¹ Davyidi wu-zhìlù zɔ̀mà. Ń nún Bə-zhɔ̌-zhe Bɛ̃zhamɛ byǐ Kushi yilə ² Bə-zhɔ̌-zhe, à Yi ! Ǹmyɛ́ sono à n’â pyà à shòò jàà nɛ́ ; Zwẽ ne byɛ̀bɛ́ gakó bə̀ n’ê nwɛ̀nɛ̀ mɔ́ jɔ̃̀ wa, sə́ vwǎrh nɛ, ³ mùnì ga bə̀ bə̀k’á kǎr nɛ bə zəzhɛrɛ ǹdə́ bɔrɔ ò n’ô dɔ̀m kɔn lò lò jà ń tɛ̀nɛ́ ń la kúrhí sãɔ̃ ta. ⁴ Bə-zhɔ̌-zhe à Yi ! à gə wɛ̀rhɛ́ rə̀myɛ́, ǹdə́ lyɛlɛ jìmdi gə ŋwɛ́nɛ́ à jɛ̀rh nɛ, ⁵ ǹdə́ à gə wɛ̀rhɛ́ lwɛlɛ a pə lò mɔ̀bɔ́ ń wɔ́ yə̀-zùlə́ cə́bal à yil mó ne, ǹdə́ à gə zɔ lò mɔ̀bɔ́ ń nə́ ń nwɛ̀nɛ̀ nɛ a zwẽ ń kɔn e jà è bə kùr zhe, ⁶ Sə zù-bal mɔ́ jì ni n za, n nɔ̃̀ nɛ tɛ̃́ ǹdə́ ń nèrh, sə n ce à zùwə́ y zù tɛ̃́ shó wə. ⁷ Bə-zhɔ̌-zhe, zɛ̃̀ tɛ̃́ ń yẽ̌ ǹ lyim rí ni, zɛ̃̀ tɛ̃́ ń bú ǹdə́ à zwə̀ bé bə̀ n’ê pupwiri tɛ̃́ mɔ́, zɛ̃̀ ń púr ǹ yírhə́ ń sɛ̃ à kúrhí, ń pə bùrsi bǔr nyí ! ⁸ Bə̀ dwə́ né lyì bí kə́kɛ́lɛ́ mɔ́ ! zɛ̃̀ ń jì dɛ̃̌ bə̀ yó w ń vò jààsɛ́ sə̀ ŋwɛ́nɛ́ dɛ̃̌dɛ̃̌ mɔ́ wə ! ⁹ Bə-zhɔ̌-zhe nə́ ń bùr dwə́ né bùrsi : Ǎ Bə-zhɔ̌-zhe, pɛ̃ bùrì ! ǹdə kɔn gə́ mə̌ nɛ nɛ́, kɔn tó ǹdə à gə́ wɔ́ bə dóó zhe cə́bal nɛ́ ta ! ¹⁰ Ce kɔn zhɛ̀ lyì-bəlwǎlsɛ́ surhə námməlwɛ̀lɛ́ y yilə, sə́ zə wu-cángá cìnə́ bé wun ni, Ǹmyɛ́ ǹ yě numbyínsí wun ní ǹdə́ tɛ̀bɛ́ rə̀ shèè mó párá, Yi ǹ wɔ́ cángá cí ! ¹¹ Yi wɔ́ à ku à m’â cə̀r à cìn yé né búlə́ jàà wa, rə̀ n’ê vwǎrh byɛ̀bɛ́ bə̀ wu w wɔ́ cángá mɔ́. ¹² Yi wɔ́ bù-kárna cángá, Yi lyim n’ê yì yi gakó. ¹³ Lyì-bəlwɛ̀lɛ́ gə yə̀ è wu pyìrhí, rə̀ n’ê dwèlè rə̀ shù wə́, rə pə̃̀ rə̀ twã yá, rə myə̀lɛ́ ; ¹⁴ rə̀ cama nɛ́ nyə́ né la vò nə gu lyì-bəlwɛ̀lɛ́ yá, rə̀ cama nɛ́ n’ê fúlə́. ¹⁵ Nyi-nə, lyì-bəlwɛ̀lɛ́ n’ê tɛnɛ lwɛlɛ, è ce lwɛlɛ rɛ́ cĩ́ kùrə̀, e zɛ̃̀ e lù nánfò. ¹⁶ È n’ê pwə́r gɔ́rɔ́ nyí, e kù wə̀, e zɛ̃̀ e tu gɔ́rɔ́ w è cìcì kù mú wẽ́. ¹⁷ È lwɛlɛ rɛ́ k’â n’ê jòm è yə́-pɛ́lɛ́ wa, è jàn tumə né k’a n’ê mà è cíl ne.