¹ Lò mɔ̀bɔ́ ń ŋwɛ́nɛ́ Dɛ̃̌dɛ̃̌ cə́bal mɔ́ sono mó, rə̀-ná-cí nə́ ń shǐrh Dɛ̃̌Dɛ̃̌ cə́bal mɔ́ ywə́l mó wẽ́. ² À wò Bə-zhɔ-zhe ne : Wɔ́ ǹmyɛ́ ǹ wɔ́ à shòò jàà ǹdə́ à jàn jàà yá, à Yi rí tɛ̀bɛ́ à zhí rí mú ! ³ Bə̀ wɔ́ rə̀myɛ́ rə̀ n’ê vwǎrh mɔ́ kúmí zɔlɔ́ w ǹdə́ cím-bəlwɛ̀lɛ́ y ǹdə́ è zwini rí è m’ê twí mú wẽ́. ⁴ Ń mà n zə ń vɔ̀mɛ̀ nɛ́ ǹ pyìlì mú ǹdə cóló gə́ y’a wɛ̀rhɛ́ ò byǎ nɛ́, wɔ́ ńmyɛ̌ vɔ̀mɛ̀ nɛ́ kùr w ǹ mà ń nə shòò jàà nɛ́ ; Ń zhə̀n rɛ́ wɔ́ búlə́ ku ò n’ô cə̀r lò yé né búlə́ jàà wa, rə̀ wɔ́ búlə́ wẽ̀. ⁵ Ce ǹ tá ǹ la wu-zɛ̃̀ɛ̃́ wẽ̀ ywẽ dǔr cəcɛ̃ nɛ yé, ǹ tá ǹ la cama tɔ ywẽ dǔr nə́nyɛ́nɛ́ myɛ nɛ yé. ⁶ Ǹ tá ǹ la cím-bəlwɛ̀lɛ́ y è ŋwɛ́nɛ́ cə-byṹ wẽ́ è n’ê zhə̀l mó myɛ ywẽ dǔr yé, címí gə du nə̀nyɛ́nɛ́ sǎmpɛ̀rɛ́, e làà tɛ̃́ è n’ê gwi lyì myɛ, ǹ tá ǹ la è ywẽ dǔr yé. ⁷ Bá lyì mɔ̀rhɔ̀ gə tu ǹ jə̀gwã̀ nɛ, mɔ̀ɔ̀rhɛ shí tu ǹ jə̀jĩ́ ni myɛ, kaka də́-byǐ t’â la mɔ́ dwə̌rh yé ; ⁸ Wɔ́ ǹ yírhə́ dúdú ǹ mà ǹ mə́ ǹ nyǐ, sə ǹ mà ń nə lyì-bəlwǎlsɛ́ còrhò-tum rí tɛ̀bɛ́ rə̀ la sɛ yú mú. ⁹ Ǎ Bə-zhɔ-zhe ! Wɔ́ ǹmyɛ́ ǹ wɔ́ à shòò jàà. Ǹ zhe shìrhə́, ǹdə́ ǹ gə zɔ Dɛ̃̌dɛ̃̌ cə́bal mɔ́ n yə̀ ǹ shìrhə́ jàà ; ¹⁰ Eta, zwini də́-byǐ t’â la mɔ́ zal yé, címí də́-byǐ t’â la ǹ kòrhó nyí ni bwəlse yé. ¹¹ Bə̀ Bə-zhɔ-zhe mà n pə nyí ń màlɛ́kabá nɛ́ bə̀ yìlì ǹ sɔ́msɛ́ gakó ne ; ¹² Bə̀ m’a kwè mó bə zə bə̀ jɛ̀rh wa, ǹ nà t’â la nə́kulu ni mǎ yé. ¹³ Ǹ mà ń vò bɔrɔ w ǹdə́ kùwə̀ y yó, ń nɔ̀ bɔrɔ w byǐ y w dɔm mɔ́ nánjə́gɔ́rɔ́ w tɛ̃́. ¹⁴ Wɔ́ ń gə só né mó yilə, à m’a vwǎrh mɔ ; à yìlì mu, bə̀ ń yě à yil ré párá. ¹⁵ Ń mà n byẽ̀ ne, sə à m’a shɛ̀ mɔ ; à m’a yə̀ nɛ́ ǹdə́ mɔ zúzúnú wẽ́, a vwǎrh mɔ́, a zhẽ̌ ń yil ré dɛ̃̌ a pɔ̃ còrhó. ¹⁶ À m’a ce n wɛ̀rhɛ́ dwã nánzhəzhɔ̌ n sú cɛ yó, sə à m’a ce ń yírhə́ nə à vwǎrh mɔ́.