¹ Nwíísi yé né cə́bal. Bə̀ n’ê dwí ǹdə́ ku ǹdə dàkɔ́nɔ́ ta ò nyínsi lyɛlɛ. Davyidi nwíísi. ² Bə-zhɔ̌-zhe ! Bə̀ká lyəlyɔ nɛ jɛ̃̀ ǹ lyim rí wẽ́ yé, bə̀ká pɛ̃ còrhò-tum ǹdə́ ǹ nə́ ǹ pupwiri tɛ̃́ yé. ³ Bə-zhɔ̌-zhe ! Dǔr à nɔ̀nɔ̀, bə̀ à bə jàn zhe yé ; Bə-zhɔ̌-zhe ! Wárh nɛ, bə̀ à kúr rí n’ê pə́pǎ. ⁴ À wu w gakó n’ô zhízhǐ ; Sə ǹmyɛ́, Bə-zhɔ̌-zhe, rə̀ m’a wɛ̀rhɛ́ èta kɔn m’e yí dǒ … ? ⁵ Bə-zhɔ̌-zhe, ká bà ! Zwẽ ne ; Vwǎrh nɛ, ǹ nɔ̀nɔ̀ dǔr mó yilə. ⁶ Bə̀ lò mɔ̀bɔ́ ń cù mú kə́ ń tá ń lyǐrh ǹ yò yé ; Mɔ̌ lò ń mà n cèrhé mó cùùri wẽ́ ? ⁷ À gə́ n’â súl à wẽ́ dɛ̃́dɛ̃́ mɔ́ ce à jàn rɛ́ zhɛ̀ ; À gə pyě tɛ̃́ cəcɛ̃ nɛ gakó à yə́-nàná nɛ́ shɛ nɛ, À yə́-nàná nɛ́ n’ê lwé à kò-pyònò w wə. ⁸ À wu-zhùlù w ce à yé y pyɛ̀nɛ̀ ; byɛ̀bɛ́ bə̀ n’ê nwɛ̀nɛ̀ nɛ mɔ́ ce à yé y cɛ ǹdə ezhɛ̀nɛ́ yé ta. ⁹ Ámyɛ̌ byɛ̀bɛ́ gakó á n’á wɛ̀rhɛ́ lwɛlɛ mɔ́, zhəl-nə kwã nɛ́ à nyí ni ! Bə̀ Bə-zhɔ̌-zhe nyɛ̌ à yə́-nàná nɛ́ domɛ ; ¹⁰ Bə-zhɔ̌-zhe nə́ ń zwẽ à lwə̌l mó, Bə-zhɔ̌-zhe mó nə́ ń zwẽ à yi-co wə́.