¹ Bə-zhɔ-zhe wɔ́ pyɔ̌ : bə̀ dwə́ né n’ê kəkə ; Ń jě ń pyɛ̀lɛ̀ də̀gwã́ y yó màlɛ́kabá yó wə́ : cɛ y n’ê zhízhǐ. ² Bə̀-zhɔ-zhe wɔ́ nánfɔ̀lɔ̀ Səyɔ̃ wẽ́, ń wɔ́ dɛ̃̌dɛ̃̌ dwə́ né gakó yó wə. ³ Bə̀ dwə́ né gakó zǔl ǹ yil ré nánfɔ̀lɔ̀ w rə̀ mə̌ ǹdə́ nyɔ̀mɔ̀ mɔ́ ! Bə̀ rə̀ wɔ́ pwɛ̃́pwɛ̃́ ! ⁴ Bə̀ dwə́ né zǔl pyɔ̌ mɔ́ ń só cángá tumə né mó ! wɔ́ ǹmyɛ́ ǹ ce cángá tumə zhǐ kẽkẽ, ǹmyɛ́ ǹ nə́ ǹ twĩ̀ cángá tumə né ǹdə́ tumə né nyɛ̀bɛ́ nə̀ mə̌ mɔ́ Zhakɔbɛ wẽ́. ⁵ Zǔl-nə Bə-zhɔ-zhe, nə́ Yi rí, s’á wùlì ń yé né ń nèrh kùr w ń də̀gwã́ y yé né ! Bə̀ ń wɔ́ pwɛ̃́pwɛ̃́ ! ⁶ Muyiisi ǹdə́ Aarɔ̃ y’à tó bə̀ ŋwɛ́nɛ́ ń vwĩ̀-zwə́lnə bé wẽ, Səməwəə myɛ yà ń ŋwɛ́nɛ́ lyì bí byɛ̀bé bə̀ n’ê byẽ̀ ń yil ré mó wẽ́, Bə̀ y’à n’ê byẽ̀ Bə-zhɔ-zhe, sə ń yà ń nə́ ń zwẽ bə̀ lwə̌l mó. ⁷ Ń yà ń nə́ ń zɔ̀m ǹdə́ bɛ́ ébɔ̃ w wa ; bə̀ bə̀ y’à n’ê tó ń sɔ́msɛ́ bə zwẽ ń nyə́ né ń yà ń nə́ ń pɛ bɛ mɔ́. ⁸ Nə́ Yi, Bə-zhɔ-zhe, ǹ yà ǹ zwẽ bə̀ lwə̌l mó, Ǹ yàl Yi tɛ̀bɛ́ rə̀ wɔ́ sǔbri cə́bal bə̀ yilə, sə ǹdə́ rə̀myɛ́ ga ǹ pɔ bɛ còrhò-tum bə̀ dwə́ə́ré yilə. ⁹ Zǔl-nə Bə-zhɔ-zhe, nə́ Yi rí, s’á wùlì tɛ̃́ ń yé né ń pyɔ̀ w yó ! Bə̀ Bə-zhɔ-zhe nə́ Yi rí wɔ́ pwɛ̃́pwɛ̃́ !