¹ Daaŋe nohe wa na taa yage ka la, na ki se ma cege tatahiŋge na ta mu sanhi ki ɲa na ɲa yi. ² Tɛrɛmɔnɔ tɛrɛ wo tisilaa mɛtange ta Klɛɛ pe daaŋɛ wo cege la. ³ Woraa taa Klɛ la ge, liri kunnuŋi woraa li cɛn na koŋgaa tirige Klɛ kayuune cege la. Liri la yɛriye muu woraa ɲaa ge woraa li cɛn na yiri muu wo nohosaanraa foori yage kayɛtii la wo si jɛn ge mu ɲa yi ge. ⁴ Abɛlaa taa Klɛ la ge, lire le wu se a wu sarige wuu ge mu ke taan Klɛɛ ge na toro wu ɲahafooŋe Kayɛn woge tanŋ. Wa taa Klɛ la ge, lire le wu se a Klɛ wu tɔri tisa wodelee na zɔn wu sarige la. Abɛli wo daaŋe cege la liri kayuune wa tɔɔgɔ la sanhini na ta wu bile wa ɲii la yi. ⁵ Enɔkaa taa Klɛ la ge, a Klɛ wu lɔ yiige koŋge funŋoo kakɔnni wu ba gu wɛ. Tisaŋe wa muu fiige ɲiinaa tahi Enɔki la nuŋini wɛ. Ɲahaa Klɛ ze wu lɔ. Le jo Klɛ kayuune naa nahi na Klɛ wu wu lɔ ge wu kaane ze taan Klɛɛ. ⁶ Tisaŋe kaa si jɛn daan Klɛɛ na wuri funŋe ɲɛ taa wu la yi. Ɲahaa tisaŋe wa zaa di gbara Klɛ ge fɔn wu taa wu la na Klɛ wa wa, na wu di wu saveebi ɲii fani. ⁷ Nuvun a taa Klɛ la ge, lire le li se kaane li wa li sanhi ze na ɲa yi ge, a Klɛ wu soŋo liri la tɛne muu ge, a wu sa Klɛ ɲaha la na kɔrigbohe yaa na tagaa wu sigɛsiinbi pohi, a koŋge kaagi pewu. Wu daaŋe cege la a Klɛ wu tɔri tisa wodelee. ⁸ Klǝa li jo Ibirayimaa na foori wu sɛ kene la yɛtii na wuraa si ba liri wo fɛɛre kan wuun, a wu yiri na kari wa, na ta wu bile ze wu tasege cɛn yi. ⁹ Wuri daaŋe cege la wa ba diin nabunre la liri kene funŋoo, le mu kaane la Klaa ze wu ɲɔge kan. A wu tiin wa vanye voŋge funŋoo, na Isiyaka na Yakuba, Klaa ze wu ɲɔmiine kan pere bile muu liri kaane niginŋe wonune la. ¹⁰ Ɲahaa Ibirayima ze zaa wu kanha ta ge mu ke yereŋe na ɲɔ ge, Klɛ bile di ze ge mu wo kasyene sevoo, na ki yereŋevoo ge. ¹¹ Wuri daaŋe niginŋe cege la, Sara mu a cɛn sanŋe ta wuri na wu tilɛɛre bile muu. Ɲahaa wa taa li la na Klaa wu ɲɔmiine kan kaane mu la ge wa si liri se. ¹² Liri kanne wonune la, naaŋe niginŋe wu ze nɔ kuŋe la na kɔ bile ge, wuri wo cege la tisiira ta bii pe ɲɛhi mahi jo yeŋewɔrɔgɔɔ, ti ɲɔgaa si jɛn jɛn yi ge, ba gbaŋe ɲɔge tamizigɛ ɲii. ¹³ Klaa wu ɲɔmiine kan kaane mu la ge, pe ponaa taa li la fɔn na sa nɔ pe guŋe la pe cɛn liri ta yi. Pe ɲiinaa li ɲa tatɔɔngɔɔ na fundanyee liri kanne la. A pe li cɛn mu na pera wa nabuun, na pe wodoroloo pe wa ge koŋge la. ¹⁴ Tisili bii muu pe yu mɛmɛnɛ ge, le cɛn na pere muu a pe tokanhe taga sa. ¹⁵ Pe fɛnhaa yiri tage muu ge, na pe fungɔnyaa tiin kiri tage la, pe zahi jɛn dɛrɛɛ zɛ kiri tagee. ¹⁶ Ga pe fungɔnye wa tokanhe wojeŋge la, ge mu ki wa arijinneŋe ge. Liri kanne la pe ba Klɛ yiri na pe Klɛŋe wahi da ziigi wɛ. Ɲahaa wa tage yaa pee. ¹⁷ Klaa li saa Ibirayimaa wu Isiyaka saraga wuree, kakɔnni di wu ɲahaa di wii. Daaŋe cege la wa li se yi di wu jaŋe niginŋe kanne yɛ kan di ze saraga yi. Na ta Klɛ ze wu ɲɔge kan wuun. ¹⁸ Na li jo wuun na wu kanohaa si ba dɔri na lɔ Isiyaka la. ¹⁹ Ibirayima ze taa liri la na Klahaa jɛn gboŋe yiri. Liri la worahaa jɛn li jo na Klaa Isiyaka ɲuŋu wuu kuŋee, na wu kan Ibirayimaa. ²⁰ Isiyaka wo daaŋe cege la a wu dubaŋe se wu nagoobi Yakuba na Ezawuu pe ɲiga kunnuŋi. ²¹ Yakuba wo daaŋe wone la, tɛne wu ze za di gu ge, a wu dubaŋe se Isufu nagoobi nigin niginŋe muu na daa wu tibiine sin na Klɛ saari. ²² Isufu wo daaŋe funŋoo wu tɛrɛkunaa nɔ na kɔ ge, a wu jo na Izirayɛli nagoobi a si ba voori Misira kenee caŋka. Liri la a wu wu gbowoŋe kaciiye lɔŋe wone jo na wahi pee. ²³ Daaŋe cege la, Musa sefeebaa sa fanhafooŋe wo saliyaaŋe la yi. A pe Musa tibinnaɲigɛ woŋe ŋmɔhi fɔn yeye taanri, ɲahaa wu ze naaraa ɲɔ na toro. ²⁴ Musaa ba lɛ tɛne muu ge, wu daaŋe cege la wa sɔn na pe yahi pe wu yiri na Misira fanhafooŋe poroŋe wo jaŋe. ²⁵ A wu sɔn ɲaage la na Klɛ wo tisilii nahi na wu tiin ɲaɲiŋge tɛrɛ nigin funŋoo ɲambe la ge. ²⁶ A wu li se Misira nafoŋe la, na zɔn fanhare la mahi jo Kirisita ɲii, ɲahaa wu ɲiine ze tɔɔnŋe wobaanŋe la, we mu wa pɔrɔ ge. ²⁷ Musa wo daaŋe funŋoo wa sa fanhafooŋe ɲahaa, di voori Misira kenee wɛ. A wu ɲaha le mahi jo wu ɲiine wa Klɛ la, tisaa si jɛn we mu ɲa yi ge. ²⁸ Wu daaŋe funŋoo wa bulure vooriŋe wo cagbohe gbegee na sisanmbe ɲahari ɲahari koɲɔhi gbariteriye la, kakɔnni nagoobi woziili gbovooŋe ba nɔ Isirayɛli wo nagoobi woziili la yi. ²⁹ Izirayɛli nagoobaa Soomolohe Woɲigɛ jiili tooye la pe daaŋe cege la. Ga Misirasiin a jo pe di ki jiili, a lohe pe lii. ³⁰ Izirayɛli nagoobi daaŋe funŋoo pe ɲaari na Zeriko kanhe mahi mahiŋaa gbarisɔɔn yɛrɛ, a ki kozɔrɔmahiŋge to. ³¹ Arahabu wu ze cee na wu yɛ pɛrɛɛ ge, wuri wo daaŋe cege la wa yere na Izirayɛli nagoobi tudunmbi ŋmohi, liri la bii pe li se Klɛ la ge, wuraa taa ku na peree wɛ. ³² Di lisiin jo nuŋini yɛ? Ne si ja di Zedeyɔn na Baraki na Samusɔn, na Zefɛti, na Dawuda, na Samuwɛli, na Klɛ tudunmbi pone kerigi ɲaha jo nigin nigin wɛ. ³³ Pere wo daaŋe funŋoo pe ja kerigi cii yɛtii la na pe mara na deleŋe tyeŋe Klaa wu ɲɔge le mu la ge, a pe liri ta. A pe cɛnrigi ɲɔye pɔ. ³⁴ A nage sunŋ pii sorogo na kanhi, a pe pohi na foori ŋmɔpanŋge wo kpɔnmbee, a pe fanha ta yambe da gɔ noho la, a pe se kasikɔɔn wojemee na pe piinli nii. ³⁵ Ceebi pii wo daaŋe cegaa pe tisili wogulaa ɲi. Pii mu a sɔn ɲaage la kakɔnni Klɛ wu ba pe pohi ɲigaa. ³⁶ Pii mu a sɔn fanhare na kpɔɔnre la. A pe pe pɔ na jɔrɔyee na le kasoŋe la. ³⁷ Pe pii wa na kivyeyee, na pii cere na ɲahaŋee, na pii gbo na ŋmɔpanŋgee. Pii ze ɲaaraa doroo na yatosyɛye na sikasyɛyee pe yasiyee. Pe kanhi na ɲaana na toro. ³⁸ Koŋge ze si jɛn bɛ na pee wɛ, ɲahaa pe ze yaa na liree. Liri la pe tiin na ɲaari ɲaari sipooŋe na ɲaye ɲuŋoo, na zinnee na zɔɔn faaweye na ɲiŋge weye funŋoo. ³⁹ Klaa pere pone metange yiri pe daaŋe wone la. Ga wa wu ɲɔge kan le mu la ge, pe wa muu a liri ta yi. ⁴⁰ Ɲahaa Klaa yaceŋge ka gbegee woroo ge mu ke pɔrɔ ge. Wu ze zaa cere pone muu ce se woro kadugo la yi.