¹ Ǎ Bə-zhɔ̌-zhe, wɔ́ bə̀kɔ́n è ce ! Ǹ zhǐ kwã nɛ́ kwã nɛ́ ? ² Lyi-bəlwɛ̀lɛ́ y pú zúzúnú cìnə́ bé kùr è n’ê jì ǹdə́ è cìn byilu mú, è zɔ bɛ sɔ́má y kɛ̀bɛ́ è tɛnɛ e cĩ́ bə̀ yil mó yó. ³ Lyì-bəlwɛ̀lɛ́ y n’ê zhẽ̌ è cìn ǹdə́ è bwɛ̃̌-dǔr mó, mɔ̀bɔ́ ń nə́ zal zúzúnú cìnə́ bé mó nə́ ń pɔ̀ɔ́sɛ Bə-zhɔ̌-zhe. ⁴ Lyì-bəlwɛ̀lɛ́ y n’ê zɔ̀m ǹdə́ jàn, e zhe : Ń tá ń pɛ còrhò-tum lò ne yé ! Yi tɛ̀nɛ́ gaga yé ! Nyǐ wɔ́ è bùlə̀ né gakó ! ⁵ È sɔ́msɛ́ n’ê zwẽ nyí twéé gakó ; Sə ǹmyɛ́ bùrsí n’ê zhə̀l dɛ̃̌dɛ̃̌ gaga sə yí ní yə, è n’ê bwí ǹdə́ è zwə̀ bé gakó. ⁶ È n’ê zɔ̀m è wẽ́ è zhe : À t’â la à nà mǎ a tu yé, à shèè zwini yé né twéé twéé gaga yilə ! ⁷ Bwəə́lse námməlwǎlsɛ ǹdə́ myìnù ǹdə́ yǔyǔ tumə sú è nyí ; È mə̀jòlò w wẽ́ wɔ́ surhə námməmyɛ̀lɛ́ ǹdə́ lwɛlɛ rə̀ ŋwɛ́nɛ́. ⁸ È zhǐ cɛmɛ nɛ́ nyí ni è n’ê dɛ̃̀, È n’ê gwi bə yò zhe cí jààsɛ́ shɛ̀bɛ́ sə̀ kɔl sə̀ wɔ kwã nɛ́ mɔ́ wa ; È yírhə́ pyǎ zúzúnú cí yó. ⁹ È zhə̀l e pyà jàà e vò è jě è dúdú ǹdə bɔrɔ ò pyě ò pwə́l w ta, e pyà jàà è jě è la m’e jàr zúzúnú cí ; E jàr mɔ e zə e ce è zɔlɔ́ wa. ¹⁰ È n’ê kúkúmí tɛ̃́ e pyẽ̀, zúzúnú cìnə́ bé bə̀ bə tu è jə̀-fɔ́r wẽ́. ¹¹ E zɛ̃̀ e wɔ̀ è wẽ́ : Yi n’ê swě ! rə̀ pyi rə̀ yírhə́, rə̀ t’â nyǐ gaga yé ! ¹² Bə-zhɔ̌-zhe, zɛ̃̀ dɛ̃̌ ! Ǎ Yi, zɛ̃̀ ń zhẽ̌ ǹ jɛ̃̀ yá ! Ǹ bə̀ká swě zúzúnú cìnə́ bé yò yé ! ¹³ Wɔ́ bə̀kɔ́n yil lyì-bəlwɛ̀lɛ́ n’ê pɔ̀ɔ́sɛ Yi mú ? Bə̀kɔ́n yil è n’ê zɔ̀m è wẽ́ è zhe : Ǹ tá ǹ pɛ còrhò-tum mú ? ¹⁴ E jà ǹdə́ rə̀myɛ́ ga ǹ nə́ ǹ nyǐ, ǹ yírhə́ nə nɔ̀nɔ̀ w ǹdə́ lyààrɛ́, e jà wɔ́ ǹmyɛ́ jɔ̃̀ w zúzúnú cìnə́ bé yò w ŋwɛ́nɛ́ ; wɔ́ ǹmyɛ́ jɔ̃̀ w zúzúnú cí nə́ ń ce ń cìn ní, wɔ́ ǹmyɛ́ ǹ nə́ ǹ sɛ̃ bə̀tɛ̀lɛ́ nɛ. ¹⁵ Kə́ lyì-bəlwɛ̀lɛ́ jɛ̃̀ yá, pɛ y còrhò-tum è lwɛlɛ rɛ́ yilə, sə e jé ǹ yé né ! ¹⁶ Bə-zhɔ̌-zhe mó wɔ́ pyɔ̌ twéé gakó byinə nə̀ bə zhɔ̌ zhe yilə. Bə̀ tənèsé jé tɛ̃́ ń tənà y wa. ¹⁷ Ǎ Bə-zhɔ̌-zhe, ǹ nyɛ̌ byɛ̀bɛ́ bə̀ n’ê nwɛ̀nɛ̀ mɔ́ nyə́ né bə̀ bwəl mó ! Ǹ nə́ ǹ zal bə̀ wun ni ; ǹ nə́ ǹ cili bə̀ zɔ̀mà nɛ́, ¹⁸ ń pə bùrì bə̀tɛ̀lɛ́ ǹdə́ mɔ̀bɔ́ bə̀ n’ê nwɛ̀nɛ̀ mɔ́ nɛ, mùnì nyumbyíní y è shí cɛ y wẽ́ mó yẽ̌ ywẽ ré è n’ê ce mó ne.