¹ Ezərəshiti lyì bal Etanɛ nwə̃́ə̃́. ² Àmyɛ́ m’a nún twéé twéé a pə Bə-zhɔ-zhe ne ń wu-bɔ̀nɔ̀ w yilə ; à m’a púr à nyí à bwə̀l byinə byinə gakó a byili bə̀ ǹ wɔ́ zhə̀n cə́bal. ³ À zɔ̀m a wɔ̀ : Bə̀ nyǐ ǹ wu-bɔ̀nɔ̀ w nə̀-kùr-jì y cĩ́ è zhǐ byinə nə̀ bə zhɔ̌ zhe yilə ; Ǹ cĩ́ ǹ zhə̀n rɛ́ kùr rí tɛ̃́ dɛ̃̌ Arəzana wa. ⁴ À zɔ dɔbrɛ ǹdə́ à lò mó à cír mó ; Nyǐ à bwəl nyí ǹdə́ à tùntùnnə Dəvyidi a wɔ̀ : ⁵ À m’a ce ǹ dwí rí j’a zhì kẽkẽ twéé twéé gakó, A cĩ́ ǹ pyɛ̀lɛ̀ də̀gwã̌ y nɛ́, e j’â zhǐ byinə nə̀ bə zhɔ̌ zhe yilə. ⁶ Ǎ Bə-zhɔ-zhe ! Dɛ̃̌ yə né n’ê zǔl mó ǹ tũ̀-fwààlɛ́ yilə, Sə byɛ̀bɛ́ bə̀ zhí mú mú n’ê zǔl mó bə̀ dwã gùlú w wẽ́. ⁷ Bə-zhɔ-zhe, wɔ́ mɔ̌ lò ń mà n nyɛrhɛ mɔ́ dɛ̃̌ yə né wə ? Wɔ́ mɔ̌ lò ń ŋwɛ́nɛ́ Yi byǎ bɛ́ cəcəl w ń mà n nyɛrhɛ ǹmyɛ́ ? ⁸ Yi ywẽ ré zhe lyì bí byɛ̀bɛ́ bə̀ zhí mú mú bə̀ dwã-gùlú w nánfɔ̀lɔ̀ w wa. Sə lyì bí byɛ̀bɛ́ bə̀ jě bə kə́kɛ́lɛ́ rɛ mɔ́, rə̀ jàn rɛ́ tumə né n’ê jàr bɛ, ce bə̀ gakó n’ê kəkə rə̀ yé né. ⁹ Bə-zhɔ-zhe, jàn cìnə́ bé yó-cə́bal Yi ! Wɔ́ mɔ̌ lò ń zhe jàn ń nyɛrhɛ ǹmyɛ́ ? Ǹ zhə̀n rɛ́ kə́kɛ́lɛ́ mɔ́ rə̀ n’ê jə́jɛ̀mɛ́. ¹⁰ Wɔ́ ǹmyɛ́ ǹ wɔ̌ nə̀-fɔ̀lɔ̀ w cìn-byilu mú ǹ ce ǹ gə́ só mə̀gã̌, ò nɛ̃̌ mɔ́ gə tú mə̀ zɛ̃̀ mə̀ n’ê fùù yi ní ; ǹ y’ǎ ce mə zhì shɛ́ɛ́. ¹¹ Ǹ nɔ̀m Ezhipti tɛ̃́ ń bɔbɔlɛ ǹdə cùù ta, ǹ zɔ ǹ jɛ̃̀ y jàn ǹ jì ǹ zwə̀ bé bə̀ dùr bə làà tɛ̃́. ¹² Wɔ́ ǹmyɛ́ ǹ cǐ dɛ̃̌ ǹdə́ cɛ yá, wɔ́ ǹmyɛ́ ǹ wɛ̀rhɛ́ lũ w ǹdə́ kɔn dɛ̀bɛ́ gakó rə̀ ŋwɛ́nɛ́ ò wẽ́ mó. ¹³ Ǹmyɛ́ ǹ wɛ̀rhɛ́ lũ jə̀-jĩ́ ǹdə́ ò jə̀-gwã̀ y ga ; wɔ́ ǹmyɛ́ yil ré wẽ́ Tabɔrɛ ǹdə́ Erəmɔ̃ ga n’ê fùù ní. ¹⁴ Ǹ vɔ̃̀ w zhe búlə́ jàn, ǹ jɛ̃̀ y zhe jàn, ǹ jə̀-jĩ́ y zhẽ̌ dɛ̃̌. ¹⁵ Ǹ pyɛ̀lɛ̀ də̀gã̌ kùr rí cĩ́ ǹ cángá y ǹdə́ ǹ zhə̀n rɛ́ tumə né yó. Wu-bɔ̀nɔ̀ ǹdə́ zhə̀n ŋwɛ́nɛ́ ǹ yé né. ¹⁶ Wu-nyɔ̃̀ ŋwɛ́nɛ́ ǹdə́ dwí tɛ̀bɛ́ rə̀ yě pɔ́lá y