¹ Klɛ tapɛlɛge, na Klɛ pɛlɛganne ze bɛŋe woziiŋe tɛnee. ² Ŋahaa vanye sigɛ ze yereŋe. Ki ze taala, ki tage woziige maga ze na Yɔrɔ Senuman (fɔngɔ baa tage). Ftinɛŋe ze yɛri kiri tagee, na tabaliŋe ɲuŋoo Klɛ wo buruye ze yɛri we mu ɲuŋoo ge. ³ Ki tage sonwoge tagire ze kɔn na vanŋgee. Kiri tage mage ze na yɔrɔ senumanw ka Senuman (fɔngi baare pone fɔngi baa tage). ⁴ Sanniŋe wirire soone na Klɛ wo bɛŋe kasyene cesuŋe ze kiri funŋoo, wuri cesuŋe taye pone ze sanniŋe la. Sanniŋe soone ze ki funŋoo, "maane" ze le mu funŋoo ge, na Arɔn wo tibiine zanre wone, na kuveye kɔrigi, Klɛ wo saliyaŋe ze jii mu ɲuŋoo ge. ⁵ Sɛrubɛnli wo jaali pe yere cesuŋe fugbanŋee, na li sɛlɛɛ na Klɛ wa wa. Pere wo kapaye ze na ɲimbe se kapegi fohi leŋe sariye tawuuge ɲuŋoo. Cere kerigi pne mu ɲahe tɛri juu wa nimɛrɛ yi. ⁶ Ayiwa, yi pone mu a yaa na kɔ tɛne muu ge, sɛriwuuli ze ba ji voŋge vanye woge tage woziigee tɛrɛgi muu na pe baare si. ⁷ Ɲahaa sɛriwuuli ɲuŋufoogbɔŋe kann yɛ nigin wu ze ba ji Klɛ tapɛlɛge tage sɔnwoge funŋoo jii nigin yɛ pe yeene funŋoo. Wu ze ba je wa na yapɔriye sisanmbee na kan Klɛɛ wuri na tisiire wo piinŋge wone la. ⁸ Nii Senuman (Klɛ munaane) a li sye na vanŋge sigɛ wolɛge wa wa, na yɔrɔ senumanw ka senumanŋe wo kone a mugi wɛ. ⁹ Pe ze ba yasunye na sariye ye mu kaan Klɛɛ ge, yiri ya ze si jɛn Klɛ pɛlɛveebi zɔnli je di viinŋe yi. Liri wa kasyene kanne yɛrɛ na wo niɲaa kaane sɛlɛɛ. ¹⁰ Li lige kaa yoo, li gba kaa yoo, fɔngɔbaare kerigi fiige kaa yoo, cere pone muu ze landaaŋe (sefeebi kone) wogoo fɔn na sa nɔ tɛrɛkarine wo tɛnɛ la. ¹¹ Ayiwa, Kirisitaa pan na ba ze sɛriwuuli ɲuŋufoogbɔ wojeme woro wo ɲuzɔbe (pohiŋe) wone la. Wuraa je na wu wo baare se vanye voŋge mu funŋoo ge, kiraa pɛlɛ na ze ɲunbonɔ, kiri na tisiire wo woyeriŋge wa nigin wɛ. Liri nohe wa na kiri wa ge koŋge wogo yi. ¹² Kirisitaa je na sika wala na nu wo sisanmbee fɔngibaa wo fɔngibaa tagee wɛ. Ɲahaa wu yɛ bile wo sisanmbe wa kan Klɛɛ tɔɔgɔ nigin na woro ɲuŋu wuu pewu! ¹³ Sɛriwuulaa ba sikabyebi na nupyɛhi wo sisanmbe na nuzɔŋe wo sɔɔnre se na dagaa ɲamatisili wo ɲamne lari pe la. ¹⁴ Li ba ze mu, Kirisita wo sisanmbaa pɔrɔ yapɔriye wobe la yɛ, ɲahaa Nii Senuman fanhe cege la Kirisitaa wu yɛ se saraga ɲobono wogo na kan Klɛɛ. Woro kasegi ɲuŋubaa wogi a la ɲɔgi wu sisanmbaa ba woro zɔnli