¹ Bə-zhɔ-zhe ! ǹmyɛ́ ǹ wɔ́ kúrhí ni sãɔ̃ Yi rí, kúrhí sanna Yi, zɛ̃̀ ń bà ! ² Lũ w bùrsi cə́bal, Zɛ̃̀ dɛ̃̌, pə còrhò-tum cìn-byilu cìnə́ bé ne, kɔn mɛrhɛ ǹdə bə̀ gə́ twĩ̀ ní ! ³ Bə-zhɔ-zhe, lyì-bəmwǎlsɛ́ wɔ́ twər màngala, wɔ́ twər màngal lyì-bəlwǎlsɛ́ nə mà sə j’â n’ê jí bɛlɛ ? ⁴ Sə̀ n’ê zɔ̀m zɔ̀mà, sə̀ n’ê zɔ̀m jàn zɔ̀mà, sə̀myɛ́ shɛ̀bɛ́ sə̀ n’ê twĩ̀ lwɛlɛ rɛ́ mɔ́ gakó mó n’ê cèrhé sə̀ cìnə̀. ⁵ Bə-zhɔ-zhe, sə̀ n’ê nɔ̀m ǹ dwí rí tɛ̃́ sə bɔbɔlɛ, sə̀ n’ê nwɛ̀nɛ̀ ǹ cəl kɔn rɛ́ ǹdə vwàmá ta ; ⁶ sə̀ n’ê gwi ejə̀nə̀ bé ǹdə́ zhələ bé, sə̀ n’ê zal bə̀tǎlsɛ́ sə̀ gwi. ⁷ Sə zɛ̃̀ sə zhe : Bə-zhɔ-zhe tá ń nyǐ yé, Zhakɔbɛ Yi rí t’â nyǐ gàà mɔ́ yé ! ⁸ Ámyɛ̌ numbyín-èkwə̀r ré, dɛ̃̌-na á cìnə̀ ! Bə surhə zhe cìnə́, wɔ́ dǒ yi ní á la surhə zal ? ⁹ Lò mó mɔ̀bɔ́ ǹ wɛ̀rhɛ́ zhɛ̃̌ rɛ́ mɔ́, zhã̌ nɛ́ t’â cili nà ? Lò mó mɔ̀bɔ́ ń wɛ̀rhɛ́ yírhə́ né mó, yírhə́ né nə bə nɛ́ nɛ nà ? ¹⁰ Lò mó mɔ́bɔ́ ń nə́ ń ji tənèsé búlə́ mó, nə wàr còrhò-tum ń la pɔ nà ? ńmyɛ̌ mɔ̀bɔ́ ń nə́ pɛ surhə numbyíní ni mú ! ¹¹ Bə-zhɔ-zhe yě numbyíní bùlə̀ né, ń yě bə̀ nə̀ wɔ́ kɔn nánfò. ¹² Bə-zhɔ-zhe, wu-nyɔ̃̀ ŋwɛ́nɛ́ ǹdə́ lò mó mɔ̀bɔ́ ǹ nə́ ǹ ji mu búlə́ mó ! Mɔ̀bɔ́ ǹ nə́ ǹ cèrhè mo ǹ nyə́ né wẽ́ mó, ¹³ mùnì n zə ń cìn dɛ̃ tɛ̀bɛ́ zúzúnú gə tú ò zhe mo mó wẽ́, kɔn m’e yí gɔ́rɔ́ kù lyì-bəlwɛ̀lɛ́ y yilə ! ¹⁴ Bə̀ Bə-zhɔ-zhe tá ń yẽ̌ ń dwí rí ni yé, ń tá ń dwĩ̀ ń cəl kɔn rɛ́ nɛ tɛ̃́ yé ; ¹⁵ Bə̀ bùrsi kɔ́ mɔ́ m’a tó dwã ǹdə cángá tumə né ta, sə lyì bí byɛ̀bɛ́ gakó bə̀ wun ní wɔ́ cángá mɔ́ m’a lwar bə̀ rə̀ wɔ́ zhə̀nà. Wɔ́ mɔ̌ lò ń ŋwɛ́nɛ́ ń mà n zɛ̃̀ n bú ǹdə́ lyì-bəlwɛ̀lɛ́ y n pɛ̃ ? ¹⁶ Wɔ́ mɔ̌ lò ń mà n sɛ̃ nɛ lyì bí byɛ̀bɛ́ bə̀ n’ê wɛ̀rhɛ́ lwɛlɛ rɛ́ mɔ́ yé né ? ¹⁷ Bə-zhɔ-zhe gə yà ń yə̀ nɛ sɛ̃, à gə y’à lyɛ̃ làlà a vò a wɔ jàà y kɛ̀bɛ́ lò tá ń zɔ̀m è wẽ́ mó wə. ¹⁸ À gə y’à j’â n’â wə̀l bə̀ à m’à nà y mɔ́ ! rə̀myɛ́ yi ní ga ǹdə́ ǹ sónó kwɛ̃́ nɛ. ¹⁹ Bùlə̀ nánzəzhɔ̌ gə tú nə̀ nɔ dwã à wẽ́ nə̀ n’ê nwɛ̀nɛ̀ nɛ, ǹ cícú mú n’ê pɛ nɛ wu-nyɔ̃̀. ²⁰ Lyì-bəlwǎlsɛ́ shɛ̀bɛ́ sə̀ n’ê pyà lwɛlɛ rɛ́ ǹ nyə́ né bə̀ shɛ̀ rə̀ yò mó, nə wɔ̌ sə̀ m’a ce ń jòm sə̀ pyɛ̀lɛ̀ də̀gwã y yó ? ²¹ Sə̀ n’ê jòm dwã gùlú sə̀ la m’e bú ǹdə́ wu-cángá cə́bal mɔ́, sə pə dóó lò mó mɔ̀bɔ́ ń bə dóó zhe mó ne. ²² Sə Bə-zhɔ-zhe wɔ́ à shìrhə́ jàà, à Yi rí wɔ́ à pàtá nə́kulu, à n’â shèè né. ²³ Ń mà n ce bə̀ lwɛlɛ rɛ́ k’a jòm bə̀ yó, n ce bə jé tɛ̃́ bə̀ lwɛlɛ tumə né yilə ; wɔ́ Bə-zhɔzhe, nə́ Yi rí rə̀ m’a ce bə jé tɛ̃́.