11 1 ¡Quetlhencap elialheng'a, eluanamo ta mota astemacja nac co'o, co'o njan asuaneianque aptemacja lhta Cristo!
Actemacja nqueluana nempaioma alhancoc
2 Asqueltacnescasenquec quetlhencap ncanec nquetlheianwacje mota apualho'oc co'o, apquelleliajacjawec na asquetlhecmosacam lhta. 3 Colhua coca smac'ac allelpeiwescasecjac quetlhencap, Cristo apto malha apqatec 1 apquenno la'a, apquenno coca malha apqatec nqueluana la'a, Engiapom Neten coca malha apqatec Cristo 4 Lhema apquenno la'a apacmetqueso la Engiapom Neten, nlho ca la njan elhenec ania'a aiem'o Engiapom Neten apcapquescama apqatec, coca mengiac'oc Cristo 2 m'a. 5 Coca nqueluana nac ntasec ncapquesec apqatec acpacmetqueso la Engiapom Neten, ca njan aclheno la ania'a aniem'o Engiapom Neten, ca mancotno la m'a, malha aquiesema ta ncotnec ma'a, mancac'oc na m'a apquenno. 3 6 Mancomac'o la ncapquesec apqatec nqueluana, ntasec ncolhec aquieseso ncotnec alhnai'o nquec apqatec, coca acmanco la m'a, ntasec ncapquesec apqatec ma'a. 7 Coca apquenno nac mancolatsema engiapquesec apqatec ncanec apnemo panque' Engiapom Neten, nelan'awec nac malha apientalhnemo apancoc Engiapom Neten, coca nqueluana nac nelan'awec malha apientalhnemo apancoc apquenno, 8 ncanec apquenno 4 nac jawe apqueniem'o m'a nqueluana, nqueluana coca nqueniemai'ac apquenno. 9 Apmanie lhnac nanec apquelanemmap apquenno, netamen acteiapmo njan nqueluana aniemai'o njan ma'a apquenno, 10 ca ncanec ntasec ncapquesec apqatec aluetasquescama actema coneng apientalhnemo apancoc apquenno, ntasec na ncapquesec apqatec aniem'o ai'o njan enenlhet neten. 11 Coca metca aquiecammalhca mo'oc ma'a apquenno canjan nqueluana apiesecsec anac meliasqueiam Apuesque, apquenno mancapuanquec eloca metca nqueluana, nqueluana njan mancawanque ncoloca metca apquenno. 12 Jai', nelliawec ennenco'o acteiapmo lhnac na nec nqueluana aniemai'o m'a apquenno, nelliawec na ennenco'o apquenno nac acteiaiacmec ma'a aniem'o nqueluana, coca lhamacjo enenlhet'awoc cacpota njan lhamacjo caselha alleniemai'o lhnac na nec Engiapom Neten 13 Ncolquetamamoc no apualho'oc, ¿nietawe nlhco nqueluana nconmalhnac Engiapom Neten metca apquescama la apqatec, je? 14 Nentaiancolha nac ennenco'o jengenmancasquec aluenactema nac apua' nentema apquenno', 15 coca nqueluana'ac ntasec ma'a aluenactema nac awa' aniem'o nema actemesquescama m'a cacpota ncapoc apqatec awa' nac ma'a. 16 Moclhem'a quelha apiesecsec anac quetlhencap apquenmac'o la jellelpaqmetquesacpoc ma'a aniem'o mancolleclemo apualho'oc asquetlhecmoscama nac, coca ennenco'o ca njan mo'oc apcaqnecjelha nac Jesucristo apquennemolhema nengellieplaucasquec nentaiancolha engancawe nac.