cəl ré párá mɔ́ ; Ǎ Bə-zhɔ-zhe ! wɔ́ dwí rí tɛ̀bɛ́ rə̀ n’ê zhə̀l ǹ pwẽ̀ ré wẽ́ ǹ yé né mó rə̀ zhe wu-nyɔ̃̀ wá. ¹⁷ Rə̀ n’ê fùù twéé twéé ǹ yil ré yilə, rə̀ m’ê pɛ còrhó rə̀ cìn ni ǹ cángá tumə né yilə. ¹⁸ Bə̀ wɔ́ ǹmyɛ́ zùwə́ è wɔ́ rə̀ jàn rɛ́ ; Wɔ́ ǹ sónó ǹdə́ nə́ba mɔ́ ò n’ô zhẽ̌ nə́ yó dɛ̃̌ ò byili nə́ jàn rɛ́. ¹⁹ Bə̀ wɔ́ Bə-zhɔzhe ń wɔ́ nə́ ku ò n’ô cə̀r nə́ yé né búlə́ jàà wa, wɔ́ Esərayɛl Yi rí rə̀ wɔ́ nə́ pyɔ̌ mɔ́. ²⁰ Ǹ zɛ̃̀ ń tó dàrhà dɛnnɛ ń zɔ̀m ǹdə́ byì-swěnə mó ń wɔ̀ : À sɛ̃ kã̀dɔ kúrhí ní, à zhẽ̌ ébɔ́-dǎl yó dɛ̃̌ dwí rí cəcəl wə ; ²¹ À nɔ́ Dəvyidi, à tùntùnnə mó, a cír mo a ló à nwə̃̌ y ń yó. ²² À jɛ̃̀ m’a kwɛ̃́ mɔ, sə jɛ̃̀ y m’a pɔ̃ wu-jɔ̀. ²³ Zù-bal mɔ́ tá ń la mɔ́ jǎr yé, lyì-bəlwɛ̀lɛ́ y t’â la mɔ́ nɔ̀nɔ̀ gaga yé ; ²⁴ À m’a nɔ̀ ń zwə̀ bé tɛ̃́ a bɔbɔlɛ, à mà byɛ̀bɛ́ bə̀ n’ê jí zùùri ǹdə́ mɔ mɔ́. ²⁵ À zhə̀n rɛ́ ǹdə́ à wu-bɔ̀nɔ̀ m’a yə̀ nɛ́ ǹdə́ mɔ, sə ń jàn rɛ́ m’a du à yil ré jàn yilə. ²⁶ À m’a ce ń jɛ̃̀ y zhì nə̀-fɔ̀lɔ̀ w yó, sə ń jə̀jĩ́ y zhì bwǐsí yó. ²⁷ Wɔ́ ńmyɛ̌ ń mà n byẽ̀ ne n wɔ̀ : Ǹ wɔ́ à da ! à Yi rí, à vwǎrh mɔ́ pyɔ̀ nə̀kulu wə́ ! ²⁸ Sə àmyɛ́ m’a ce n yə̀ à byìyə́ə́, ń yil ré dwene pyǎ bɛ́ cɛ yó mó gakó. ²⁹ À m’a zə à wu-bɔ̀nɔ̀ ǹdə́ mɔ́ twéé twéé gakó, sə à dɔbrɛ m’a yə̀ zhə̀n kɔn ǹdə́ mɔ́ ; ³⁰ À m’a ce ń nɛ̀mɛ́ j’â ŋwɛ́nɛ́ byinə nə̀ bə zhɔ̌ zhe yilə, ń pyɛ̀lɛ̀ də̀gwã̌ y yə̀ ǹdə dɛ̃̌ yə né dwã nɛ́ ta. ³¹ Sə ǹ byǎ bɛ́ gə tú bə̀ yẽ̌ à nyə́ né ne, bə̀ cẽ bə̀ t’â wɛ̀rhɛ́ ǹdə à sɔ́msɛ́ à byili mú, ³² bə̀ gə tú bə̀ dó à nyə́ né ne, bə̀ t’â wɛ̀rhɛ́ ǹdə à sɔ́msɛ́ gə́ n’ê byili ní, ³³ Zhə̀nà, à m’a pə bɛ còrhò-tum ǹdə́ də̀dɔ̀lɔ̀ bə̀ dóó w yilə, a zə mààrɛ a m’a pə bɛ còrhò-tum bə̀ yə̀-bəlwàálɛ́ yilə ; ³⁴ Sə ǹdə́ rə̀myɛ́ ga, à t’â la à wu-bɔ̀nɔ̀ w vǔr a yẽ̌ be gaga yé, à t’â la à zhə̀n rɛ́ myìnù