koussoube-marc-lee_psa_text

Kǝ̀kàl-fwɛ̀lɛ̀ 86

¹ Dəvyidi yi-co. Bə-zhɔ-zhe, cili à yi-co wə́, sə́ zwẽ à lwə̌l mó ! Bə̀ nyǐ à wɔ́ nə̀mɔ̀ zúzúnú cə́bal. ² Yìlì à myə̌l ré, bə̀ wɔ́ ǹmyɛ́ nɛ à zhí ! À Yi, vwǎrh ǹ tùntùnnə mó ń zhí mú mú ! ³ Cǐnnə ! dǔr à nɔ̀nɔ̀, bə̀ à n’â búbwéé à ce mó dɛ̃ gakó. ⁴ Cǐnnə, pə wu-nyɔ̃̀ ǹ tùntùnnə mó ne, bə̀ wɔ́ ǹmyɛ́ yó w à n’â nyǐ ní. ⁵ Cǐnnə, ǹmyɛ́ càn, ǹ nə́ ǹ pɛ sǔbri, ǹ sónó w já dɛ̃́dɛ̃́ ǹdə́ lyì byɛ̀bɛ́ bə̀ n’ê byẽ̀ mó mó. ⁶ Bə-zhɔ-zhe, pyèrhè ǹ zhɛ̃̌ ń cili à yi-co wə́, sə́ cili à lwə̌l mó cɛ̀nɛ̀ ! ⁷ À gə ŋwɛ́nɛ́ zwini wẽ́ dɛ̃, wɔ́ ǹmyɛ́ à n’â byẽ̀, sə ǹ nə́ ǹ zwẽ à lwə̌l mó. ⁸ Cǐnnə, Yi dõ tɛ̀nɛ́ yə né wẽ́ rə̀ m’a nyɛrhɛ ǹmyɛ́ yé, kaka myɛ tɛ̀nɛ́ rə̀ m’a nyɛrhɛ ǹmyɛ́ tumə né yé. ⁹ Cǐnnə, tənèsé ǹ wɛ̀rhɛ́ mɔ́ gakó m’a bà, sə wùlì ǹ yé né, sə zǔl ǹ yil ré. ¹⁰ Bə̀ ǹ wɔ́ Yi nánfɔ̀lɔ̀, ǹ nə́ ǹ wɛ̀rhɛ́ màmyaarhɛ ; ǹmyɛ́ dúdú ǹ wɔ́ Yi. ¹¹ Ǎ Bə-zhɔ-zhe, cèrhè ne a tó ǹ sɔ́msɛ́ ! a vò ǹ zhə̀n rɛ́ wẽ́. Pə nɛ wu kɔ̀bɔ́ ò m’a nyɛ̀ ǹ yil ré. ¹² Eta, Bə-zhɔ-zhe à Yi, à m’a zǔl ǹ yil ré ǹdə́ à wu gakó ! A zǔl ǹ yil ré byinə nə̀ bə zhɔ̌ zhe yilə. ¹³ Bə̀ ǹ wu-bɔ̀nɔ̀ w já dɛ̃́dɛ̃́ ǹdə́ nɛ, ce ǹ vwǎrh nɛ cu gɔ́rɔ́ nánlyilyùmú w wẽ́. ¹⁴ Ǎ Yi ! cìn-byilu cìnə́ zɛ̃̀ bə̀ n’ê bwí ǹdə́ nɛ, nyǐ jàn cìnə́ zɛ̃̀ bə̀ n’ê yǎl bə vùr à myə̌l ; bə̀ t’â bùl ǹmyɛ́ yò bə̀ wẽ́ yé. ¹⁵ Sə ǹmyɛ́, Cǐnnə, ǹ wɔ́ Yi, kúrhí sanna ǹdə́ nɔ̀nɔ̀ dǔr cə́bal, ǹ lyim t’â zɛ̃̀ làlà yé, ǹ zhe wu-bɔ̀nɔ̀, ǹ zhe zhə̀nà ; ¹⁶ Pyìrhí ǹ yé ń nyǐ ni, sə́ dùr à nɔ̀nɔ̀, pə jàn ǹ tùntùnnə mó ne, sə vwǎrh kɛ̃ mɔ́ ń wɔ́ ǹ tùntùnnə mó mó byǐ mú ! ¹⁷ Wɛ̀rhɛ́ ǹ wu-bɔ̀nɔ̀ nyɔrhɔ kɔn ń byili à yilə ! mùnì à zwə̀ bé yírhə́ nə wa, bə̀ wun zhizhiri ! Ǎ Bə-zhɔ-zhe ! wɔ́ ǹmyɛ́ ǹ wɔ́ à kúrhí sanna, ǹ nə́ ǹ zal à wu ni.