¹ Wɔ́ Bə-zhɔ-zhe ń wɔ́ pyɔ̌ mɔ́ : Rə̀myɛ ce cɛ, zɛ̃̀ ń fùù ǹdə́ wu-nyɔ̃̀, Sə cɛmɛ nɛ́ nánzhəzhǒ w nə̀ jě nɛ̃̀ mɔ́ cəcəl w mó, zɛ̃̀ nə wɛ̀rhɛ́ wu-nyɔ̃̀ ! ² Bə́ban ǹdə́ cə-byṹ kə́kɛ́lɛ́ mɔ, ń pyɛ̀lɛ̀ də̀gwã́ y kùr rí cĩ́ cángá tumə né ǹdə́ zhə̀n rɛ́ yó. ³ Myǐn ŋwɛ́nɛ́ ń yé né mə̀ n’ê zhə̀l mə̀ jí mə̀ kə́kɛ́lɛ́ ń zwə̀ bé gə́ ŋwɛ́nɛ́ má, ⁴ Ń dwà y lyə́lyɔ̀mɔ́ n’ê yə̌r lũ wə́, cɛ y yírhə́ nə pwẽ̀ ré e zɛ̃̀ è n’ê zhízhǐ ; ⁵ pyàr rɛ́ n’ê yə̌l Bə-zhɔ-zhe yé né ǹdə tù-mɔ ta, Cǐnnə mó mɔ̀bɔ́ ń cǐ cɛ y gakó mó yé né. ⁶ Dɛ̃̌ yə né n’ê bwə̀l ń cángá tumə né nə̀ byili, dwə́ né gakó zɛ̃̀ nə̀ nə ń zùwə́ yə́. ⁷ Bə̀ cìzhìl jí byɛ̀bɛ́ bə̀ n’ê cèrhé wẽ̀ ré numbyíní mɔ rə nyɛrhɛ ǹdə yi ta mɔ́, bə̀ n’ê zə rɛ bə̀ zhẽ̌ bə̀ cìn dɛ̃̌ mɔ́. Yə né gakó m’a wùlì Bə-zhɔ-zhe yé né. ⁸ Səyɔ̃ nyɛ̀ɛ̀ rɛ, n zɛ̃̀ n fùù ǹdə́ wu-nyɔ̃̀, Zhidə bə̀kwá bɛ́ zɛ̃̀ bə̀ ŋwɛ́nɛ́ wu-nyɔ̃̀ wẽ́, Ǎ Bə-zhɔ-zhe, nyǐ wɔ́ bùrsi ǹ kɔ́ mɔ́ yilə. ⁹ Ǎ Bə-zhɔ-zhe ! nyǐ wɔ́ ǹmyɛ́ ǹ Dɛ̃̌Dɛ̃̌ cə́bal mɔ́ cɛ y yó mó. Ǹmyɛ́ ǹ pyɛ̀lɛ̀ rɛ́ wɔ dɛ̃̌ yə né gakó yó. ¹⁰ Ámyɛ̌ byɛ̀bɛ́ gakó á só Bə-zhɔ-hze mó, súl-nə lwɛlɛ rɛ́ ! Bə-zhɔ-zhe nə́ ń yìlì lyì bí byɛ̀bɛ́ bə̀ zhí mu mú, Ń nə́ ń vwǎrh bɛ lyì-bəlwǎlsɛ́ jɔ̃̀ wa. ¹¹ Pwẽ̀ dù wu-cángá cə́bal yilə, sə wu-nyɔ̃̀ w dù wu-põ̀ cìnə́ bé yilə. ¹² Wu-cángá cìnə́, fǔ-na ǹdə́ wu-nyɔ̃̀ Bə-zhɔ-zhe wẽ́, s’á zǔl mo ǹd’á nwíísi ń gə́ wɔ́ pwɛ̃́pwɛ̃́ mɔ́ yilə.