¹ Nwíísi yé né cə́bal. Bə̀ n’ê wúl wíísi. Davyidi nwíísi. ² Ǎ Bə-zhɔ̌-zhe, cili à zɔ̀mà nɛ́ ! Cili à nɔ̀nɔ̀ w à wẽ́ mó ! ³ À pyɔ̌ ǹdə́ à Yi ! Cili à wɔ́wɔ́lɔ́ mɔ́ à n’â wɔ́wɔ́lɛ́ à ce mó mó, Wɔ́ ǹmyɛ́ nɛ à n’â lwə̀lə̀. ⁴ Bə-zhɔ̌-zhe ! Nəkɔkɔ́lɛ́ ǹ nyɛ̌ à cəl ré ; nəkɔkɔ́lɛ́ à n’â pyìrhí à yé à zǎ mɔ́, à n’â nyǐ. ⁵ Bə̀ ǹ wɔ́ Yi tɛ̀bɛ́ rə̀ bə lwɛlɛ só yé ; lyì-bəlwɛ̀lɛ́ bə jàà zhe ǹ sono gaga yé. ⁶ Bə surhə zhe cìnə́ t’â zhì ǹ yírh jòm bə̀ yó yé ; ǹ nə́ ǹ súl byɛ̀bɛ́ gakó bə̀ n’ê twĩ̀ jìmdi tumə mó. ⁷ Ǹ nə́ ǹ zhìlì kɔ̀mrɛ́ yò ; Bə-zhɔ̌-zhe nə́ ń súl lyì-gurnə bé ǹdə́ yǔyǔ cìnə́ bé. ⁸ Sə è gə wɔ́ àmyɛ́ yilə, ǹ nɔ̀nɔ̀ dǔr mó nánfɔ̀lɔ̀ w jàn yilə, à n’â dùr mó, à la ǹ jì y wə, à wùlì tɛ̃́ ǹ còrhó jì y w ǹdə́ nyɔ̀mɔ̀. ⁹ Bǝ-zhɔ-zhe ! zǝ nɛ a vò ǹ cángá tumǝ né wẽ́, à zwǝ̀ bé yilǝ, kwɛrhɛ ǹ sɔ́má y à nèrh kùr wǝ, ¹⁰ bǝ̀ zhǝ̀n dǝ́-byǐ tɛ̀nɛ́ bǝ̀ nyú w yé; bǝ̀ wun ní sú ǹdǝ́ surhǝ námmǝlwɛ̀lɛ́, bǝ byã-mǝ́gɔ̀ɔ́lɛ nyǝ́ pul ǹdǝ lú-bɔ̀là ta, myìnù zɔ̀mà nǝ̀ ŋwɛ́nɛ́ bǝ̀ mǝ̀jòlò yó. ¹¹ Ǎ Yi, mǎ bɛ ǹdə dwə́ə́re cìnə́ ta ! Bə̀ tɛ̀bɛ́ rə̀ wɔ bə̀ wẽ́ mó zə bɛ bə vò bə̀ jó jàà wa ! Cǐrh be bə̀ tu bə̀ yə̀-bəlwàálɛ́ rə̀ já dɛ̃́dɛ̃́ rə̀ bə yó zhe mó cəcəl wə ! Bə̀ bə̀ n’ê bwí ǹdə́ mɔ́. ¹² Sə byɛ̀bɛ́ bə̀ co bə̀ cìn ǹ jɔ̀ w mɔ́, b’a nə wu-nyɔ̃̀, bə̀ b’a fùù twéé twéé, sə ǹ b’ǎ yìlì bi ; ǹ b’ǎ yə̀ wu-nyɔ̃̀ kɔn byɛ̀bɛ́ bə̀ só ǹ yil ré mó yilə.