¹ Nún-nə nwə̃́ə̃́ nándwə̃̀ á pə Bə-zhɔ-zhe ne ! Àmyɛ̌ byɛ̀bɛ́ gakó á ŋwɛ́nɛ́ cɛ y yó mó, nún-nə á pə Bə-zhɔ-zhe ne! ² Nún-nə á pə Bə-zhɔ-zhe ne, zǔl-nə ń yil ré, Bwə̌l-nə ń vwǎrh mɔ́ yò á byili dɛ̃ gakó. ³ Byili-nə ń zǔl mó tənèsé wẽ́, s’á byili ń tũ̀-fwààlɛ dwə́ né ne ! ⁴ Bə̀ Bə-zhɔ-zhe wɔ́ nánfɔ̀lɔ̀ ń mə̌ ǹdə́ còrhó ! bə̀ yə né gakó wẽ́ wɔ́ ńmyɛ̌ ń wɔ́ kɔn dɛ̀bɛ́ rə̀ wɔ́ kɔ̀-nyɔ̀mɔ̀ du ; ⁵ bə̀ dwə́ né gakó yə né wɔ́ numbyínsi sə̀ mɔ nɛ ; wɔ́ Bə-zhɔ-zhe ń wɛ̀rhɛ́ dɛ̃̌ yi rí. ⁶ Pwẽ̀ ǹdə́ jə́jɔ̀mɔ́ ŋwɛ́nɛ́ ń yé né, zùwə́ y pwẽ̀ ré jə̀jɔ̀mɔ́ mɔ́ ŋwɛ́nɛ́ ń jì y wə. ⁷ Dwə́ kwálsɛ́ lyì, pə-nə Bə-zhɔ-zhe ne, pə-nə Bə-zhɔ-zhe ne, zùwə́ ǹdə́ còrhó ! ⁸ Pə-na còrhó Bə-zhɔ-zhe ne ń yil ré yilə ! Zə-na paánsɛ á m’á b’ǎ zù ń jì y kɔ̀nɔ́ w wa ! ⁹ Wùlì-nə Bə-zhɔ-zhe yé né ǹdə́ wẽ̀ rə̀ n’ê jə́jɛ̀mɛ́. Ámyɛ̌ byɛ̀bɛ́ á ŋwɛ́nɛ́ cɛ y yó mó gakó ! kəkə-nə Bə-zhɔ-zhe yé né ! ¹⁰ Bwə̌l-nə á byili tənèsé lyì bí ni á wɔ̀ : Wɔ́ Bə-zhɔ-zhe ń wɔ́ pyɔ̌ mɔ́ ; wɔ́ rə̀myɛ́ è ce lũ w zhǐ kẽkẽ ò t’â dom yé ; Bə-zhɔ-zhe nə́ ń kɛ́ dwə́ ne bùrsi ǹdə́ cángá. ¹¹ Bə̀ dɛ̃̌ yə né fùù ǹdə́ wu-nyɔ̃̀, sə cɛ y wɛ̀rhɛ́ wu-nyɔ̃̀, sə nə̀-fɔ̀lɔ̀ w nɛ̃̌ mɔ́ mə́ ŋwɛ́nɛ́ ò wẽ́ mó myɛ zɛ̃̀ mə dom dweme, ¹² bə̀ gɔ sõ, ǹdə́ kɔn dɛ̀bɛ́ gakó rə̀ wɔ gɔ nɛ́ mɔ́ zɛ̃̀ rə fùù, sə swààlɛ́ cèmé né gakó zɛ̃̀ nə búbwéé ǹdə́ wu-nyɔ̃̀, ¹³ Bə-zhɔ-zhe yé né, bə̀ nyǐ ń bànà, ń bàn lũ w kùrsi kɔ́, ń la lũ w bùrsi kɔ́ ǹdə́ cángá, ń la dwə́ né bùrsi kɔ́ kɔn tó ǹdə ń zhə̀n ré ta.