¹ Mɛlikisedɛki ze Salɛmu wo kanhe wo fanhafooŋe, na fara yɛriye pone ɲuŋufooŋe wo sɛriwoloo wu ze. Ibirayimaa sa dɛrɛɛ na yiri fanhafyebi pii wo yogo tasegee, liraa li ta yogaa taan wu la, a Mɛlikisedɛki wu ciri na dubaŋe se wuun. ² Yɛriye pone Ibirayimaa ta na yiri yoge tasegee ge, a wu yi jagaŋe kan wuun. Mɛlikisedɛki wo nohe ki wa na fanhafooŋe wodiiŋe. Salɛmu wo fanhafooŋe wu ze, liri wo nohe wa na ɲaɲiŋge wo fanhafooŋe. ³ To wa wu la yi, nu wa wu la yi, taforogo wa wu la yi, cazege wa wu la yi, wu sunŋaa ku mu wɛ. Sɛriwoloo wu wa tɛne ponee mahi jo Klɛ Jaŋe. ⁴ Sɛngboo wu wa dɛ! Woro toŋe Ibirayima a yɛriye mu ta na yiri yoge tasegee ge, a wu yiri pone wo jagaŋe kan wuun. ⁵ Sɛriwuunaa kan Levi wo kanoho tisilii, saliyaŋe jo paa jagaŋe suu tisili bii muu pe wa pe cebiili ge. Na li ta pe mu pe fooei Ibirayima la. ⁶ Mɛlikisedɛki we jagaŋe sɔ Ibirayimaa na li ta wu wa Levi wo kanoho woŋe wa yi. Liri kadugo a wu dubaŋe se Ibirayimaa Klaa ze wu ɲɔge kan le muu la ge. ⁷ Nakara wa nii wɛ. Na dubaŋe sevooŋaa pɛlɛ dubaŋe tavooŋe la. ⁸ Levi wo kanoho tisili bii pe jagaŋe suu ge, peraa ba guu, ga jagaŋe wa sɔ Ibirayimaa gee, le jo na wuri wo sɔvooŋaa ku wɛ. ⁹ Levi wo kanoho tisili pe jagaŋe suu ge, pere mu ze jagaŋe yiige pe tolɛge Ibirayima wo cege la, lahi jɛn jo mu. ¹⁰ Ɲahaa tɛne Levi ze wu sanhi ze yi ge, Mɛlikisedɛki kari na sa wu tolɛge Ibirayima ciri. ¹¹ Saliyaŋe wu ze Izirayɛli nagoobaa tyeŋe ge, li nuun ze tyeŋe Levi wo kanoho tisili wo sariwuuli wo kerigi ɲuŋoo. Na pe kasegi pone yaa ce dafa, ɲuŋu ze li la sɛriwoloŋe watii wu pan nuŋge yi, we mu wu wa wu wa ba Arɔn ɲii wɛ, ga we mu wu wa ba Mɛlikisedɛki ɲii ge. ¹² Ba li wa yi, gariŋe ba je sɛriwuuli wo baare la, le yere fɔn gariŋe wu je saliyaŋe bile muu. ¹³ Sɛriwoloŋe mu wo juune li le jo nahimɛ ge, wuri wo toŋe wa muu a se na ɲa sɛriye wuuvoo wɛ. ¹⁴ Le fiinŋe na jo na Kaafooŋe nohaa foori Zuda la. Na li ta na Musa wo sɛbɛŋe wa muu a li sɛlɛɛ na Kirisiŋe wo tisili mu nii wa sɛriwuulii wɛ. ¹⁵ Ba li a yi, li ba jo na sarige wuuvooŋe watii wa, we mu wu wa ba Mɛlikisedɛki ɲii ge, le fiinŋe ¹⁶ na wuraa tyeŋe tiri baare la wu tolɛye wo cege la yi. Ɲahaa seŋe wa wuree wu tiin ɲii la tɛne ponee. ¹⁷ Kaɲene la, le jo Klɛ kayuunee wuri wo kaane la na: Mu a sii se tɛne pone muu wo sɛriwoloŋe Mɛlikisedɛki wo kanne la. ¹⁸ Liraa li sye na fɔlɔfɔlɔŋe wo kaane segannaa si nuŋi dɔri nuŋge yi, na liraa to, ɲahaa fanha ze li la uyi, pe za je yafiin ɲɔ yi. ¹⁹ Saliyaŋaa cɛn wo tagi wo se tisilee bii mu pe dafa yi ge, ga nimɛrɛ, woro cegaa tahi yage mu ɲuŋoo ge, kiraa pɔrɔ, kiri wo cege la wohi jɛn gbara Klɛ la. ²⁰ Na fara liri la, Klaa wu ɲɔge mu kan pe sanmbii mu wa se sɛriwoloŋe na li ta Klaa wu ɲɔge kan wuri wa muu wɛ. ²¹ Ga Yesu a se sɛriwoloo Klɛ wo ɲɔge ganŋe ɲuŋu tanŋ, a wu jo na Kaafooŋaa li jo na wahi, le ba gari wɛ. Muu, mu wa tɛne pone sɛriwoloŋe. ²² Liri wone la, bɛŋe Yezu tyeŋe woro na Klɛ sohomoo ge, wuraa pɔrɔ fɔlɔfɔlɔ woŋe la. ²³ Ba li wa yi, danfariŋe watii wa. Sɛriwuuli woɲɛhimaa toro, ɲahaa pe ze guu. ²⁴ Ga Yezu a sii guu wɛ, liri la wu sɛriwuune fyɛre wa tɛne pone muu woro. ²⁵ Liri kanne la, tisili muu pe gbara Klɛ la wuri wo cege la ge, seŋe wa wuun wu pere pohi niɲaa na ɲigɛ la, ɲahaa, wu wa wakeree na Klɛ ɲɛɛri pee tɛne ponee. ²⁶ Wuri sɛriwuuli ɲuŋufooŋe wo fiige ba jɛn woro makooŋe ɲɔ. Wa ɲɔ, jalaki taga wa wu la yi, wu kerigaa fiinŋe, wu taginaa wuu kapeziibi la, wa yirige na kari fɔn na sa nɔ fugbanŋe tagine la. ²⁷ Sɛriwuuli ɲuŋufeebi sanmbi ze ba sariye woo ɲigaa ɲiga, pe ze ba wɛraa pe wo kapegi wo fohi leŋe wo sarige wuu ban, na daa tisiire woge wuu. Ga Yezu a wu yɛ se saraga tisili wo kapegi ɲuŋu tanŋ tɛrɛ nigin yɛ pe. Sarige katii a yaa ki nuŋi ki wuu wɛ. ²⁸ Musa wo saliyaŋaa tisili nagoobi barigi baa fyebi se sɛriwuuloo ɲuŋufyee. Liri kadugo Klɛ ze wu ɲɔge kan kaane mu la ge, a wu liri se na wu Jaŋe se sɛriwuuli ɲuŋufoogbɔŋe, wuri wo kerigi pone ɲɔgaa taanna tɛrɛgi ponee.