¹ Núnnə bé yé né cə́bal mɔ́… Davyidi nwə̃́ə̃́. ² À n’â cèrhé Bə-zhɔ̌-zhe ǹdə́ à wu gakó, À n’â byili ń tũ̀-fwààlɛ́ gakó. ³ Wɔ́ ǹmyɛ́ ǹ wɔ́ à wu-nyɔ̃̀ ǹdə́ à fùwə́ y kɔna, Dɛ̃̌ddɛ̃̌ Yi, à n’â nún ǹ yil ré ! ⁴ À zwə̀ bé n’ê twə̀r bə̀ la bə̀ kwã nɛ́, bə̀ n’ê twi tɛ̃́, bə̀ n’ê cì ǹ yé né. ⁵ Bə̀ wɔ́ ǹmyɛ́ ǹ nə́ ǹ sɛ̃ nɛ tɛ̀bɛ́ à mə̌ ǹdə́ rɛ mɔ́ yilə, Ǹ wɔ́ bùr-kárna cángá ǹ jě ǹ pyɛ̀lɛ̀ də̀gwã́ yó. ⁶ Ǹ nə́ ǹ pɛ còrhò-tum tənèsé ne, ń cɔ̀ lyì-bəlwɛ̀lɛ́ yá, ǹ nə́ ǹ pɔ́pɔ̌ bə̀ yilə né twéé gakó byinə nə̀ bə zhɔ̌ zhe yilə. ⁷ Zwə̀ k’ê tɛ̀nɛ́ nɛ́ yé. Jì-bwə̀r rə̀ zhǐ byinə nə bə zhɔ̌ zhe yilə ! Ǹ ló cə-fwààlɛ́ tɛ̃́ ! Rə̀ yò lyǐrh yò dɔ̀ tɛ̃́. ⁸ Bə-zhɔ̌-zhe nə́ ń jí pyɛ̀lɛ̀ byinə nə̀ bə zhɔ̌ zhe gaga yilə, Ń cĩ́ ń pyɛ̀lɛ̀ də̀-gwã́ y bùrsi bǔr yilə ; ⁹ Ń nə́ ń kɛ́ lũ w bùrsi ǹdə́ cángá, ń nə́ ń kɛ́ dwə́ né bùrsi ǹdə́ zhə̀nà. ¹⁰ Bə-zhɔ̌-zhe wɔ́ lyì byɛ̀bɛ́ bə̀ n’ê nwɛ̀nɛ̀ mɔ́ shòò jàà, bə̀ wu-zhìlù yi ní shòò jàà. ¹¹ Byɛ̀bɛ́ bə̀ yě ǹ yil ré pár mɔ́ n’ê zhí ǹmyɛ́ nɛ. Ǎ Bə-zhɔ̌-zhe ! Nyǐ ǹ tá ǹ yẽ̌ byɛ̀bɛ́ bə̀ n’ê pyà mɔ́ nɛ yé ; ¹² Nú-nə Bə-zhɔ̌-zhe mó ń jě Səyɔ̃ nɛ́ mɔ́, bwə̌l-nə ń tùm-fwààlɛ́ á byili dwə́ né cəcəl wə ! ¹³ Ń bə shɛ̀ jal tɛ̃́ ló yò yé, ń nə́ ń lyǐrh zúzúnú cìnə́ yò, ń tá ń swě bə̀ búbwéé e ce mo mó yò yé. ¹⁴ Bə-zhɔ̌-zhe, dǔr à nɔ̀nɔ̀ ! Nyǐ zwini rí à zwə̀ bé n’ê wɛ̀rhɛ́ nɛ mɔ́ màwé, sə́ vùr ne a k’a du cu bwə̀rsé wẽ́, ¹⁵ mùnì ga a bwə̀l ǹ còrhó w dwí gakó a byili, Səyɔ̃ bə̀kɔ́ mɔ́ bwə̀rsé wẽ́, sə a wɛ̀rhɛ́ wu-nyɔ̃̀ ǹ vwǎrh mɔ́ yilə. ¹⁶ Tənèsé n’ê twi gɔ́rɔ́ w sə̀ kù mú wẽ́, nyɛnsɛ́ shɛ̀bɛ́ sə̀ shèè sə pə̃ mɔ́ zɔ sə̀ nèrh ne. ¹⁷ Bə-zhɔ̌-zhe nə́ ń byili ń cìcì párá, ń nə́ ń kɛ́ kùrsí cángá, ń nə́ ń dol lyì-bəlwɛ̀lɛ́ y tum rí tɛ̀bɛ́ è jɛ̃̀sɛ́ wɛ̀rhɛ́ mɔ́ wẽ́. Dədala wẽ̀... note explicative. ¹⁸ Lyì-bəlwǎlsɛ́ n’ê kwɛ̃̀ sə̀ zhə̀l cùù ri wẽ́, wɔ́ tənèsé shɛ̀bɛ́ sə̀ n’ê swě Yi yò mó. ¹⁹ Sə bə̀ t’â swě zúzúnú cí yò gaga yé, Kɔn rɛ́ tɛ̀bɛ́ nɔ̀nnà nə́ ń dɛ̃̀ mɔ́ yò t’â zhìlì gaga yé. ²⁰ Ǎ Bə-zhɔ̌-zhe, zɛ̃̀ dɛ̃̌ ! Bə̀ká yẽ̌ numbyíní jí bɛlɛ yé ! Bə̀ tənèsé bə̀ ǹ yé né ń bùr sə̀ bùrsi !