¹ Nwíísí yé né cə́bal mɔ́. Davyidi nyǎ. Wɔ́ Bə-zhɔ̌-zhe sono à shòò jàà y ŋwɛ́nɛ́. È nə wɔ́ byè yil á nə wɔ̌ à m’ǎ wɔ̀ nɛ : Dǔr-nə á vò á pyàr rɛ́ wẽ́ ǹdə kúmí ta ? ² Nyìwé, lyì-bəlwǎlsɛ pàm bə̀ twã yá, bə̀ co bə̀ cam rɛ́ myã́ y nyíní ni, bə myə̀lɛ́ bə vwɛ̃, cə-byín wẽ́, bə̀ la lyì bí byɛ̀bɛ́ bə̀ wɔ́ wu-cángá cìnə́ bé tɔ. ³ Wẽ̀ ré kùrə̀ né gə jǐrh rə̀ ló tɛ̃́, sə wu-cángá cə́bal mɔ́, wɔ́ etər ń nə mà n zɛ̃̀ n wɛ̀rhɛ́ nɛ́ ? ⁴ Nyǐ Bə-zhɔ̌-zhe ŋwɛ́nɛ́ ń sə̀pwà jì y wə, ń pyɛ̀lɛ̀ də̀gwã́ y ŋwɛ́nɛ́ Arəzana wa ; ń yírhə́ n’ê nyǐ, ń nə́ ń kámsɛ ń yirhə́ ń nyǐ numbyíní byǎ bɛ́ wun ní. ⁵ Bə-zhɔ̌-zhe nə́ ń nyǐ wu-cángá cí wu wə ; ń nə́ ń súl lyì-bəlwɛ̀lɛ́ y ǹdə́ lò mɔ̀bɔ́ ń wu nyɛ̀ jàn tumə né wẽ́ mó. ⁶ Ń nə́ ń ce myìn-cala ǹdə́ myǐn ǹdə́ zho bárhɛ́ nyɔ̀ lyì-bəlwǎlsɛ́ yó ; wɔ́ rə̀myɛ́ rə̀ wɔ́ bə̀ cəl kǎzɔ̌m bə̀ la nyɔ́ bə pə dwã nɛ mɔ́. ⁷ Bə̀ Bə-zhɔ̌-zhe wɔ́ cángá cə́bal, ń só cángá tumə né ; rə̀myɛ́ ce, wɔ́ wu-cángá cìnə́ bə̀ n’ê nɛ rɛ.