je na fiinŋe, na wuu cere muu, kakɔnni wo cɛn wo munahi fooŋe Klɛ pɛlɛɛ. ¹⁵ Kirisitaa se Klɛ na tisili sohomo wo, na bɛŋe wovomiŋe teeŋe kakɔnni Klɛ a ze wu yɛ ɲɔge kan cɛnŋe wogɔbaaŋe mu wone la ge, wu tisili woyirili pe cɛn pe wuri ta Kirisita wo kuŋe cege la. Liri wa se na pe ɲuŋu wuu pe kapegii ge, jii pe se bɛŋe wolyeŋe caŋɲiinee ge. ¹⁶ Cɛnŋe fooŋe wo kuŋe a si viinŋe ban ɲaha la pe di daa pe jo cɛnŋe sɛɛre lɔvooŋe wone la. ¹⁷ Cɛnŋe lɔvooŋe sɛɛre woŋaa si djɛn dɔri cɛnŋe foo di cɛnŋe fooŋe yahi ɲii la yi, ɲahaa wa ba gu ban pe di daa cɛnŋe lɔvooŋe sɛɛre woŋe tɔri. ¹⁸ Liri le li se hali bɛŋe woleeŋe mu a tyeŋe na sisanmbee. ¹⁹ Musaa Klɛ wo saliyaye nigin nigin pone mu jo tisiire na kɔ muu ge, a wu sunŋ nunage na sikabyebi sinsanmbe na lohe lɔ na yatosiire woɲɛɛre pɔ na Izɔpu sige kagaange la na tagaa sisanmbe na lohe ɲahari sariye sɛbɛŋe ɲuŋoo, na tisiire pone mu ɲuŋoo. ²⁰ Na jo na" Be wa bɛŋe sisanmbe, Klaa jo yaa we mu pɛlɛɛ ge". ²¹ Liri nohaa, a wu sunŋ pi ɲahari vanye voŋge mu ɲuŋoo na ki funŋu baaseyɛriye muu pone ɲuŋoo. ²² Le jo saliyaŋe sɛbɛŋe funŋoo na sisanmbe pi ze ba dagaa yɛriye woɲɛhiyɛ karaŋi na yɛri fɔngɔ ba. Sisanmbe ba ze pe wo yi, kapegi foone mu a jɛn le yi. ²³ Yɛriye mu yi wa arijinɛŋee ge, yiri mu a yaa yi se jaali pe se fɔngɔ baa ge, na jii kasegi ge, liri kannaa yiri yɛriye bile wo fɔngɔbaaraa yaa na sariye ya yɛtii ye mu ye pɔrɔ woziiye la ge. ²⁴ Kaɲene la tisiire a Klɛ singbohe ge mu yaa ceeye la na se mahi jo fugban Klɛ woge ge, le se mahi jo kiri funŋoo Kirisitaa je yi dɛ! Kirisitaa je Arijinɛŋe bile bilee na yere Klɛ ɲaha tanŋ woro wo cembe wone la. ²⁵ Sɛriwuuli ɲuŋufoogbɔŋe ba je fɔngɔbaa wo fɔngɔbaa tagee kanne mu la yee mu yee ge na yapɔriye sisanmbee ge, Kirisitaa li se mu wɛ. Wa wu yɛ saraga tooyo woɲɛhiyɛ la yi, fɔn tɔɔgɔ nigin yɛ pe. ²⁶ Ki ba da mu li ze, wu ze si ɲaage woɲɛhiŋɛ se na lɔ fɔn koŋge nusange la. Ɲahaa wa pan kɔkɔɔre la nimɛrɛ kakɔnni wu ɲaana tɔɔgɔ nigin yɛ na wu yɛ se saraga beŋe fanhe kɔ. ²⁷ Tisiiraa guu kulo nigin kanne le mu la ge, Klɛ di ba pe kiti ge, ²⁸ Liri kanne wonune la Kirisita mu a wu yɛ saraga tɔɔgɔ nigin na tisili pone wo kapegi foone le pe la. Liri nohi wa si ba dɛrɛɛ di ban, le si ba ze wo kapegi foone leŋe wo la nuŋini wɛ, ga tisiire de to wu sige ge, tiri wo bohiŋe wone la.