¹ Jii pone muu woraa jo toro ge, nimɛrɛ ge li ɲuŋge ki ge na wo li cɛn na sɛriwuuli ɲuŋufoogbɔŋe fiige ki wa woroo. Wa sa diin fanhafɛɛre pone Klɛ wo sulicege la klaŋe fugbanŋee. ² Wa wu wo baare si Klɛ tage fɔngɔbaare wo tage, wu tatɛɛnge bilee. Tisa cegaa ge mu yaa wɛ ge, fɔn Kaafoo Klɛ bile kanne. ³ Ɲahaa sɛriwuuli ɲuŋufoogbɔŋe we muu ge, wa ba diin na yakanye na sariye woo na gaan Klɛɛ. Liri la, fɔn Yezu mu wu ka ta wu kan Klɛɛ. ⁴ Ma ze wu ze koŋge la, wu bile ze si jɛn ze sɛriwoloo wɛ, ɲahaa sɛriwuuli wa na sariye woo na yaa na Musa wo saliyaŋee. ⁵ Peraa baare de mu si koŋge la ge tiri wa arijinna wo jaaŋe. Baare te zi nahi mɛ ge tiri wa yafiin wɛ, ti ɲɛ Musa wo caŋɲiine wure yi. Liri wonaa nahi na Musa wu vanŋge sigɛ woziige yaa ge, a klɛ wu se na yaaganne wuraa sye wu la ɲaŋge ɲuŋoo ge, na liri yaaganne la wa yaa wu ki yaa. ⁶ Na baare te kan Yezuu nimɛrɛ ge, tiraa pɛlɛ sɛriwuuli sanmbi pone wore la. Ɲahaa Yezu a Klɛ na tisa wo bɛnŋe yahi wovomo, wuri wa pɔrɔ woziiŋe la ge, wuri wo nusaanre ti wa na ɲɔmiine kan le mu le fanhatɔ woziine la ge. ⁷ Bɛŋe wu ze Klɛ na wu tisili sohomoo ge, ma ze finɲɛŋe ze je wuun wɛ, Klɛ ze si wu yaa di yahi wovomo yi. ⁸ Klɛ ze piinŋge san wu tisili ɲuŋoo. Liri la na caŋge ka si ba nɔ, Kafooŋaa liri jo. Ne si ba na bɛŋe tɛrɛŋɛ di ze wovomo na Yisirayɛli wo sigɛ tisilii, Zuda wo tisili. ⁹ Wuri na woziiŋaa si ba ze nigin wɛ, we ne teeŋe na pe tiibii caŋge ne pe yiige Misira kenee ge. Ɲahaa pe sɔn na ne bɛŋe pɛlɛ yi ge, liri la ne mu a na yɛ wuu pee. Ne Kafooŋe wa jo mu. ¹⁰ Cere cabigi dorogɔ nohaa, bɛŋe ne si ze na Yisirayɛli nagoobii ge, wure wa weree. Ne Kaafooŋaa jo mu. Ne bile a si na saliyaŋe sin pe zɔnli la. Ne kaane li tiin pe funŋoo. Ne si ba ze pe Klɛŋe, pere di ze na tisili. ¹¹ Liri tɛnee, pe mu wa mu a si jɛn wu ceboro , wala wu kariɲii kala ne kaanee nuŋi ni wɛ. Ŋahaa pe pone muu a si ba ne cɛn, na lɔ nagoobi la fɔn na sa nɔ wolyebi la. ¹² Ne si ba pe kapegi muu foone le pe la. Ne si ba pe kapegi kaane yahi na zɔnŋe la nuŋini wɛ. ¹³ Klɛ ba bɛŋe wovomiŋe kaane jo, liraa li sye na wolyeŋaa dɔri nuŋini wɛ. Yage ge ba ze ko dɔri nuŋini wɛ ge, kiri wo tɛrɛkoonaa nɔ.