¹ Na liri la, kaɲene wo kayuune pe logo ge, pe ba ze pe zaa pe piin wɛ, pe funŋu gbaga pe to liri kayuune la. ² Na kayuune mɛlɛkɛlaa fɛnhaa jo ge, pe ze li le sɛɛrɛɛ. Bii pe ze pe liri kayuune pɛlɛɛ wɛ ge, ɲaage ki ze ba yaa na peree ge, kiri ze ba ze pere la. ³ Na Kaafooŋaa munahi bohiŋe wo kaane jo, a liri wo logovyebi ba li fiinŋe na jo peree. Na liri li wa kagboone ge, na pere ba ze pere ɲɛ liri logo yi, na pere di si ba ze dii pe zɔ? ⁴ Na Klɛ bilaa li sye na keɲene pere tisili wo kayuune wa kasyɛgi, na kakanhiŋgi na kagbohi muu fiigee, liri na wa kerigi cii wo se kan pii wu Yirimbe wo cege la, na yaa na wu bile wo mudaanmbee. ⁵ Na ɲiga wo koŋge kaane peraa yu ge, na pe wa mɛlɛkɛlii Klaa kiri wo ɲuŋufɛɛre kan yi. ⁶ Na ga le jo Klɛ kayuune wo sɛbɛŋe tage kaa na tisa wa ɲahi wu sa wii wu yiri yɛ? Na Adama sanŋe wa ɲahi wu sa wu kasye si yɛ? ⁷ Na wa wu tayerege se ke nɔ mɛlɛkɛli woge la yi tɛrɛ sisiire yɛrɛ; na saambe na peembe tahi wu la, na yɛriye muu tirigaa san wuun. ⁸ Na Klaa yɛriye muu tirigaa san wuun, liri wo nohe wa na yage ka muu wa wu ɲuŋoo wɛ. Liri na li muu, peraa sanhi li ɲa na yɛriye muu a tirigaa san wuun wɛ. ⁹ Na ga le kasyɛgɛ peraa se ge, liri li wa na Yezu ze tirige mɛlɛkɛli nɔhi na tɛrɛ sisiire yɛ se. Na a wu sɔn na ɲaana na ku tisili muu ɲɔtaga Klɛ wo cembe kaa la. Na nimɛrɛ wa ɲuyirige na peembe ta, ɲahaa tisili wo ɲuŋo kpɔnmɔ wa ku. Klɛ wa yɛriye muu tirige, yi muu di ɲɛ wuri woyo. ¹⁰ Li ze sahi Klɛɛ wu Yezu se wu ɲaana kɔnni wu cɛn wu tisili woɲɛhimɛɛ kilee wu ba leŋe wu wo saambee. Na ɲahaa Yezu wa ba se na tisilii bohiŋe tagee. ¹¹ Na Yezu wa ba tisili kapegi jii lari pe la ge, wuri na bii wo kapegi wa ba je lahi pe la ge, Toŋe wonumuŋe wu wa wuri na pere la. Na liri la, siige wa wu la waa pe yiri na wu cebiilee wɛ. ¹² Liri funŋoo wa li jo Klɛɛ na wuraa si ba wu kaane yu wu cebiilii, wu di ba wu kɛri wu tisiire sohomoo. ¹³ Na a wu jo mu na wuraa si wu cege tahi Klɛ la. Na nuŋaa jo na nagoobi Klɛɛ kan wuree ge, na wuri wu we na peree. ¹⁴ Na liri la, Yezu a cere kaare lɔ, na ba ze mahi jo tisili sanmbi, ɲahaa tisili pere nagoobi wa. Wa liri se kɔnni wu guŋe ce kunnuŋi, sutaanna cee kuŋe wo fanhe wa ge, wu cɛn wu wuri wo fanhe kɔ; ¹⁵ liri na kɔnni bii muu kuŋe wo saare ze se bululoo pe siŋe muu ge, wu cɛn wu pere wuu tiri buluree. ¹⁶ Na kaɲene la, Yezu a pan wu ba mɛlɛkɛlɛɛ tagi wɛ, na ga Ibirayima wo kanoho tisili wa pan na ba dari. ¹⁷ Na liri la, li ze yere fɔn wu se tisa ba wu cebiili ɲii, kɔnni wu cɛn wu se pe Klɛ wo sɛriwuuli ɲuŋufoogbɔ, wemu wo ɲiɲaare te pɛlɛ, na baare si na ɲɔgi Klɛɛ ge, liri na kɔnni wu cɛn wu tisili kapegi foone se laa leni pe la. ¹⁸ Na nimɛrɛ, bii pe wa nɔjuuree ge, Yezu ahaa jɛn pere feebi tagi, na ɲahaa wu mu a toro nɔjuure funŋoo, liri na wa ɲaage se.