Nentewascamo emmo'oc necsa nentoma actacmanma
17 Aiosec ewalhoc asleng'o ania'a ncolatsecama apiesecsec quetlhencap jam necsa apcacnecja lhnac apquelpasmecja nentoma actacmanma jam, man nac etnaiancoc ma'a apqueltacmelquesquescama la apquellaniemjaicama po'oc, apnaqtewascanquec coca m'a. 18 Apquelhpanquesammacpec nac na apiesecsec anac quetlhencap jam, jawe quelha ngiapac actemacja aslengai'a ania'a, 19 alhnacjo nquec nenwetai'a apto la jawe ngiapac anquec Jesucristo apnemolhema. 20 ¡Mancoietoc elhpanquesacpoc necsa apquelpasmecja la nentoma actacmanma! 21 Moclhem'a lhnac aptoianco pecjai'a apquelletsenta aptecamoc ma'a, mang nac ellailhemac po'oc ma'a, moclhem'a lhnac nquennapmac mec jam, po'oc nac mengiescamac apiamo acuacmo nqueso aquieijama lhma'. 22 ¡Melleliejecjoc metca nac apquelletsecama jam! Ca apquenmac'o la mellacsec etawancoc aptecamoc, einancoc najan metca apquelpasmoma po'oc, ¡engiaqjamoc apcacjaiancolha apancawe! ¡Awanjec anquec jeliascama lhma aptaiancolha nac quetlhencap! 23 Nnenquec jeltennaseianca ania'a apquelanei'o lhnac Apuesque, pelhasep nac amanie cnema acmajai'a ncolhec actewaso apuesque Jesus ma'a, asqueleltennasque lhta niecje quetlhencap ma'a. Apmamo lhnac pan, 24 aptemo lhnac na gracias Engiapom Neten ma'a, ca apqueliaqtemo lhnac, lhna aptemac apquellanemo apqueltamesaicamoc: —Enmamoc, etawamoc pan anac, coca acto aquietquesammalhca asiocja jam ncoliaqtalhcac jata capota ncoltacmelquesquesec apquellaniemjaicama quetlhencap, etnamoc jata mota alietnecjo la apaqto'oc co'o—lhna aptemac apquellanemo Jesus apqueltamesaicamoc ma'a. 25 Aptaweianco lhnac ma'a, apmamo lhnac mocjom nojaicoc, lhna aptemac mocjom apquellanemo: —Enmamoc nojaicoc anac aquieplomo vino, einamoc najan, coca aquietquesammalhca nac alhnancoc apquellanemacja etnancoc Engiapom Neten canjan quetlhencap jata ncowac ma'a aquianquenalhco ta ema ejencoc, etnamoc jata mota alietnecjo la apaqto'oc co'o—lhna aptemac apquellanemo Jesus apqueltamesaicamoc ma'a. 26 Lhamacjo mota apquelpasmacjo la aptecamoc pan cacpota njan apienaicamoc vino, etlhene mota apquetsepma lhta Apuesque, ellanamo ta m'a acuacmo acnem apuectanlha ta. 27 Enenlhet aptawo la panque' pan, apieno la njan nojaicoc aquieplomo vino necsa meijamolhma, apselhnanemmap ma'a aniem'o mengiai'o apiocjojo cacpota njan ema apancoc Apuesque. 28 Ncaimelhquec eijoc apualhoc apanque amanie apmajai'a etuoc pan cacpota njan einec vino, 29 ncanec ncolhec jata aquiacmoncasquesacjo actemacja meijamolhma aptawo la apanquec pan cacpota njan apieno la apanquec vino, ncanec aquietquesammalhca m'a apiocja Apuesque. 30 Mantec enenlhet apiesecsec anac quetlhencap acuai'o nac anmasca apiempeioc, melliennactema, po'oc na apquetsepac aniem'o aptoma apanque necsa miejamolhma 31 Coca nengiojo la secjec enwalhoc amanie nenmajai'a anto'oc, manlhoquiec jata njan nema aquiaqmoncasecja nentemacja. 32 Coca apiecpelquec secjec nentemacja Apuesque, netamen ma'a apiaqmoncasacjec na nentemacja ncolatsecama la'a cacpota netamen ma'a angianwonjo lhma m'a, mancoujec na mocjom nema aquiaqmoncasecja ca actemo nac ma'a meliojo nac mocjom Engiapom Neten. 33 Coca stac co asquellano quetlhencap elialheng'a', necsa apquelpasmecja aptaweicocja la nentoma actacmanma, melpecjesanquec quetlhencap etawancoc aptecamoc ma'a, ellaielh jatoca secjec po'oc ma'a, 34 coca annapo la mec amanie la apquenmajai'a enmeiacjac nemacnecjelha, ntasec etawocja ma'a apcacjaiancolha apancawec nac cacpota mellanie caselha ncolatsecama m'a aquieto nac nemacnecjelha, metlhoquiec na nema aquiaqmoncasecja la'a apqueltemacja. Jai', wanlha m'a, jata asuactamo ta mocjom astaicama amaica'a jam, alhenecjoc jata lhamacjo actemacja acuetammalhca jam.
1Cabeza puede significar aquí jefe, o el que va primero
2Su cabeza
3Su cabeza
4Quizás se refiere al primer hombre llamado Adán