¹ Na liri la, wuri cebiili Klaa wuu na se wu yɛ woloo ge, na paa Yezu wii. Na pere wo Klɛ konee wuri wu wa Klɛ tudunmuŋe na Klɛ sɛriwuuli ɲuŋufoogbɔŋe. ² Baare maga la Klɛ ze Yezu yiri ge, wa tiri se na ɲomiifɛɛree mahi jo kanne la Musaa se ɲomiifoo wu wo baare la Klɛ sigɛɛ wɛ. ³ Na kanne la sigɛ yereŋevooŋaa ba mage ta na toro wu sigɛ woyereŋge la ge, liri kanne la Yezu wo tayeregaa pɛlɛ Musa woge la. ⁴ Na siinye muu na yi yereŋevee pe wa, na ga yɛriye muu wo tirigivooŋe wu wa Klɛ. ⁵ Na Musa kɔnnaa se baasii ɲomiifoo Klɛ wo sigɛ funŋoo. Na Klɛ wo kayoŋgi wu ze ba dorogi. ⁶ Na ga Yezu Kirisita wu wa Klɛ Jaŋe ge, wuraa se ɲomiifoo Klɛ wo sigɛ ɲuŋoo. Na tage la wo cege tahi na zoŋi ki la ge, wo ba diin wuri daaŋe funŋoo, wohi ze kiri sigɛ wo tisilee. ⁷ Na liri la Klɛ wo Yirimbaa li jo na pe ba Klɛ mɛjuune logo niɲaa, ⁸ pe ba pe ɲiwegi wahi mahi jo tɔɔgee pe tolɛyaa ze kaanri na Klɛ ɲɔge yegee sipooŋee wɛ ge. ⁹ Na kiri tagee pe sefelɛyaa ze kaanri wuri Klɛ la, na wuri ɲɔge yegee, na ta keregi muu wuraa se yee gbeyisɔɔnŋe funŋoo ge, pe cere ɲa. ¹⁰ A liri la, wuri zɔnŋe yirige pere tisili tanŋ, a wuri jo na tɛrɛrɛgi muu pere tisili fungɔnyaa ba pe wirigi, na pe sanhi zii wuri wo kone cɛn yi. ¹¹ Na a wuri loyiriwoŋe kaa wu yɛ la na jo na taŋmɔŋge wuraa gbegee pe maga la ge, pahi zii da di je kiree wɛ. ¹² Na liri la do, wuri cebiili paa pe yɛ kasye si, beŋe na daabaaŋe ba ze pe wa muu wo zɔn la wu sa wu se wu li se siŋe kanvooŋe Klɛ la yi. ¹³ Na ga na li tɛne sanhi yahi li ɲɛ pee, paa pe yɛ yɛrɛgi ɲiga na kimuguro kɔnni pe wa muu ba beŋe yahi wu wu faan wu ɲiwiine li wahi wɛ. ¹⁴ Na danayaŋa peraa se Yezu la tɛrɛziinee ge, pere ba diin wuri danayaŋe funŋoo na sa nɔ kɔkɔɔre la, liri funŋoo pahi ze Yezu wo kariɲii. ¹⁵ Na le jo Klɛ wo Kayuune sɛbɛŋee na pe ba Klɛ mɛjuune logo niɲaa, pe ba pe ɲiwegi wahi mahi jo ba tolɛyaa ze kaanri Klɛ la yi ge. ¹⁶ Na nɔgɔ ye paa ze Klɛ mɛjuune logo na digi kaanri wu lɛɛ? Na na bii muu Musaa ze sa voori Misira kenee ge, na pere pe wa. ¹⁷ Na nɔgɔ ye tanŋ Klɛ zɔnŋe ze yiri yee gbeyisɔɔŋe funŋoo yɛ? Na bii paa ze kapiine se a pe muu ku sipooŋe ge, na pere pe wa. ¹⁸ Liri na ba Klaa ze kaa wu yɛ la na jo na pahi zii da di je wuri wo ŋmɔŋge tagee wɛ, na nɔgɔ kaa wa ze zi yɛ? Na bii paa ze kaanri wu la ge, na pere paa ze. ¹⁹ Na liri kanne la perea li ɲa na pere tisili wo daabaaŋaa pe se pe cɛn je kiri taŋmɔŋgee.