¹ Nwə̃́ə̃́. Kore byǎ bɛ́ nwə̃́ə̃́. Nwíísí yé né cə́bal mɔ́. Nwə̃́ə̃́ bə̀ zɔ wíí bə m’e nún. Nwə̃́ə̃́ Eləmã ǹdə́ Ezərashiti nún. ² Bə-zhɔ-zhe, à vwǎrh mɔ́ Yi rí ! À n’â búbwéé ǹ yé né cəcɛ̃ ǹdə́ nə̀nyɛ́nɛ́ ga, à ce mó. ³ Mùnì ga sə à yi-co w vò o yí ǹ sono dɛ̃̌ Arəzana wa ! Cili à cǐl ré à n’â kúrh à wɔ́wɔ́lɛ́ mɔ́ cɛ̀nɛ̀ ! ⁴ Bə̀ nyǐ à sú ǹdə́ címsi dúdú, à zhǐ cu nyí ni. ⁵ À tó lyì bí byɛ̀bɛ́ bə̀ cù mú ni à la lú-bɔ̀l wa, à nyɛ̌ ǹdə lò mɔ̀bɔ́ ń jàn rɛ́ k’ê tɛ̀nɛ́ mɔ́ ta. ⁶ Bə̀ cĩ́ ni cùù ri wẽ́, ǹdə lyì byɛ̀bɛ́ bə̀ gu bə̀ pyě lú-bɔ̀ w ta, ǹdə byɛ̀bɛ́ ǹ kə́ ǹ tá ǹ lyǐrh bə̀ yò mó ta. Byɛ̀bɛ́ ǹ kə́ ǹ tá ǹ nyǐ bə̀ yò mó. ⁷ Ǹ kwè ne ń dol gɔ́rɔ́ nánlyilyùmú wə, cə-bṹ wə, gwáárɛ nánlyilyǔm ri wẽ́. ⁸ Ǹ lyim rí nánfɔ̀lɔ̀ w zhǐ à yó wə, Ǹ lyim rí zɛ̃̀ à yó w ǹdə zho ò n’ô dom nɛ̃̌ ta. ⁹ Ǹ jì à dɔwabá bə dùr à nyí ni bə vò yé né gaga, ǹ ce a jǐrh pɔrha kɔn bə̀ yilə ; À ŋwɛ́nɛ́ jù w bə pyi à nyí ni, à k’â wàr à dwi yé. ¹⁰ À yírhə́ né n’ê kwɛ̃́ myǐn à lyààrɛ́ wẽ́ ; Bə-zhɔ-zhe ! à n’â byẽ̀ mó dɛ̃ gakó, À zhẽ̌ à jɛ̀rh a ce ǹmyɛ́ nɛ. ! ¹¹ È nə wɔ́ lyì bí byɛ̀bɛ́ bə̀ cù mú ni ǹ nə́ ǹ màmyaarhɛ́ ǹ byili nà ? Nà cùùri wɔ̌ rə̀ zɛ̃̌ rə̀ zhì dɛ̃̌ rə̀ zǔl mó nà ? ¹² Lò nə mà n zhì lú-bɔ̀l w n zɔ̀m ǹ wu-bɔ̀nɔ̀ w yò, n zɔ̀m ǹ zhə̀n rɛ́ yò gɔ́rɔ́ w nánlyilyùmú w w nà ? ¹³ lò mà n zhì cə-byṹ wẽ́ n lwar màmyaarhɛ́ párá ? n zhì cɛ y kɛ̀bɛ́ lò kə́ ń wàr ń lyǐrh yò è wẽ́ mó wẽ́, n lwar ǹ màmyaarhɛ́ párá ? ¹⁴ Ǎ Bə-zhɔ-zhe ! À n’â byẽ̀ mó bə̀ ǹ bə̀ ń sɛ̃ à kúrhí, nyǐ nəkɔkɔ́lɛ́ gakó à n’â zɔ̀m à ce mó à yi-co w wẽ́. ¹⁵ Wɔ́ bə̀kɔ́n yil ǹ nə́ ǹ cìrh ne ǹ ce kwã nɛ́ ǹ nyí ni ? Wɔ́ bə̀kɔ́n yil ǹ nə́ ǹ shèè ǹ cìn à yé né ? ¹⁶ À wɔ́ zúzúnú cə́bal, à zhǐ cu nyí ni à bə̀sɔ́nɛ́ yi ní ga, Ǹ wu-zɛ̃̀ɛ̃́sɛ zhe ne, à wu w n’ô zhizhiri dɛ̃̌. ¹⁷ Ǹ lyimə né zɛ̃̀ à yó, à yò n’ô cɔ̀ ǹ lyimə né nə̀ zɛ̃̀ à yò mó yilə. ¹⁸ Ǹ Lyimə né kə́kɛ́lɛ́ nɛ dɛ̃ gakó nə ce dwã w ǹdə nɛ̃̌ ta, nə̀ j’a mú dwã nɛ nə mɔ́lɔ́ nɛ twər rə̀dù sá.