¹ Na Klaa wu ɲɔge kan peree na ŋmɔŋge tage wuraa gbegaa yahi ge, pahi ba jɛn je kiree. Na liri la, paa pe yɛ kasye gbaga paa zi kɔnni pe wa mu nigin mu ba ba diin jebaa ɲɔŋge tagee wɛ. ² Na ɲahaa kanne la Klɛ kayodaannnaa jo peree ge, na mu laa ze jo bii muu. Na ga liri kayuunaa la ɲɔ pe la yi, ɲahaa paa ze taa na zɔn li la yi. ³ Na pere pe daa ge, na pere pe si ba je kiri ŋmɔŋge tagee, kiri tage wo kaane la Klaa ze jo na wuri loyirine funŋoo wuraa kaa wu yɛ la na pahi zii da di je kiri ŋmɔŋge tagee wuraa ze gbegee na yahi wɛ ge. Klɛ ze wu baare muu se kɔ fɔn koŋge nusange tɛnee, ga a wu digi liri kayuune jo. ⁴ Na ɲahaa le jo Klɛ kayuune sɛbɛŋee cewuune caŋge gbarisɔnwoge kaane la na Klaa wu baare muu se kɔ siiye gbaariŋe funŋoo, caŋge gbarisɔnwogee na ŋmɔ. ⁵ Na le jo toro na pahi zii ba da di je wuri wo ŋmɔnge tagee wɛ. ⁶ Na le se mu, bii pe ze fɛnhaa Klɛ kayodaanne loge ge, peraa taa je kiri ŋmɔŋge tagee wɛ, ɲahaa pe ze taa na zɔn liri kayuune la yi. Na liri la, pii tii pe si ba je kiri ŋmɔŋge tagee. ⁷ Na liri funŋoo a Klɛ nuŋaa caŋge katii tyeeŋe na kiri mage yiri niɲaa. Na a li mɔ a Klɛ ba li jo Fanhafoo Dawuda wo cege la, mahi jo ba le jo toro yi na pe ba Klɛ mɛjuune logo niɲaa, pe ba pe ɲiwegi wahi wɛ. ⁸ Ŋmɔŋge kaa Klɛ ze zi ge, ki ba da kiri ŋmɔŋgee Zozuwe ze sa Yisirayɛli tisiire leŋe, Klɛ ze zahi nuŋi ba jo caŋmɔŋge katii wo kaa la yi. ⁹ Na liri la, ŋmɔŋge Klaa ŋmɔ caŋge gbarisɔnwogee ge, kiri ŋmɔŋge fiige wa Klɛ wo tisili ɲaha la pe ba ŋmɔ. ¹⁰ Na we muu ba je Klɛ wo ŋmɔŋge tagee ge, kanne la Klaa ŋmɔ wu wo baare la caŋge gbarisɔnwogee ge, mu wu funŋe muu a ba ŋmɔ wu wo baare muu la. ¹¹ Na liri la, pe wahi pe yee pe di je kiri kiri ŋmɔŋge tagee. Na paa pe yɛ kasye si kɔnni pe wa muu a ba diin jebaa kiri taŋmɔŋgee ba bii ɲiwewagaa tisili ɲii wɛ. ¹² Na Klɛ kayuune wa ɲii la, li fanhe da ɲɛhi. Na li ɲɔgaa taan ɲɔyosɔɔn ŋmɔpanŋge ɲɔge la. Na le ba je tisaŋee na wu jaaŋe na wu munaane waagi yi yaa, na kaciiye na yi sinmbe waagi yi yaa. Na le ba jɛn tisaŋe funŋu kerigi na wu fungɔnge wo kerigi saa na jɛngi. ¹³ Na yage ka muu wa na Klaa ge mu ɲaa wɛ ge. Na yɛriye muu yi wa tafagee Klɛ ɲɛwiinee, ka muu a ŋmohi wu la yi. Na wuri Klɛŋee wo muu nigin niginŋaa si ba za wo kerigi ɲaha jo. ¹⁴ Na sɛriwuuli ɲuŋufoogbɔŋe wu wa pee, wuri ɲɛ Klɛ Jaŋe Yezu ge, na wa lugi fungban fɔn na sa nɔ Klɛ ɲaha niŋee. Na liri la, pe wahi pe yee pe di diin pe danayaŋe funŋoo. ¹⁵ Na sariwuuli ɲuŋufoogbɔŋe wu wa pee ge, na wa ba pe ɲiɲaare si, na pe tari pe fanhagɔɔre kerigi la, ɲahaa kanne la Sutaannaa pere sɔnnaa waa kapegi zeŋe la ge, mu wa wuri mu ɲahaa wii, ga wuraa kapiine la muu fiige se yi. ¹⁶ Na liri la, pe gbara Klɛ fanhafɛɛre, na wu cembe wo kone la na zɔndaraŋee kɔnni wu pe ɲiɲaare se, liri na kɔnni waa ɲɔgi pe la wu da pe tari li tɛrɛɛ.