¹ Yi bal, Muyiisi yi-co. Bə-zhɔ-zhe ! ǹ yà ǹ yàl nə́myɛ̌ shòò jàà, byinə byinə gakó. ² Pyàr la m’e yə̀ nɛ́ mɔ́, Sə ǹ la ń mə́ ń wɛ̀rhɛ́ lũ w mú, ǹ jà ǹ wɔ́ Yi byinə nə̀ bə zhɔ̌ zhe yilə. ³ Ǹ nə́ ǹ ce numbyínsi ká sə vò cə-shó w wə, Ń zɛ̃̀ n wɔ̀ : Numbyínsi, ká-na a kwɛ̃̀ á vò cə-shó w wə ! ⁴ Bə̀ è gə wɔ́ ǹmyɛ́ yírh wə, byinə mɔ̀rhɔ̀ nyɛ̌ ǹdə də̀là nɛ ta, Ǹdə́ rə̀ gə tú rə̀ lyɛ̃ rə̀ k’ê tɛ̀nɛ́. Nə̀ nyɛ̌ ǹdə wɔ́ cəcɛ̃ e m’e yí cə-lár ta. ⁵ Ǹ nə́ n zal rɛ rə̀ lyɛ̃ ǹdə dàrhà ta ; Zhə̀nà, nəkɔkɔ́lɛ́ n’ê lyɛ̃ ǹdə wɔ́ gɔ ta : ⁶ Ò n’ô ce pùnə́ nəkɔkɔ́lɛ́, o lyɛ̃, bə̀ kwar w də̀dɛ̀nɛ́, o zɛ̃̀ o kù. 7 Ǹ lyim rí n’ê kwɛ̃́ nə́ba myǐn, ǹ lyim nánfɔ̀lɔ̀ n’ô ce nə́ kəkə. ⁷ Ǹ lyim rí n’ê kwɛ̃́ nə́ba myǐn, ǹ lyim nánfɔ̀lɔ̀ n’ô ce nə́ kəkə. ⁸ Ǹ nə́ ǹ ce lwɛlɛ bə̀ ǹ yé né, ń ce nə́ dwə́ə́ ré rə̀ shèè mó du ǹ pwẽ̀ wə. ⁹ Ǹ lyim rí n’ê ce nə́ dwã nɛ́ jé ; nə́ zɛ̃̀ nə́ n’é nyǐ nə́ byinə né nə̀ la tɛ̃́ tɛ̃́ shɛ́ɛ́ ǹdə sə́sɔ́mɔ́ ta. ¹⁰ Nə́ dwã nɛ́ cɛ yó mó n’ê yàl byinə shə́-shàlpyɛ̀, sə lyì bí byɛ̀bɛ́ bə̀ kú w nyɛ̌ nánkùlù mú n’ê wɛ̀rhɛ́ byinə shə́-lyɛlɛ ; sə tɛ̀bɛ́ numbyísí n’ê nɛ mɔ́ wɔ́ nɔ̀nɔ̀ ǹdə́ zúzúnú dúdú, sə̀ yi rí n’ê lyɛ̃ là là, nə́ zɛ̃̀ nə́ vò dɛ̃̌. ¹¹ Wɔ́ mɔ̌ lò ń mà n lwar ǹ lyim rí jàn rɛ́ párá, sə n nyɛ̀ ǹ lyim rí ǹdə ǹ gə́ nə́ ǹ yǎl nɛ́ ? ¹² Cèrhè nə́ba, mùnì ga nə́ lwar nə́ dwã nɛ́ gál cɛ̀nɛ̀, mùnì ga nə́ zwẽ ǹ surhə né nə́ cĩ́ nə́ wẽ́. ¹³ Bə-zhɔ-zhe, ká pyìrhí ǹ yé ń zǎ nə́ba ! Ǹ mà ń dɛnɛ ǹdə́ tú kɔn m’e yí dǒ dɛ̃ ? Dǔr ǹ tùntùnnə bé nɔ̀nɔ̀ ! ¹⁴ Pə nə́ba ǹ wu-bɔ̀nɔ̀ o sú nə́ wun ní, Eta, nə́ m’ǎ fùù ǹdə́ wu-nyɔ̃̀ twéé twéé nə̀ dwã nɛ́ cɛ yó mó gakó wẽ́. ¹⁵ Nə́ zwə̀ bé lwəl nə́ yó né tɛ̃́, nə́ nɔ zúzúnú byinə nánzhəzhɔ̌ ; Rə̀myɛ́ ce zɛ̃̀ ń kə́ pə nə́myɛ nɛ dwã nánzhəzhɔ̌ nə́ fùù ǹdə́ wu-nyɔ̃̀. ¹⁶ Byili ǹ tũ̀-fwààlɛ́ ǹ tùntùnnə bé ne, sə ǹ zùwə́ y yə̀ nɛ́ ǹdə́ bə̀ byǎ bɛ́ ! ¹⁷ Nə́ Yi, Bə-zhɔ-zhe mó sónó w yál nɛ́ ǹdə́ nə́ba ! Ce nə́ jɛ̃̀ tumə né zwẽ nyí, Zhə̀nà, ce nə́ jɛ̃̀ tumə né zwẽ nyí !