec enenlhet metno la Jesucristo apnemolhema, ntasec etawancoc lhamacjo actemacja nentoma apquetlhewai'a la'a, motlhen apualho'oc actacmelacja la'a anto'oc, nlho ca la mma'.
28
Coca alletlhencaso la etawancoc apetec, cno la annawesco'o metawanquec apetec aniem'o caselha aquiocja alanemmalhca ancoc, metawamonquec ma'a cacpota melietnocjasquesec apualho'oc
29
po'oc. Apuanca'a niecje etawancoc quetlhencap lhamacjo actemacja apetec, coca ntasec na metawanquec cacpota metlhenacpec ma'a.
30
Stemenque mota gracias Engiapom Neten co'o amanie asmajai'a la atuoc astoma, mancolatsema jetlhenama aniem'o astaseiam alhma.
31
Ca aptawenco la, apienanco la njan elienlhanmamo ta mota etnancoc elieplauquesec asquellanacja lhquec etnancoc cacpota njan ellajoc Engiapom Neten
ma'a.
32
Mellanamonquec caselha alietnocjasquescama la apualho'oc judios, metnanco judíos, ca njan apquellelto nac Jesucristo apquennemolhema.
33
Asquelienlhanacmec co mota ncolleccasama apualho'oc aplhamacjo enenlhet'awoc astemacja, metca astengiai'a ejencoc ejenque', astengiac coca cacpota altacmelquesquesec apquellaniemjaicama emmo'oc la'a cacpota eluoncasacpoc na tep ma'a.