¹ Musa wo saliyaŋe ze yaceŋge wobanŋge wo kasyene. Wuri ze si jɛn wu pɛlɛvyebi se tisile ɲɔbonɔ woloo Klɛ ɲahatanŋ wɛ sariye wuuŋe cege la yi, yire oe woo tɛrɛɛ tɛrɛ ge, na yee yee ge, kɔkɔɔrɔbaa ge. ² Ma ze yi ze la ɲɔgi, pe ze si diin yire wo wuuŋe la tɛne muu nuŋini wɛ. ³ Ga yee yee yiri sariye ze ba pe fungɔnye tirige pe ɲambe la. ⁴ Ɲahaa nupyɛhi na sikabyebi wo sisanmbaa si jɛn tisa ɲambe lahi wu la ɲahe ka muu la yi. ⁵ Liri wone la, Kirisita tɛrɛpanne la koŋge la, wa li jo Klɛɛ naa: Mu jo mu zaa sariye na yasunye la yi, ga ma cerekaare kan nee. ⁶ Na yapɔrige gbo na ki fɔ, wala na ki sisanmbe wo ɲambe vanŋe wone la, liri la muu a mu ɲii fa yi. ⁷ Liri la ne jo ne weere na Klɛ, ne pan kakɔnni di ma mudaanmbe se na yaa na le le jo kitabuŋe funŋoo ne kaane la ge. ⁸ Kirisita wɛraa li jo naa "sarige na yasunye na yapɔrige wovɔge na ɲambe fanfan sarige, ma ze zaa kiri ka muu fiige la yi, kiri ka muu a taan muu wɛ. Na ta cere kerigi muu ze zi na yaa na saliyaŋee. ⁹ Liri kadugo, a wu jo naa" Ne weree, ne pan kakɔnni da ma mudanmbe si ". Le se mu ge, Kirisita landaa leeŋe lɔ wa, na landaa wovomiŋe tyeŋe. ¹⁰ Wa Klɛ mudanmbe se na wu yɛ se sariga tɔɔgɔ nigin yɛ pe, ge mu ki wa ki fiigaa nuŋi ze yi ge, woraa tiin fɔngɔbaa woloo kiri cege la. ¹¹ Sɛriwuulaa ba yere tɔɔge la ɲigaa ɲiga na pe baare si na tiine yiri sariye nigin niginŋe wonuye wuuŋe la. Ɲahe ka muu la yi yahi jɛn ɲambe fan yi. ¹² Ga Kirisita kɔnni, wuraa wu yɛ kan tɔɔgɔ nigin yɛrɛ na ɲambe fanhe, na daa sa diin Klɛ sulicege la. ¹³ Nahi na Klɛ wu wu piinli miniŋɛ wu fɛrɛɛ ge. ¹⁴ Tisili bii wa yɛrɛ fɔngibaaree ge, a wu pere se tisilee ɲobono woloo wu bile sarige niginŋe cege la, pere muu di diin tɛne muu. ¹⁵ Klɛ Yirimbaa liri yu woo na fiinŋe na" ¹⁶ Ne si ba bɛŋe we mu sin na pee ge, cere cabigi dorogɔ nohaa ge, wure wa weree, ne Kaafooŋaa jo mu. Ne si ba saliyaŋe le pe zɔnlii, ne kaane di diin pe fungɔnye la. ¹⁷ Ne si nuŋi ba pe ɲambe na pe piinŋge yahi na zɔnŋe la nuŋini wɛ. ¹⁸ Liri la do, ɲambe ba ze fan, sariga kawuuno ɲuŋo wa nuŋini wɛ. ¹⁹ Liri kanne la, na cebiilii konaa kan woro muu na ji fɔngɔbaare tage wo faɔgɔbaa tagee Yezu sisanmbe woŋe cege la. ²⁰ Wa kovone wojene la ɲɔ mugi woroo vanbarige sohomoo ge mu ki wa wu bile wo cerekaare ge. ²¹ Sariwoloŋe ɲuŋufoogbooŋe wa woroo Klɛ wo sigɛ ɲuŋoo. ²² Liri la, woro