12
Nema jengaicamoc nenmopuana angelanac caselha
1
Quetlhencap elialheng'a,
asqueltawec alpeiwescasecja actemacja nenmopuanca'a aniem'o Engiapom Neten.
2
Meltaiancolha lhta quetlhencap Jesucristo apquennemolhema
apquellaiancawe lhta aliateianco apualho'oc cacpota eltacnescasancoc ma'a caselha aquiocja alanemmalhca metca acmowana nac canjan mancoliatoncoma.
3
Apqueliematquesaicama lhta apuesai'a nac Jesús ncanec mamma lhta apualho'oc Engiapom Neten Apualhoc, wanlha coca acnanco la apualho'oc enenlhet Engiapom Neten Apualhoc, meliasqueiam na m'a Jesús apto apuesque.
4
Apquellelto nac Jesucristo apquennemolhema moclhem'a mo'oc actemacja acnaicamoc acnema apquenmopuanca'a enmacmama aniem'o m'a apuanlha coca lhema Engiapom Neten Apualhoc,
5
nnanquec moclhem'a mo'oc actemacja mota apquenmacmecama aniem'o m'a apuanlha lhema Apuesque.
6
Apuanca'ac na ellanancoc mo'oc actemacja apquellanei'o caselha, aniem'o njan ma'a apuanlha lhema Engiapom Neten.
7
Moclhem'a coca ennenco'o nnac jengellanco nenmopuanca'a aniem'o Engiapom Neten Apualhoc cacpota angeltacmelquesquesec apquellaniemjaicama m'a emmo'oc.
8
Napocja njan apquetlhewancoc apquenmopuanca'a cacpota elpaqmetec nema apqueliamo aniem'o Engiapom Neten Apualhoc, napocja njan apquetlhewancoc apquenmopuanca'a cacpota elpaqmetec nquescama apquelianweiacmo aniem'o coca njan ma'a Engiapom Neten Apualhoc lhec ma'a.
9
Napocja njan apquetlhewancoc nquescama meliasqueiam, napocja njan apquetlhewancoc apquenmopuanca'a eltacmelquescamoc anmasca apiempeioc aniem'o coca njan ma'a Engiapom Neten Apualhoc lhec ma'a.
10
Napocja coca apquetlhewancoc apquenmopuanca'a ellanancoc caselha monwetai'o, napocja njan apquetlhewancoc apquenmopuanca'a etlhenec ania'a aniem'o Engiapom Neten, napocja njan apquetlhewancoc apquenmopuanca'a eliecpelcoc casecapoc au'alho'oc, napocja njan apquetlhewancoc apquenmopuanca'a elpaqmetama nempaioma meliojo nac mocjom, napocja njan apquetlhewancoc apquenmopuanca'a cacpota elpeiwesecjac ma'a nempaioma meliojo nac mocjom.
11
Lhamacjo caselha nac nenmopuanca'ac aniem'o m'a wanlha lhema Engiapom Neten Apualhoc, apquennasquec apmac'acja la engiancoc apiesecsec ma'a apquellelto nac Jesucristo apquennemolhema.
12
Lhema apiocja nac enenlhet nlhaniec alpasmecja lhamacjo actemacja acnaianco nac ma'a apiocja,
nnawec na m'a Cristo.
13
Nenlhaniec ennenco'o njan nengellelto nac Jesucristo apquennemolhema, judíos, metno judíos, esclavos, metno esclavos, nenlhanie', nnenquec na jengellauquescamo conne iemmen, malha lhema coca ntaiecjac nengiocja m'a aniem'o wanlha njan lhema Engiapom Neten Apualhoc, nemo njan jengellaianco m'a acnemo mo'oc coca m'a Engiapom Neten lhec Apualhoc.
14
Apiocja nac enenlhet mancawanque ncotnec lhema, nlhaniec alpasmecja m'a.
15
Ca actonac apmenec anac ma'a ncolhenec quelha au'alhoc:
—Jawe spasmecja co'o ja'e apiocja nac, asto la co'o apmec anac ma'a, aspasmecja stac apiocja nac ma'a— quelha ncotnec apmenec.
Coca mancoietoc ma'a, acpasmecja niecje njan apiocja nac ma'a.