yé, ³⁵ à t’â à dɔbrɛ́ cɔ̌ yé, à t’â la zɔ̀mɛ̀ rɛ́ tɛ̀bɛ́ rə̀ du à nyú w mú lyə́r yé. ³⁶ Dɛ̃ rə̀dù, à cìcì mú bwəl nyí a wɔ̀ : Àmyɛ́ m’a gõ̀ kɔma a pə Dəvyidi ni ? ³⁷ Ń nɛ̀mɛ́ nɛ́ m’a yə̀ nɛ́ twéé twéé ; ń pyɛ̀lɛ̀ də̀gwã́ y m’a zhì à yé né ǹdə nə̀nyɛ́nɛ́ ta ; ³⁸ è m’a yə̀ ǹdə cànà ta, e dɛnɛ byinə nə̀ bə zhɔ̌ zhe yilə. Bə̀ zhə̀n-cínnə mó ǹ ŋwɛ́nɛ́ dɛ̃̌ Arəzana mɔ́ wɔ́ zhə̀n cə́bal. ³⁹ Sə ǹdə́ rə̀myɛ́ ga, ǹ cìrh mɔ̀bɔ́ ǹ cír ń ló ǹ nwə̃̌ y ń yó mó ń ce kwã nɛ́ ! ǹ lyim rí zɛ̃̀ ǹdə́ mɔ̀bɔ́ ǹ cír mó. ⁴⁰ Ǹ pɔ cìzhìl dɔbrɛ́ ǹ zɔ ǹdə́ ǹ tùntùnnə mó ne ; ǹ co jìmdi ǹ pyɛ̀lɛ̀ yə́-pú w ni. ⁴¹ Ǹ wǔr ń byílsí gakó, ǹ ce jàn rɛ́ jààsɛ́ jǐrh jì-bwə̀r. ⁴² lyì bí byɛ̀bɛ́ gakó bə̀ n’ê sɔ́má y bə̀ lyɛ̃ mɔ́, zɛ̃̀ bə pwà ń wẽ́ ré bə yẽ̌ mo ; n jǐrh cìzhìl kɔn ń jě-dwã bɛ́ sono. ⁴³ Ǹ zhẽ̌ ń zwə̀ bé jə̀jĩ́ y dɛ̃̌, ń ce ń zwə̀ bé gakó fùù ǹdə́ wu-nyɔ̃̀ ; ⁴⁴ ń pɔ́ ń búlə́ shù w ò yə̀ ŋwɛ̀nɛ́ o kà yé, ǹ yə̀ mɔ sɛ̃ búlə́ né wẽ́ yé. ⁴⁵ Ǹ ce ń jə́jɔ̀mɔ́ mɔ́ jé, ǹ byerh ń pyɛ̀lɛ̀ də̀gwã̌ ń jí tɛ̃́ ; ⁴⁶ ń bɔ̀ ń bə̀sɔ́nɛ́ yi dwã nɛ́, n zə cìzhìl ń pú mú. ⁴⁷ Bə-zhɔ-zhe ! Ǹ m’ǎ shèè ǹ cìn gaga kɔn la m’e yí dǒ dɛ̃ ? sə ǹ lyim rí myɛ m’a kwɛ̃́ ǹdə myìn-zhù ta kɔn la m’e yí dǒ dɛ̃ ? ⁴⁸ Bə-zhɔ-zhe ! lyǐrh bə̀ nyǐ à byinə né bə já cɛ yó yé, sə wɔ́ nánfò yil ǹ wɛ̀rhɛ́ numbyínsí gakó ń cĩ́ cɛ yó nà ? ⁴⁹ Lò nə ŋwɛ́nɛ́ ń wɔ̌ ń mà n yə̀ cɛ yó n cẽ cú ? Sə rə̀-ná-cí mə n ŋwɛ̀nɛ́ n zwẽ ne cu mú jɔ̃̀ wa ? ⁵⁰ Ǎ Cǐnnə ! wɔ́ yẽ̀ ǹ wu-bɔ̀nɔ̀ nányóó zhə̀l né, kɔ̀bɔ́ ǹ yà ǹ bwəl ò nyí Dəvyidi ni ǹ zhə̀n rɛ́ wẽ́ mó tó né ? ⁵¹ Cǐnnə ! lyǐrh cìzhìl ré ǹ tùntùnnə bé nɔ mɔ́ yò, Sə́ lyǐrh dwí tɛ̀bɛ́ nánzhəzhɔ̌ w gakó à n’â nyǐ rə̀ wɔ́ yò à yil mó yò ; ⁵² Ǎ Bə-zhɔ-zhe ! Lyǐrh tùùrhí ǹ zwə̀ bé tùrh mó mó yò, tùùrhí tɛ̀bɛ́ bə̀ tó mɔ̀bɔ̀ ǹ cír mó kùr bə tùrh mó yò wə́.