13 ¹ Ca ascapuanco la aliatamaja lhamacjo actemacja apquelpaqmeiasma enenlhet'awoc lhmanquec jam cacpota njan enenlhet neten, coca mancoietnac co'o ascamelaiam emo'oc, jawe sto njan co'o neten ejenque apiesecsec Jesucristo apquennmolhema m'a, malha ta atnec co'o m'a actonac tawa apac allecnaicamaja, nlhco ca la njan allecnaiecja nac ancoc. ² Ascapuanco la njan alhenec actacja la Engiapom Neten apaioma, aijoc na ania'a aquielhammalhca aquientalhnema nac angiamwomjoc, ncoitec na asianweiacmo lhamacjo caselha, aquietno la njan aquiawai'a nquec moiasqueiam anwactesquesec acjaiam metaimong la aquiawai'a, acjemo ta njan ncotnec ascammalhco metco la ascamelaiam emo'oc. ³ Nlho ca la njan annascoc lhamacjo asquetsecama apiesecsec anac metca nac apquelletsecamaja, anwancoc na asiocja nac cacpota awonquesec tep emo'oc, acjemo ta ncotnec ascammalhco metco la ascamelaiam emo'oc ⁴ Enenlhet apto la apcamelaiam po'oc, metca apnatjamo la colhuawe, apiamo lhma apanquec najan, metca apiasepquescama po'oc, metca aplheianma apianweiacmo apanquec cacpota njan metca apcammacpo. ⁵ Metca njan ncollatsecama apatong la'a, metca njan aptengiai'a mota caselha apancoc apanque', metca aploma, metca apecquenaicama apualhoc aploma aniem'o aptewasemmap. ⁶ Jawe njan ncopaiesecjac apualhoc apuet'o la mancopeiwomo nac, coca acpaijecja apualhoc ma'a apuet'o la caselha acpeiwomo. ⁷ Enenlhet apto la apcamelaiam po'oc metca njan astenganweiam apasmoma po'oc, meiasqueiam, apquellailhema caselhaja, apmopuana njan ewascapoc necsa apieplauquescama aplengaianco la aquientalhnema. ⁸ Mancawanquec ncomasquenwomoc nengamelaiam anac, ncomasquenwomoc jato ca m'a nemmopuana nac anlhenec ania'a aniem'o Engiapom Neten, ncomasquenwomoc jata njan ma'a nenmopuana angeliatama mo'oc apquelpaqmeiasma maniojo nac mocjom, ncomasquenwomoc jata njan ma'a nengianweiacmo nac caselhaja. ⁹ Ca nema nengiamo nac canjan nemmopuana nac anlhenec ania'a aniem'o Engiapom Neten, mancotsaujommalhco m'a, ¹⁰ nconmasquenwomoc jata m'a acuo'o ta acsaujommalhco nac. ¹¹ Necsa astema nematca lhta co'o, asqueliatecamaja, nquelquetamecama lhta njan ewalhoc cacpota njan asiecpelquemo malha lhta aptonac nematca la'a, netamen acsaujommalhco astema nematca aniem'o asuanecamoc. ¹² Coca colhuawe nac neluetac malha ieiam appoc taiep, alhpanma la njan nenwetai'a, ncowac jatoca acnem nenwetanweiacmo iojalhmec anquec ma'a, malha metca la apma nenga'at. Jai, mancosaujommalhco nema nengianweiacmo nac, ncowacja toca acnem nengianweiacmo acsaujommalhco ncoie', ca aptemacja nac ma'a Engiapom Neten apiamo nentemacja. ¹³ Nietnec coca janetolhem'a caselha allelto manconmasquenwaiam, ca cto nac aluesai'a mongiasqueiam, aljalhnecama enwalhoc cacpota njan nengamelaiam, coca acto neten anquec ma'a aisecsec anac acuesai'a nac negamelaiam.