16
Ca ctonac enjaicoc anac ncolhenec quelha au'alhoc:
— Jawe spasmecja co'o ja'e apiocja nac, asto la co'o apaqtec anac ma'a, aspasmecja stac apiocja nac ma'a— quelha ncotnec.
Coca mancoietoc ma'a, acpasmecja niecje njan apiocja nac ma'a.
17
Quelha acto la alpasmecja apiocja nac lhamacjo apiocja nac ma'a wanlha apaqtec, mancapuanquec jata ennalhma m'a, quelha acto la njan alpasmecja apiocja nac lhamacjo apiocja nac wanlha apaico'oc, mancapuanquec etecjanec aimes actapeiam la'a.
18
Coca nlhaniec alpasmecja m'a nengiocja nac, Engiapom Neten apnencanma m'a apmajai'acja la njan enenquenec,
19
coca acto la wanlha lhema apmenec anac ma'a, mancawanque ncotnec apiocja,
20
nlhaniec alpasmecja apiocja nac ma'a, coca lhema apiocja alpasmecama m'a.
21
22
Ca engaqtec anac quelha ncotnec ncanac emmec anac jeng:
—¡Eii emmec, mancaimelhcac jepasmoc lheia'! — coca mancolatsema ncotnec ma'a. Ca njan empatec anac quelha niecje ncotnec na ncanac emmenec anac:
—¡Eii emmenec, mancoiennac lheia', mancaimelhcac jepasmoc lheia'!—
Coca mancolatsama ta ncotnec ma'a, jawe mancoiennactema m'a, actacmelo niecje njan nenmaicama m'a cacpota ncotacmelquesec nengiocja nac ma'a.
23
Antacmelquesec ennenco'o moclhem'a acnaianco nac nengiocja jenmancascama nac, angapcaqsec najan cacpota mancotalhqueje.
24
Coca mancaimelhcac ma'a angapcaqsec nengiocja nac moclhem'a acnaicamoc mancotno nac jenmancascama.
Jai', Engiapom Neten apnencanma m'a acnaianco nac nengiocja cacpota angeltacmelcasojo mancoliennactema nac
25
cacpota njan alpasmommalhco acmowana njan ncopasmoc mo'oc acnaianco nac moclhem'a m'a nengiocja nac.
26
Ca aclenganco la acmasca emmenec anac, nsaujacjawec na acmasca nengiocja nac ma'a, actacmelcasacjo la m'a mo'oc anac, nsaujacjec na altacmelecja m'a.
27
Ca apquelpasmecja nac quetlhencap malha ntacjac apiocja nac Cristo, moclhem'a annancoc moc actema apquenmacmecama apuetlhewai'a.
28
Amanie ampaiacjasecja apqueliequiescama Engiapom Neten apóstoles, netamen apquetsecama ania'a, netamen na jengelletlhecmoscama, apquenmopuanca'a ellanacoc caselha monwetai'o, apquenmopuanca'a eltacmelcasecjac anmasca apiempeioc la'a, apquenmopuanca'a njan elpasmoc po'oc, apquenmopuanca'a njan etnancoc apquelemjama apmaniaie', cacpota njan apquenmopuanca'a elpaqmetama apquelpaqmeiasma meliojo mocjom.
29
Jai, moclhem'a nietnac apquenmacmecama moc actemacja moclhem'a, jawe aplhamacjo aptaicamoc apostoles, jawe njan aplhamacjo apquetsecama ania'a, jawe njan aplhamacjo
jengetlhecmoscama, apquenmopuanca'a ellanacoc caselha monwetai'o,
30
jawe njan aplhamacjo apquenmopuanca'a eltacmelquescamoc anmasca apiempeioc, elpaqmetec apquelpaqmeiasma meliojo mocjom, jawe njan aplhamacjo elpeiwesecjac apquelpaqmeiasma meliojo mocjom.
31
Elienlhanmamoc coca apquellanecamoc nenmopuana nac acto neten anquec aliaspommmalhca la'a.
Neten anquec aquiaspommalhca nengamelaiam emmo'oc
Colhua asmac'ac atlhecmocsec quetlhencap actemacja nenmopuanca'a neten anque nac aquiaspommalhca.