pe fungɔnpeye wuu wo yɛ funŋoo, wo di wo yɛ je wo se fɔngɔbaa na lohe wojeŋgee, wo di gbara Klɛ la na daaŋe ɲobonee. ²³ Wo jo cege tatahiŋge ki wa woo ge, wo ba wo cere gbo wuri wo kaane la yi. Ɲahaa Klɛ wa wu yɛ ɲɔge kan ge, ɲoomiine covoo wu wa. ²⁴ Wo fanhe le wo yee, wo di wo yɛ tagi wo Klɛ wo kaadaange kone ɲaari, wo da kaceŋgi si. ²⁵ Wo ba li segi da se wo tyɛngi la mahi jo pii a ba dye li si kanne mu la ge. Ga woro paa wo yɛ zɔnmbi taraa, ɲahaa yere bile ɲii wa li na Kaafooŋe cabilaa tɛrɛŋɛ na kɔ. ²⁶ Woro pe kaɲene cɛn na kɔ ge, woro ba tugo na ɲambe si sanhani, sarige ka yafiige wa ge kahi jɛn piri ɲambe fanhi wɛ ge. ²⁷ Saarikaa le tiin nimɛrɛ, cere wa yegiŋge na nage wogbohe, yire ye si ba Klɛ piinli sorogo pewu. ²⁸ Tisa tisa wa Musa wo saliyaŋe kaagi ge, siin sɔɔn wala siin taanri pe ta pe li jo na kaɲene li wa, wuri funŋaa yaa pe wu gbo, pe yaa pe wu ɲiɲaare se bile yi. ²⁹ Ga le le jo pee liri la ge, liri wa na Klɛ Jaŋe fanhi, wala na jo na Yezu sisanmbe pe bɛŋe se Klɛ na tisili sohomoo ge na liri wa yafiin wɛ. Na ta pire sisanmbe pe funŋe yahi fɔngɔbaa. Wala na Klɛ Yirimbe jobiine jo, pire pi wa ɲiɲaare fooŋe ge, wuri funŋe wo sariŋaa pe na toro. ³⁰ Ɲahaa we wa jo na: "Ne wa yaa di mɔniŋe wuu, ne si ba pe sara."Woraa wuri funŋe cɛn. A wu li jo nuŋini na:" Ne Kaafooŋe wa si ba pere tisili yege." ³¹ Na je munahi fooŋe Klɛ cee, liri wa saarikaa." ³² Yere pe ye yɛ funye kɔn ye daaŋe nusaanre la. Yeraa klɛ wo kpɛɛnge ta yɛrɛ, a ɲaage wobege noho san ga a yere sɛɛre le ye yee. ³³ Tage kaa pe ze ba ye sɛhɛɛ, na ye ɲaani tisili ɲii la. Tage ka yɛtii yere di ɲahe le na ɲaaniveebi tagi. Yeraa kanhi na kasolembii pe ɲaage funŋoo.Yeraa sɔn na ye ceyɛriye yahi yi sɔvyebi cee na fundangee. ³⁴ Ɲahaa, yeraa jo na nafoŋe watii wa yeree, we mu wa pɔrɔ ye la, we mu wu wa wogɔbaliŋe ge. ³⁵ Yere funye ba bɛn yi, ɲahaa li nafanŋaa pɛlɛ. ³⁶ Liri la fɔn yere pe sɛɛrɛ se kakɔnni yere ba Klɛ mudaanmbe se na kɔ tɛne muu ge, wa ɲɔmiine kan kan le mu la ge, yere pe liri ta. ³⁷ Kaɲene la le jo Klɛkayuunee naa" Le tiin jɛri yɛ, we wa yaa wu pan ge, wuraa si ban, wa si mɔ di ban yi." ³⁸ Ne wo tisili wodeleli a si ba bohi daaŋe cege la, ga wu ba dɛrɛɛ kadugo, wu laagaa si wuu ne la". ³⁹ Bii pe si ba dɛrɛɛ kaduguyiri di gu pewu ge, woro wa pere pii wɛ. Cege tatahiŋge wa woro la di woro pohi.