koussoube-marc-lee_psa_text

Kǝ̀kàl-fwɛ̀lɛ̀ 8

¹ Núnnə bé yé né cə́bal mɔ́… Davyidi nwə̃́ə̃́. ² Bə-zhɔ̌-zhe, nə́ Cínnə ! Ǹ yil ré càn cɛ y púlə́ púlə́ yó ! Ǹ pyɛ̀lɛ̀ rɛ́ zɛ̃̀ rə̀ wɔ dɛ̃̌ yə né yó. ³ Ǹ tó ǹ còrhó w ò n’ô shí bə̀sɔ́ná ǹdə́ byì-shɛmsɛ nyú w mú dɛnnɛ ń cĩ́ ǹ còrhó w kùr tɛ̃́, mùnì ga ń ce ǹ zwə̀ bé wun ní zhizhiri, ń ce ǹ zwə̀ bé bə̀ n’ê yǎl bə cĩ́ bə̀ jim mú nyə́ gu shɛ́shɛ́. ⁴ À gə tú à n’â nyǐ dɛ̃̌ yə né, ǹ jɛ̃̀sɛ́ tum rí, ǹdə́ cànà y ǹdə́ càmmə́sɔ̌sɛ́ ǹ wɛ̀rhɛ́ mɔ́ : ⁵ Numbyíní nə́ zɛ̃̀ è wɔ́ byè, ǹ mə́ ǹ lyǐrh è yò ? Sə numbyíní byǐ nə wɔ́ byè, ǹ mə́ ǹ cili è sono ? ⁶ Ǹ wɛ̀rhɛ́ y námpɔ́lɛ́ è yə̀ Yi yí yé, sə ǹ pɔ y zùwə́ ǹdə́ còrhó. ⁷ Ǹ pɔ y ŋwɔ̀nɔ́ ǹ jɛ̃́sɛ́ tumə né yó, ǹ co kɔn gakó è nèrh kùr wə, ⁸ Pyììsí ǹdə́ nɛ̃ nɛ́ ǹdə́ gɔ wẽ̀ ré, ⁹ ǹdə́ dɛ̃̌ cúmsí ǹdə́ mɔ́mwɔ̌sɛ́ nə̀-fɔ̀lɔ̀ w wẽ́ mó, tɛ̀bɛ́ gakó rə̀ n’ê dùr nə̀-fwààlɛ́ wẽ́ mó.