¹ Bà-nà nə́ nún nə́ fùù ǹdə́ wu-nyɔ̃̀ nə pə Bə-zhɔ-zhe ne ! Búbwéé-nə nə́ búbwéé ǹdə́ wu-nyɔ̃̀ nə́ ce nə́ vwǎrh mɔ́ pàtá nə́kulu w ni. ² Bà-nà nə zǔl nə́ m’é vò ń yé né, Ji-nə nə́ ji nwíísi ń còrhó yilə ! ³ Bə̀ Bə-zhɔ-zhe wɔ́ Yi nánfɔ̀lɔ̀, ń wɔ́ pyɔ̌ nánfɔ̀lɔ̀ du yə né gakó. ⁴ Ńmyɛ̌ ń zhe cɛ y kùr rí gə́ zhə̀l rə vò rə zhí tɛ̃́ mə́gã̌ mɔ́ ń jɔ̃̀ wa, pyàr rɛ́ ywẽ né gə̀ zhə̀l nə zhí dɛ̃̌ mə̀gã̌ mɔ́ myɛ wɔ́ ńmyɛ̌ ń cǐ. ⁵ Nə̀-fɔ̀lɔ̀ w wɔ́ ńmyɛ̌ ń cǐ, bə̀ wɔ́ ńmyɛ̌ ń wɛ̀rhɛ́ wa ; cɛ y myɛ wɔ́ ńmyɛ̌ ń zɔ ń jɛ̃̀ n wɛ̀rhɛ́ ya. ⁶ Bà-na, wúli-na nə́ wùlì tɛ̃́ nə́ nə̀dwéné yó, Bə-zhɔ-zhe, nə́ wǎrhna mɔ́ yé né ! ⁷ Bə̀ ń wɔ́ nə́ Yi, nə́ zɛ̃̀ nə́ wɔ́ ń dwí ń nə́ ń kálá, nə́ wɔ́ ń vwàmá ń nə́ ń kál ń mə́ ń zhə̀lə̀, wɔ́ rə̀myɛ́ è ce, zà, á gə nyɛ̀ɛ̀ ń cəl ré, s’á cili ! ⁸ Bə̀k’á kù á wun ní ǹdə kɔn gə́ yàl nɛ́ Mərəba nɛ́ ta yé, ǹdə kɔn gə́ yàl nɛ́ Masa nɛ́ dɛ̃ rɛ́ yù w gɔ-elũ èpòlò wẽ́ mó ta yé, ⁹ gàà mɔ́ á dabá zhẽ̀ ne né, ǹdə́ bə j’à y’à nɔ tũ̀-fwààlɛ́ à twĩ̀ mú ga yírh wə. ¹⁰ À j’a nyɛ̌r dwí rí rə̀myɛ́ byinə shə́-èna, ce a zɛ̃̀ a wɔ̀ : Dwí rí rə̀myɛ́, wɔ́ dwí tɛ̀bɛ́ rə̀ wu w jé ; rə̀ yə̀l à sɔ́msɛ́ pár yé. ¹¹ Rə̀myɛ́ ce, a zɛ̃̀ a bwəl nyí ǹdə́ lyim a wɔ̀ : Bə̀ t’â la à shìrhə́ y jàà w zú yé !