¹ Na Yisirayɛli tisiire sohomoo Sɛrisuuli ɲuŋufoogbɔŋaa ba zɔɔnrɔɔ wuu, wu di Klɛ na tisili sohombe kerige sɔɔnri na tisili yakanye na pe sariye woo na gaan Klɛɛ kɔnni pe kapegi fohi da leni pe la. ² Bii pe ze pe Klɛ kone cɛn yi, na bii pe ze ba biri ge, wu ze ba jani na peri tari na fundangee, ɲahaa fanhagɔɔre ze wuri bile mu la. ³ Na liri la, wu ze ba yaa wu wu yɛ bile wo kapegi wo sɛriye wuu, wu di daa wu cɛn wu tisiire sanre wo kapegi woye wuu. ⁴ Na tisa ze si jɛn kiri mage wogbohe tahi wu yɛ la ki ɲɛ Klaa wu funŋe yiri mahi ba waa ze Aruna yiri wɛ. ⁵ Na liri la, li wa na Kirisita wa piri peembe tahi wu yɛ la na wu yɛ se Sɛriwuuli ɲuŋufoogbɔ yi, na ga Klɛ wa piri peembe tahi wu la na jo na wuri Klɛ wo Jaŋe wu wa, na wuraa se wu Toŋe niɲaa. ⁶ Na le nuŋaa sɛbɛ Klɛ kayuune tage katii na Klɛ jo na wa se Sɛriwuuliɲuŋufoogbɔ tɛrɛgi muu ba Mɛlikisedɛki ɲii. ⁷ Na Yezu yahi ge koŋge la, wu ze li cɛn na Klaa si jɛn wu sɔ kuŋe la. A wu wu yɛ tirigaa san, na Klɛ gbagaa ɲɛɛri na mɛgboonee fɔn na ɲɛsinmbe tirige. A Klɛ wu ɲɛɛrige sɔ, ɲahaa wu ze wu yɛ tirigaa san Klɛɛ. ⁸ Na wu yahi mu Klɛ Ja, wa sɔn na Klɛ wo mɛjuune co ɲaage funŋoo. ⁹ Na ba wa kolo liri kanne la na fa yi, liri la tisili muu pe nuri wu ɲɔɔ ge, wa se pere muu ɲuŋu wuu tuka. ¹⁰ Na a Klɛ wu wuu na se Sɛriwuuliɲuŋufoogbɔ ba Mɛlikisedɛki ɲii. ¹¹ Na keree woɲɛhiŋɛɛ wa pere pe jo pee Sɛriwuuliɲuŋufoogbɔŋe wo kaane ɲuŋoo, na ga ba pe wa pe keree cɛnmaa taan wɛ, pere ba ce jo pee lahi wahi pe di ce tasɛge cɛn. ¹² Na nimɛrɛ ze yaa ki pe ta paa se pii wo kalivyee, ga pe sanhi di ɲɛ fɔn wa waa pe kalaa Klɛ kayuune kerigi woziigii. Na jiribe pe yaa na pee, pe si jɛn yalitigbilige li wɛ. ¹³ Na tisaŋe wa jiribe yɛ ŋgbɔri ge, na tibinnaɲigɛ wuraa ba ze, wa ba si jɛn kaɲene cɛn di wuu kafire wɛ. ¹⁴ Na ga, tisili wolyebi pe ba liŋe wotigbiliŋe li. Na ba peraa tye wuri liŋe la yi, a pere fungɔnye ta na jɛn kaɲeŋgi cɛngi na woo kafiree.